أحمد جعفر ل"اليوم السابع": "رجعت الزمالك بمكالمة مرتضى من على الصحراوى"

·
لو قعدت ع الدكة الموسم كله.."مش هعترض"
·
لعبت على عمرو زكى والعالمى فكيف أخاف من باسم مرسى؟
·
أتمنى انضمام غالى ومتعب للزمالك وحازم أفضل من تريكة
·
الشناوى أحسن من الحضرى وإكرامى
·
بدأت مشوارى مع الكرة ب8 آلاف جنيه سنوياً
·
حسام غالى لما "بيقع" الأهلى ب"يقع"

فتح أحمد جعفر مهاجم الزمالك أو "الغضنفر" كما تلقبه الجماهير قلبه ل"اليوم السابع" فى أولى حواراته بعد العودة إلى القلعة البيضاء بعد موسمين قضاهم فى إنبى وبتروجت ليكشف أسرار تجربته الأولى فى ميت عقبة وكواليس الأزمة مع ميدو والبداية من محطة سرس الليان حتى العودة للزمالك.

فى البداية.. مَن وراء عودتك للزمالك؟
أحمد مرتضى منصور السبب الرئيسى فهو من حدثنى منذ البداية عن رغبة مجلس الإدارة فى عودتى مرة ثانية فى شهر أبريل الماضى ثم تلقيت منه مكالمة هاتفية وحاجة محدش يعرفها أنا لفيت ورجعت تانى من طريق مصر إسكندرية الصحراوى.."كنت رايح تمرين سموحة لأول ومفكرتش.. لفيت ورجعت تانى على نادى الزمالك مضيت العقد وخلصت كل حاجة.

خلفت اتفاقك مع سموحة.. فما تعليقك؟
أولاً الزمالك صاحب الفضل عليا فى كل حاجة وكنت فعلاً واخد مقدم تعاقد من سموحة ولما أحمد مرتضى كلمنى حسيت بحاجة تشدنى إنى لازم أرجع بيتى ومسئولى سموحة تعاملوا معايا بكل احترام ومحصلش أزمات وقدروا موقفى لأنى من البداية قولت لوكيلى والمهندس فرج عامر رئيس سموحة إنى هكون معاه مهما جالى عروض باستثناء الزمالك وقبل ما أمضى ليهم قولتلهم أن لو فى زمالك هسعى إنى أروح وبشكر رئيس سموحة جداً أنه سهل الأمور.

مادياً.. سموحة كان أفضل من الزمالك؟
لو فى الزمالك أقل دا بيتى لكن الحقيقة عقدى فى الزمالك أكبر من اللى وقعته فى سموحة والأمور المادية فى بيتك مش هتفرق كتير لكن دى الحقيقة والناس قدرتنى بشكل كويس فى بيتى.

هل عقدك الفترة الثانية أفضل من الأولى؟
لا الفترة الأولى كان عقدى أكبر مبلغ فى حياتى فكنت أحصل على 3 ملايين جنيه فى السنة التى سبقت رحيلى.

وماذا عن أول مبلغ تقاضيته؟
8 آلاف جنيه من سرس الليان كان وقتها حاجة كبيرة طبعا والحمد لله ربنا كرمنى وانتقلت الاتصالات ثم الزمالك.

من المدرب صاحب الفضل عليك؟
حلمى طولان فى الاتصالات أول واحد وكان معاه وقتها مؤمن سليمان مدرب الزمالك الحالى ثم يأتى بعده السويسرى دى كاستال وطبعاً معظم المدربين اللى دربت تحت قيادتهم استفدت منهم.

وكيف ترى المنافسة فى الزمالك.. وشكل الاستقبال؟
المنافسة أولاً وأخيراً فى صالح نادى الزمالك والناس كلها بتدرب بجدية والأفضل هيلعب ولما كنت موجود فى المرة الأولى كان فى أسماء كبيرة ودايما المنافسة بتخليك أفضل ومعظم اللاعبين لعبت معاهم أو قدامهم فى مرة لما كنت فى بتروجت خلال مواجهة الزمالك لقيت على جبر بيكلمنى ويقولى ياريت لو ترجع تانى يا كابتن ولما رجعت لقيت الناس كلها بترحب بيا.

لكن المنافسة صعبة.. فمثلاً باسم "المهاجم الأساسى"؟
أعرف باسم مرسى من فترة كبيرة وأول ما شافنى قالى نورت يا كابتن وهو من أفضل المهاجمين فى مصر دلوقتى والمنافسة معاه هتكون لصالح الفريق فعلا فالفريق يحقق بطولة وليس لاعب واحد ودائماً نجاح الفريق أهم من نجاح اللاعبين والناس كلها عارفه أن أحمد جعفر بيحب المنافسة وكان موجود عمرو زكى وميدو وكنت بلعب وأساسى فمفيش أزمة بالنسبة ليا دلوقتى أهم حاجة أعمل اللى عليا.

وماذا لو جلست على الدكة 10 مباريات مثلاً؟
طبيعى أن أى لاعب هيبقى مضايق لو قعد على الدكة ولكن لو جلست الدورى كله على دكة الزمالك لن أعترض.

لكن الفترة الأولى شهدت أزمات.. فما تعلقيك؟
بالعكس الفترة الأولى كانت الأفضل فى مشوارى الكروى وفعلاً أفتقد كثير ممن رحلوا عن الزمالك.

وماذا عن الأزمة التى واجهتك مع ميدو؟
هو كان فاهم غلط وقبّل رأسى بعد تسجيل هدف التعادل مع دجلة فى المباراة التى كان لها دور كبير فى صعودنا للمربع الذهبى بالدورى فكنت سبب فى استمراره بالفريق.

ولكنه طلب رحيلك؟
"ميدو صنع مننا شماعة لتبرير بعض الأمور..كان واصله أن كذا حد مع بعض جامدين وفى عصابة داخل الفريق هتسعى لرحيله، وذلك لم يحدث وقرار رحيله كان مكتوب فى المدرجات فى ماتش دجلة وقعدته بالهدف اللى جبته وكان فاهم الدنيا غلط. ميدو كان كل هدفه أنه عاوز يقول أنا جبت مين ومشيت مين وده مش موجود فى الكرة".

كان فى عصابة؟
هو معنى أن لاعبى الفريق قريبين من بعض يبقى ده تكتل أو عصابة بالعكس قرب اللاعبين دائماً يصب فى 4مصلحة الفريق.

وماذا حدث بعد الأزمة؟
توجهت للمستشار مرتضى منصور وقولتله إنى مش هقدر أكمل وميدو موجود واختصرت الطريق مكنتش حابب أكون سبب فى مشاكل وفضلت أن يكون رحيلى فى هدوء بدون إثارة مشاكل لأن ده بيتى والمستشار مرتضى قال لا كمل والموضوع عادى وكنت أنا ونور السيد وكان الكلام علينا اننا نكمل قولتله أنا مش حابب يكون فى مشاكل بسببى ووافق على رغبتى.

قابلت ميدو بعد الرحيل؟
أكيد قابلته والأمور عادى طبيعية لأن الأرزاق بتاعت ربنا وهو أخ أكبر برا الملعب.

انتقلت بعد ذلك لإنبى ومنها لبتروجت.. من الأفضل؟
أندية الشركات بتلعب براحتك سواء فى إنبى أو بتروجت كسبت مكسبتش عادى الأمور بتبقى أسهل وأنا استفدت من التجربتين لكن تجربة بتروجت كانت الأفضل حسيت بحرية كبيرة فى الملعب لكن إنبى كنت ببقى محكوم بحاجات كتير زى طريقة اللعب وغيره.

وماذا عن لقب الغضنفر؟
اللقب يعود لمباراة الأهلى والزمالك التى سجلت فيها هدف فى البداية ليطلقه الإعلامى مدحت شلبى خلال تعليقه على المباراة وأصبح لقبى المفضل.

من أفضل مهاجم فى مصر خلال الفترة الحالية؟
باسم مرسى وكان فى إيفونا ولكنه رحل.

ماذا عن شكل المنافسة مع الأهلى.. وحكاية دورى كل "11 سنة"؟
تقصد أن الأهلاوية بيقولوا أننا مش هناخد الدورى التانى غير بعد فترة كبيرة ردى أن الكلام دا انتهى والزمالك الأول مكنش بيقدر يجيب لاعيبه لكن دلوقتى فى صفقات قوية وتدعيمات كبيرة وسنحقق لقب الدورى فى الموسم القادم عندنا أحسن لاعيبه فى مصر وبقول على نغمة 11 سنة كان زمان وولى.

ماذا عن أفضل مدافع واجهته؟
وائل جمعة كان أصعب مدافع واجهته واعتزاله كان خسارة فعلاً للكرة المصرية لأنه فعلا مدافع رائع ولن يعوض.

ومن تتمنى انضمامه من الأهلى؟
حسام غالى وعماد متعب بالفعل أتمنى وجودهم فى الزمالك.

وهل تتمنى عودة أحد للزمالك؟
نعم محمود فتح الله وبالمناسبة هو أكتر مدافع فى تاريخ نادى الزمالك جاب أهداف وبالتأكيد أتمنى عودة نور السيد وصلاح سليمان وعبد الواحد السيد.

ماذا عن عامل السن؟
ايه المشكلة الناس فى أوروبا مبتقفش على سن معين المعيار دايما فى الملعب والثنائى مازال قادر على العطاء وحسام غالى لما بيقع الأهلى بيقع.

ومن الأفضل حازم إمام أم أبو تريكة؟
بالتأكيد حازم إمام فهو الأفضل مهارياً على الإطلاق.

مرتضى منصور.. هل يتدخل فى الفنيات؟
مرتضى منصور راجل سايب شغله وبيعمل لنادى الزمالك أنا لسه راجع من فترة قصيرة معتقدش أنه بيدخل فى أى أمور فنية والناس دايماً بتشوفه زهقان أو زعلان لو الفريق متعادل أو خسران فيتنرفز فى المدرجات فدا مش تدخل.

وما أفضل هدف سجلته؟
فى الدقيقة 94 مع الزمالك أمام بتروجت كان الأخير متقدم علينا وحسن مصطفى اتعادل لينا فى الدقيقة 91 وأنا سجلت هدف الفوز فهو الأفضل وذلك تحت قيادة حسام حسن.

وما رأيك فى أحمد حسن "المدرب"؟
مدرب صاعد واعد لم يحصل على فرصته كاملة والإمكانيات كانت محدودة ومعظم اللاعيبه اللى جابها من الدرجة الثانية فكان محتاج وقت أكبر.

وماذا لو أصبح "أبو تريكة" مدرباً؟
ليه لا.. معظم لاعبى الكرة بيكون عندهم فكر ليه من التعامل مع عدد كبير من المدربين.

وماذا عن كوبر مدرب المنتخب؟
النتائج هى من تحكم الحكم على تجربته ولم أخوض مران معه لأنى مروحتش المنتخب.

وماذا عن عدم ضمك للمنتخب؟
نصيب كنت هداف الموسم الماضى فى بتروجت ولم يتم اختيارى ولكن دا نصيب وعندى طموح إنى انضم للمنتخب.

ماذا عن أفضل الحراس؟
أفضل من لعبت معهم عصام الحضرى وعبد الواحد السيد ومحمد عبد المنصف.

من الأفضل الشناوى أم الحضرى؟
فى الوقت الحالى أحمد الشناوى الأفضل فى مصر سواء لو تم مقارنته بالحضرى أو شريف إكرامى ولكن الحضرى حارس كبير أيضاً.

فى النهاية.. وجه رسالة لجماهير الزمالك؟
أنا بشكرهم جداً على وقوفهم بجوارى وإنك تلعب فى نادى بحجم الزمالك له قاعدة جماهيرية بالشكل دا بتخليك تطلع أفضل حاجة عندك فى الملعب وبوعدهم اننا هنعمل أقصى حاجة عندنا من أجل حصد البطولات فى الموسم المقبل وهنفضل نساند زمايلنا المقيدين فى أفريقيا لتحقيق لقب دورى الأبطال والتأهل لكأس العالم.