أولادنا بالخارج ونظام الترمين.. المقيمون بالسعودية يطالبون بتطبيق الفصلين الدراسيين.. طالب لوزير التعليم: اعتبرنا زى ولادك.. وآخر: أنا فى خامسة وحاسس إنى فى ثانوى.. رنا محمد: نظام الترم دونت ميكس

يعانى الطلاب المصريون المقيمين بالسعودية، من نظام "الترم الواحد" المعمول به فى الامتحانات، حيث يمتحنون كتابين فى كل مادة مرة واحدة فى امتحان واحد ما يزيد من عدم تحصيلهم الدرجات المرجوة، مطالبين بسرعة تطبيق نظام الفصلين الدراسيين لامتحانات المصريين فى الخارج، وهو ما يعرف بنظام "الترمين" على طلاب النقل بجميع المراحل فى كافة القنصليات والسفارات التى يختبر بها الطلاب، كما طالبوا بتوفير مدارس "مسار" تدرس المنهج المصرى بأسعار رخيصة، بعد شكاوى أولياء الأمور من ارتفاع تكاليف المصاريف بمدارس السعودية ل16 ألف ريال للطالب الواحد سنوياً.
وناشد أولياء الأمور وأولادهم المسئولين ببلدهم مصر، لاسيما وزير التربية والتعليم للحصول على حقهم المسلوب، بمساواتهم بزملائهم الطلاب بمصر وذلك بتطبيق نظام الفصلين الدراسيين "الترمين"، وأرسل الطلاب استغاثاتهم عبر فيديوهات ل"اليوم السابع، الأمر الذى عزم الموقع الإليكترونى بتبنيه دعما لأبنائنا فى الخارج حتى تحقيقه.
وفى وسيلة منه للحصول على حقه فى التعليم الذى يستطيع التفوق من خلاله، قال أحد الطلاب المقيمين بالسعودية: "أنا عاوز أتكلم فى مشكلة الترمين اللى بيعانى منها كل المتغربين.. إحنا بنمتحن هنا كتابين والطلاب فى مصر بيمتحنوا كتاب واحد، واحنا بنطالب بالتساوى معاهم إحنا برده مصريين ودى أبسط حقوقنا لأن ده ضغط علينا وعلى أهلنا إحنا بنطالب بنظام الترمين.. وشكرا.
ووجه طالب آخر، رسالة إلى وزير التربية والتعليم، قائلا: "بسم الله الرحمن الرحيم.. السيد وزير التربية والتعليم.. لحظة لو سمحت عاوز أشاركم فى المشكلة اللى بعانى منها أنا وكل زملائى المغتربين من ساعة ما جينا وأهلنا السعودية.. أنا فى ضغط وتعب، وبصراحة كده كرهت التعليم خالص، كل يوم أنام معيط بسبب الواجبات الكتير وبسبب ضيق الوقت، وإن الترمين مضغوطين فى ترم واحد وكتب الوزارة ضغط كبير جدا، لأنها مش معانا أصلا، ازاى أذاكر ترمين فى ترم، ومفيش كتب، ولو اتصرفت وجبت كتب قديمة، ألاقى دروس كتيرة ملغية، وأنا فى الصف الخامس وحاسس إنى فى الثانوية العامة أو فى الكلية هو أنا مليش حق ألعب.. ألعب أمته أنا فى ضغط كبير جدا أنا باشكر حضرتك يا وزير التربية والتعليم، وأرجو الاهتمام بموضوع الترمين، عاوزين نمتحن على ترمين زى كل المصريين.
والتقطت خيط الحديث أخته الصغيرة، والتى بدأت حديثها ب"السلام عليكم ورحمة الله وبركات"، دخلت بعدها فى صلب الموضوع، حيث قالت: "وأنا نفس المشكلة برده، حمل كتير على الصغيرين وحمل كبير على الكبار برده، ازاى يدوا عيل فى الصف الخامس عربى.. حساب.. إنجليش، فى الكتب كلها فى وقت واحد، يعنى يفضل يذاكر طول السنة عشان ينجح، العيل مخه "اتفنجر" بسبب نظام الترم الواحد ده، وطالبت بتطبيق نظام الترمين تخفيفا عليها وعلى زملائها المتغربين.
وفى السياق ذاته، قص آسر السعدنى، طالب بالصف الثالث الابتدائى، حكايته مع نظام الترم الواحد، قائلا: "أنا بادرس المنهج المصرى، أنا عندى مشكلة بتواجهنى أنا وكل أصحابى وهى إن إحنا بنذاكر الترمين مع بعض، وده بيسبب صعوبة فى المذاكرة، فأنا بأتمنى من وزير التربية والتعليم إنه يعتبرنا زى ولاده ويخلينا نمتحن كل ترم على حده.. وشكرا.
وتابعت رنا محمد الحديث فى مشكلة الترم الواحد، حيث قالت أنا بواجه مشكلة الترم الواحد، بذاكر كتب الترم التانى مع الترم الأول، مجهود صعب جدا إنى أذاكر كتاب من ده وكتاب من ده، ممسكة بكتابين ضخمين فى يديها، ليلة الامتحان، يعنى الكتابين دول كده "دونت ميكس"، طبعا نضيف للكتب دى كتب الماس والساينس والدراسات، كل ده محتاج فهم ووقت، أنا مش عاوزة أنجح وخلاص أنا عاوزة أجيب مجموع عالى، لأنى طول عمرى متفوقة لغاية ما جيت هنا، أصبح الأمر صعب جدا والضغط كبير قوى، عليا 10 وحدات فى العربى غير النحو والتعبير لازم احفظ كل ده، بحس بتفرقة بينى وبين الطلاب فى مصر وعاوزة أتساوى معاهم وده بتطبيق نظام الترمين.. بناشد كل مسئول وكل مصرى إنه يقف جنبا ويدعمنا، ونحصل على أبسط حقوقنا.