عاشق ترابك يا وطن

فكرت أكتب للوطن واحكى فيه حكايات
وقول يا محلى أرض الوطن وأجمل الأيام والذكريات
سألتنى أمى رايحة فين قلتلها رايحة أكتب حاجة جديدة
بس المرة دى للوطن واوصف فيها اللى كان وفات ردت عليا وقالتلى وطن إيه
اللى رايحة تكتبى ليه بصى على اللى حواليكى وشوفى بيجرا إيه
معقولة لسه شايفة حاجة جميلة فى الوطن تتكتب فيه
الناس خلصت كل الكلام ونهت كل اللى فات واللى كان
حسيت وقتها بأهمية كلامها
قعدت معاها اسمع ليه
واشوف هى بتقول إيه
عشان أستفيد منها
واعرف أرتب اللى ناوية عليه
بصتلى بنظرة حسيت وقتها إن دموعها بتنزل من غير عياط
قالتلى أنتى لسه صغيرة عشان توصفى الوطن فى بتين أشعار
عشان تكتبى للوطن ارجعى للى كانوا قبلك زمان
اللى كتبوا تاريخ الوطن بالدم مش بالحبر
اللى عملوا بأيديهم أجمل تاريخ تفتخر بيه كل الأديان والأوطان
قالتلى الوطن ضابط حامى الصليب والإمام فى ودنى بينادى
أبطال واقفين على الحدود أسود علشان يحموا بلادك
عشان جدك عمك عشان أختك وأمك يناموا بالليل من كتر الهزار وعدم الخوف من النار
‫حكام وأبطال شهداء وعظماء
كلهم واقفين وقفه اسد من أجل غابة واحدة يحميها من كل الذئاب
وعايزة تكتبى أشعار يا بنتى روحى نامى معاكى مدرسة الصبح
روحى اتعلمى التاريخ هتعرفى ياما دقت طبول على الأرض
اتعلمى التاريخ مظبوط عشان لو أنتى نسيتى حرف هتجرحى كل الأبطال
واللى حصل وكان من أجل الأرض
زمان لما كنا فى المدرسة ونعمل تحية العلم
كنت بشوف قدامى تاريخ كل جندى استشهد
كل أم ضحت بابنها لأجل راية الوطن تفضل فى السماء مرفوعة
كل أب استلم جثمان ابنه وهو راسه فى السماء منصورة
هو ده الوطن
تعرفوا إيه مشكلتكم إنتم يا شباب
ذاكرتكم بقيت زى السمك
بتنسوا كل اللى كانوا وكل اللى حصل عشانكم وكل الألم
وبتبصوا للوطن نظرة لمدير فى بنك
عمال يصرف كمية قروض مقابل حتة أرض
عمر الوطن ما كان بالمال والجاه
الوطن بالاستقرار والأمان
إزاى عايزين وطنكم يجمعلكم أموال
وانتم اصلا كلكم نايمين
وفى الشغل مش متقدمين
عايزين يجيبلكم اموال منين
وحتى الشباب مش مفيدين
كل عايز ينام و السما تمطر عليه
طيب انتى عمرك شوفت ارض نجنيها قبل ما نزرع فيها
انا قولتها لاخوكى زمان
عشان تتجوز ويبقالك عيال
لازم بيديك تصنع المال
وتعرف تعب الشغل
و تصرخ من كتر الألم
عشان تحكى لولادك انت كنت ايه زمان
وتعلم ولادك لازم يبقى ايه كمان
ما هى حبيبتى كلمه مصر ام الدنيا مش كلمه وخلاص
لا دى طيبه ناس
وشعب تعب لأجل للوطن عمره ما ينداس
الوطن يا بنتى مش ارض و بيوت
الوطن ناس تخاف على بعض
ومع بعض فى كل الدروب
اقرأى للوطن وتعلمى من اللى كان يحصل الزمان وبعدين تعالى اكتبى فيه اشعار