كل ده فى 35 يوماً بس

بسرعة كده أقولكم على اللى شغلنى الفترة دى، ومش عارف كل الناس كده ولا ايه.. لسه مفقتش من مهزلة انتخابات الشعب ومشاكلها الكثيرة.. فجأة كده ظهرت مشكلة أنفلونزا الخنازير، وأعداد الوفيات بتزيد كل شوية وعدد الإصابات بيزيد أكتر وأكتر.. ثم فجأة أحداث العمرانية والاعتداءات المتبادلة وحواراتها الكثيرة.. ثم فجأة ظهرت أحداث سمك القرش فى شرم الشيخ وموت عدد من السياح.. ثم فجأة ظهرت أزمة مستشفى العباسية، وإصرار الوزير على نقلها حتى تدخل الرئيس.. ثم أزمة أصحاب المقطورات اللى اتسببت فى زيادة أسعار كثير من السلع.. ثم فجأة كده وبقدرة قادر قال إيه يظهر فجأة كده الجاسوس المصرى طارق عبد الرازق، وقبلها الكشف عن شبكة تجسس بمصر متهم فيها ثلاثة مصريين وضابطان إسرائيليان كانوا يتجسسون على الاتصالات الخاصة ببعض المسئولين.. ثم تأتى الأزمة والكارثة الكبيرة ليلة رأس السنة 2011 والانفجار الضخم فى إسكندرية، واللى راح فيه 21 مصرياً مسلماً ومسيحيا وعدد كبير من المصابين فى جريمة دنيئة ضد شعب مصر والإنسانية بكاملها.
الغريبة إن الأزمات دى مش بسيطة بدليل انشغال كل وسائل الإعلام بها، وعمل صفحات كاملة فى الجرايد وبرامج خاصة فى التلفزيون بكل واحدة منها، والناس كلها بتتكلم فى كل حاجة من دول يوم ولا اتنين ولا تلاتة.
الغريبة كمان أن كل الأحداث والأزمات دى حصلت فى مدة بسيطة جداً يعنى بالظبط من يوم الأحد 28 نوفمبر إلى اليوم 3 يناير يعنى بالظبط 35 يوما.
أنا طبعاً انشغلت فى الحاجات دى كلها وناس تانية كتيرة وده شىء مستفز طبعاً لأن أكيد أكيد الحاجات دى مش عشوائية دى متخططة ومدروسة جدا فى أحداثها، وفى توقيتها، واحنا مش بعيدين عن انتخابات الرئاسة اللى بعد كام شهر.
والغريبة كمان إن الناس اللى كانت بتتكلم عن الفساد والفقر والمرتبات سكتوا خالص وصوتهم مش باين من الدوشة والشوشرة اللى معمولة اليومين دول.