مدرب الحضرى: اللى يشوفه وهو بيتدرب هيتعب من الفرجة

قال فكرى صالح، مدرب حراس مرمى المنتخب الوطنى السابق ووادى دجلة الحالى، إن عصام الحضرى يتدرب يوميًا بشكل شاق، سواء فى النادى أو معسكرات المنتخب الوطنى.

وأضاف "صالح"، فى مداخلة هاتفية مع الإعلامية لميس الحديدى، ببرنامج "هنا العاصمة" على فضائية "cbc": "لما تشوفى الحضرى وهو بيتدرب مع زملائه؛ هتعرفى إن مفيش مع السن حاجة اسمها مستحيل ولكن فيه حاجة اسمها الإصرار".

وتابع "صالح": "عصام الحضرى فاز بجائزة أفضل حارس مرمى فى 3 بطولات أفريقية، ونفسه ينهى مشواره الكروى بكأس العالم، ده حلم المصريين كلهم.. والعياط اللى كان فيه النهاردة بسبب فوز المنتخب على غانا هو بكاء لأن ربنا كان واقف معاه، وإنه قدر يفرح ال90 مليون مصرى".

وتابع فكرى: "فرحة المصريين غير طبيعية لأننا حسينا إن مصر رجعت فى كل حاجة، وأنا بقول الكلام ده من يوم الجمعة اللى فاتت؛ مصر العظيمة بتبدأ ترجع فى كل مجالاتها، وعصام الحضرى كان شايل هم 90 مليون مصرى عايزين النهاردة يكسبوا، فمكنش يقدر يخطئ النهاردة، ولو تشوفى تدريبه فى النادى يا أستاذة لميس؛ انتى هتبقى تعبانة وانتى قاعدة بتتفرجى، وأنا بشكر الجندى المجهول اللى ورا عصام الحضرى، اللى هى مدام عصام الحضرى، لأنها فعلاً عاملة المناخ اللى يقدر يوفر جو يبعد عنه المشاكل اليومية فى هذا السن".

ووجه "صالح" الشكر للشعب المصرى لوقوفه خلف منتخبه الوطنى، بالإضافة إلى المنتخب نفسه بجهازه الفنى وعلى رأسه الكابتن أحمد ناجى، وشريف إكرامى، وأحمد الشناوى.