تلاقى الدنيا زحام.. لو نازل أخر الخط.. أو حتى نازل أوام.. وهناك واحد بيصرخ.. امسك حرامى.. وبسرعه أعمل حصار.. وجنبى مدام عايزه تطبخ .. لجوزها عم تهامى.. وشاريه كيلو خضار.. ف أتوبيس النقل العام..أتفرج يا سلام.. ناس متشعبطة ورا.. وناس مدلدلة قدام... وسواق رابط حزام.. مثال للالتزام.. وشاب محترم.. قام وقعد المدام.. وواحد عينه تتخرم.. قاعد بيعاكس سهام.. ف أتوبيس النقل العام.. كمسرى حاضر... والأتوبيس كحيان.. عايز سمكرى شاطر.. ف أتوبيس النقل العام.. على نفسك حافظ.. لتتنشل أوام.. من حرامية المحافظ... ف أتوبيس النقل العام.. تلقى إللى على رجلك دايس.. وإللى قاعد على حجرك.. وإللى بالمدام حايس.. ف أتوبيس النقل العام.. خلى عندك شجاعة.. ولو كنت نازل محطة.. أجهز قبلها بساعة.. ولو كنت قاعد.. خد بالك وأنت بتقوم.. وخلى حد معاك يساعد..لو عايز تنزل بالهدوم.