بعد انتقال عمر جابر إلى الدورى السويسرى..المصريون يقتحمون صفحة بازل ويفرضون مطالبهم:إياكم الواد يزعل.. عمر بيحب الملوخية.. اوعوا تضحكوا عليه ببنت كده ولا كده..ويؤكدون: لو اتصاب هنبعت لكم عيد عبد الملك

انضم نادى بازل السويسرى لقائمة ضحايا المصريين على موقع التواصل الاجتماعى فيس بوك، إذ نفذ المصريين غزوة جديدة على صفحة النادى السويسرى بعد انضمام لاعب نادى الزمالك عمر جابر لصفوف بازل، مثلما فعلوا من قبل مع ناديى روما الذى يلعب فى صفوفه محمد صلاح، وأرسنال الذى يحترف فيه اللاعب محمد الننى.
واقتحم المصريون الصفحة الرسمية للنادى عبر موقع التواصل الاجتماعى فيس بوك، بعد خبر انضمام لاعب القلعة البيضاء لبازل، لتتحول الصفحة فى أيام قليلة هدفاً للتعليقات الساخرة.
التعليقات لم تخلُ من أسلوب التهديد بصورة مازحة، فهددوا نادى بازل باقتحامه فى حال عدم وجود جابر كلاعب أساسى ضمن صفوف الفريق، فقال أحدهم مازحاً "عُمر جابر يلعب كُل المباريات أساسى، وتخلوه يلعب كُل ركلات الجزاء ولو مجبهاش عادى فداه ويبقى man of الماتشات كُلها حتى لو بيلعب وحش، أنتوا معاكم ابن الزمالك مش أى حد"، وآخر قال "عمر جابر يلعب أساسى ولو فى ضربات جزاء أو حاجة هو اللى يشوطها، وتدولوا شارة الفريق.. إياكم الواد يزعل ولو اتصاب أو حاجة، هنبعتلكو أحمد عيد عبد الملك أظن الرسالة وصلت يا FC Basel 1893"، فيما طالب آخر من بازل "اوعوا تضحكوا عليه ببنت كده ولا كده علشان يقعد معاكم الراجل محترم".
كما لم تخلُ التعليقات من تمنيات محبى وجمهور نادى الزمالك، بالتوفيق لعمر جابر فى مسيرته الاحترافية، متوقعين له مستقبل كبير وباهر فى الدورى الأوروبى، فقال أحدهم "خلو بالكو من الواد وخلونا نختلط مع أخواتنا السويسريين بلاش حركات فصل المصريين عن الأجانب دى إحنا مش غرب يعنى إحنا أصحاب مكان من أيام صلاح"، وآخر قال "أنا أهلاوى بس عمر جابر لو ملعبش أساسى إحنا الأهلاوية والزمالكوية هانزعلكم بجد"، وآخر قال "خلوا بالكوا من عمر إحنا عندنا جيش 100 عقبة ممكن يقفلكوا الصفحة ف 6 ساعات"، ومدون كتب "ربنا يوفقك يا كابتن وإن شاء الله السنة الجاية نشوفك بتلعب فى برشلونة".
فيما رصد محمد ياسر، اللائحة الرسمية لانضمام لاعبين مصريين لفريق أوروبى وقال:
1.عمر جابر يتجبلو عربية جديدة وخلوه.. يلف سويسرا شارع شارع عايزين الواد ينبسط
2.عمر بيحب الملوخية عندكوا ملوخية؟.. لازم الواد ياكل بردو
3.عمر يبقى معاه شارة الكابتن الولا شخصيته حلوة وعايزينه يتأقلم مع الفريق بسرعة.
4.يلعب كل ضربات الجزاء ولوضيع فداه عادى مابو صلاح كان ظابتكو أجوان آه المشكل ولو جاب ياخد مكافأة مالية كبيرة عايزين الولد روحه المعنوية تزيد.
5.صورته تبقى الكفر بتاع الصفحة والد يبقى الوجهة بتاعت النادى
6.لازم الولد اكله وشربه ونومته ببلاش ومصاريفه الشخصية ومصاريف المدارس للأولاد والذى منه عشان يبقى مرتاح نفسيا وميشلش هم الفلوس.
7. عمره للعيلة كلها عشان ربنا يباركله.
موضوعات متعلقة:
- عمر جابر ينضم لبازل عقب رحلة المنتخب بتنزانيا
- وكيل عمر جابر يكشف دور "الننى" فى احتراف نجم الزمالك ب"بازل" السويسرى