ثقافة المفاجيع

أول ما طلعت إشاعة محافظ الإسكندرية أنه عزم وزير الثقافة على أكله سمك ب40000 جنيه أنا قلت إنها كذبة كبيرة -مش علشان إنى اعرف محافظ الإسكندرية- وأعرف إنه راجل كويس وإنه مش بتاع السكة دى.. لا والله، أنا ماعرفوش ولا سمعت عنه لا خير ولا شر.. إنما أنا استنتجتها من نفسى والسبب أن أنا عندى قناعة إن فى مؤسساتنا كوكبة من الخبراء فى مجال تستيف الفواتير، وفى ضبط الشيء لزوم الشيء ومش معقول يقعون فى غلطة بالتفاهة دى.
المهم النهاردة جات قدامى على فيس بوك صورة الفاتورة الأصلية للعزومة، وزى ما توقعت طلعت اقل من الرقم اللى الناس تداولته قبل كده بكتير.. حوالى 16 ألف لعدد 90 فردًا، المهم الحمد لله إن الأمور اتضحت بس أنا قلت انتهزها فرصة وأوزع بعض النصايح على ناسنا الحلوين:
طبعًا النصيحة الأولى اللى بتتبادر على دماغى إنى أقولها للناس اللى بتطلع الإشاعات دى، أقولهم: اتكنوا شوية، واتهدوا ربنا يهدكم.. البلد مش ناقصة.
النصيحة التانية اللى أقولها لأحبابى وأصدقائي وجيراني، إنهم ما ينقادوش لمثل تلك الإشاعات واهدوا شوية.. ومش على طول لايك وشير.. من فضلكم مطلوب إعمال العقل فى اللى بتسمعه، وفي اللى بتشوفه أكتر من كده شويتين.
النصيحة الأخيرة أو تقدر تقول السؤال الأخير اللى بوجهه للسادة المسئولين فى بلدنا فى جميع الوزارات والهيئات: هو ما ينفعش الزيارات دى من غير غدا؟ طيب لجنة تفتيش رايحة تفتش تتغدى ليه؟. لجنة تقييم رايحة تقيم تتغدا ليه؟. لجنة معاينة رايحة تعاين، تتغدا ليه؟ وزير رايح.. غفير جاى.. لازم غدا.. مش فاهم إيه ثقافة المفاجيع اللى الواحد ماشفهاش فى أى دوله متحضرة..
فى أمريكا أما كانوا بيعملونا حفلة شواء كانوا بيلموا مننا تمن الأكل تانى يوم.. فى الإمارات تروح لأى مسئول ماتلاقيش حتى كوباية الشاى.. بالكتير ممكن تلاقى كوستبان القهوة العربى.. يا دوب يكفى شفطة.. رغم إنهم شعب مشهود ليه بالكرم.. من الآخر أنا أعرف إن اللى عايز يبقى كريم، يبقى كريم من جيبه.. ومن حر ماله.. إنما دى أموال الدولة ووقت الدولة.. وإذا كنت من أصحاب مدرسة اللى ما أكلتوش فى بيتك هتاكله فى الشغل يبقى أحسن لك تروح.
معلش كلمتين واقفين فى الزور من زمان واهوا جه وقتهم.. اقوعدوا بالعافية