جمعة الشوان

حتى أنت يا (جمعة يا شوان) الدولة نسيتك ورمتك؟
من بعد سنين خدمة لوطنك ومغامرة بروحك وحياتك!
معلشى يا صاحبى متزعلشى ع اللى أنت عملته متندمشى
دا غلاوة مصر اللى ف قلبك هاتكون لك ف ميزان حسناتك
......
معلش يا صاحبى الأيام دى مبقاش الفارس مطلوب
مبقاش اللى يحب بلاده فى كراسى السُلطة مرغوب
لكن المطلوب الأيام دى اللى يجرف مصر ويدى
الغاز والميه لصهيون حسب الكتالوج المكتوب
......
معلش يا (جمعة يا شوان) وطنك كان عنك مشغول
بكراسى وتزوير ونفاق أطماع بالعرض وبالطول
وأراضى الدولة بتتقسم ومحدش قادر يتكلم
غير (حمدى الفخرانى) لوحده زيّك فارس وابن أصول
......
معلش يا (جمعة يا شوان) والله أنا قلبى معاك
لو ينفع نقسمه نصين أو تاخده على بعضه فداك
وحياتى بحالها متغلاش على واحد ضحى مخلاش
دا كفاية صبرك وشهامتك على (جوجو وليفنى وبراك)
......
معلش يا (جمعة يا شوان) ليه تتعب وقت انتخابات؟
كان لازم تعرف يا حبيبى أنها أيام الإتاوات
أيام تقسيم مصر عليهم المال والسلطة فى أيديهم
والبطل اللى اتبهدل زيّك مالهوش فى اليغمه منابات
......
حرموك من خير مصر الغاليه لا وسام ولا صحة ولا معاش
و وسام الدولة وفلوسها أخدوها الناس الأوباش
راح أقولك تانى متزعلشى بيهم من غيرهم راح تمشى
كفاياك هاتعيش جوه قلوبنا زى ( أبو خالد ) ماهو عاش