أمير مرتضى يرد على تأسيسه شركة لإدارة صفقات الزمالك

رد أمير مرتضى منصور نجل مرتضى منصور رئيس نادى الزمالك على الأنباء التى ترددت حول تأسيسه شركة تسويق رياضى لإدارة صفقات الزمالك فى بيان رسمى تضمن 6 نقاط هامة .
وجاء نص بيان أمير مرتضى منصور الذى نشره على صفحته الرسمية بموقع التواصل الاجتماعى فيس بوك على النحو التالى :-
فى خبر انتشر فى الفترة الأخيرة إنى أسست شركة تسويق رياضى لإدارة الصفقات فى نادى الزمالك مع كابتن إسماعيل يوسف ومع شريف إسلام مدير التعاقدات الجديد بنادى الزمالك لذلك لزم التوضيح:
1- لا توجد أى شركات بأسمى سواء فى مجال التسويق الرياضى أو فى أى مجال تانى ربنا خلقه ده غير إن القانون بيمنع أصلاً إن يكون فى أى علاقة تجارية بين أى مسئول وأى حد من قرايبه للدرجة الأولى.
2-اللى ورا الخبر ده موظف فى النادى ومسئول سابق وكام سمسار لاعيبة مضايقهم إن امير بيضيع عليهم عمولات وبيوفروا للنادى ملايين، اللاعب و المدرب أصبح الزمالك بيتعاقد معاه بأجره الحقيقى من غير أى عمولات وده سبب إنى بسافر كل حتة علشان اتفاوض بنفسى لأن لو النادى فوض سمسار هيكون مصلحته إن قيمة العقد تكبر علشان يستفيد.
3-الغرض من الخبر ده هو إبعادى عن النادى بشكل عام و الصفقات بشكل خاص و اللعب على عقلية رئيس النادى (والدى) اللى أول ما هيقرا خبر زى ده هيبطل يكلفنى بأى ملف يخص النادى و هيقولى ابعد أنت يا أمير إحنا مش مستفيدين حاجة غير الشتيمة والأخبار الكاذبة دى وبالتالى يغلوا أسعار اللاعيبة على النادى والمصالح تشتغل.
4-اللى يفرق معايا هو جمهور الزمالك أنا ولا بشتغل علشان اتصيت إعلامياً ولا علشان طمعان فى مركز فى النادى، ولازم الجمهور يعرف مين اللى بيحب النادى بجد ومين اللى بيهجص.
5- أنا لو ربنا كان كاتبلى إنى أكمل فى الكرة وألعب فى الزمالك أقسم بالله كنت لعبت ببلاش طول عمرى مش إنى أعمل شركة وأستفيد من النادى.
6-واضح إن السكوت و الاختفاء بيدى فرصة لناس فاسدين إنها تخطط و تفكر .. على العموم إن الفترة الجاية مش هسكت و هفضح أى حد بيحاول يأذى النادى وعلى فكرة أنا مش بتاع ‫انتخابات،‬ أنا اصلاً بتاع ‫مدرجات‬ وأى حاجة كويسة عملتها للنادى متجيش 1٪ من اللى عندى لكن أنا بحترم نفسى و بحاول أساعد من بعيد .. قريب هتكلم علشان الناس تفهم مين اللى بيحب الكيان ومين اللى بيتشعبط فيه لمصالح شخصية.
أخبار متعلقة
- الزمالك يتوصل لاتفاق مع المقاصة لضم وحيد وميدو ودونجا
- الزمالك يزاحم الأهلى فى صفقة دونجا ب"9" ملايين جنيه