بالفيديو.."الرئيس فى قلب الكنيسة"..السيسى يهنئ الأقباط ب"عيد الميلاد" ويوصى المصريين ب"الاتحاد"..ويعتذر عن تأخر ترميم الكنائس المحترقة.. والمشاركون يهتفون: يحيا الرئيس.. والسيسى يرد: تحيا مصر بشعبها

هنأ الرئيس عبد الفتاح السيسى، الأقباط خلال كلمته بالكاتدرائية المرقسية بالعباسية، فى الاحتفال بأعياد الميلاد المجيد، قائلاً: "كل سنة وانتو طيبين، وأنا مش عاوز أعطلكم عشان قداسة البابا ميزعلش، اسمحولى اقولكم كلمتين.. فى البداية بوجهلكم جميعا التحية والتقدير والاحترام، واسمحولى إنى اهنيكم، كل عام وانتم بخير.. كلنا بخير".
وأضاف الرئيس السيسى، الذى زار الكاتدرائية مساء اليوم الأربعاء، :"السنة اللى فاتت قلنا عايزين نحب بعضنا بجد، ونحترم بعضنا بجد، يا رب نعرف نحب بعضنا بجد، وكل سنة وانتو طيبين"، وقال رداً على الهتافات المحبة له داخل الكاتدرائية :"احنا بنحبكم جدا".
وأوصى المصريين بعدم الاختلاف أو السماح لأحد بإحداث الوقيعة بينهم، قائلا:"عاوز أوصيكم وأوصى كل المصريين :"بالمناسبة دى.. من فضلكم توقفوا أمام كلامى جيدا..ماحدش أبدا يقدر يفرق بينا..الموضوع دا مهم أوى، ومش أنا أعمله بس، دا نعمله كلنا، وكلنا لازم نرجع مش زى زمان، أكتر، احنا مع بعض.. يا رب يديم الحب.. عاوز أوصيكم وأوصى نفسى وأوصى كل الموجودين هنا، ما فيش حاجة تؤذينا، لا ظروف اقتصادية ولا حتى سياسية، ولا أى حاجة، أى حاجة ممكن نقدر عليها إلا إن احنا نختلف، وعاوز أقو لكم ان ربنا سبحانه وتعالى سننه فى الوجود التنوع والاختلاف، مفيش حاجة واحدة غيره هو، لكن ربنا سبحانه وتعالى خلقنا مختلفين أديان.. أشكال.. ألوان.. لغات.. عادات.. تقاليد.. كل حاجة".
واستطرد:" محدش قدر ولا هيقدر يخلى الناس حاجة واحدة، محدش هيقدر ده"، مردفاً :"كل سنة وانتو طيبين.. كل سنة وانتو طيبين".
وأضاف رئيس الجمهورية:" لأن احنا فى مصر، اللى علمت على مدار آلاف السنين البشرية الحضارة، بتعلم دلوقتى وتقول للناس تعالوا.. انتو بتعملوا ايه، وبتقول للدنيا كلها، وعقبال الدنيا كلها تسمعنا، وبعدين تعرف اللى بتسمعه مننا، وبعدين تنفذاللى عرفته مننا، وبعدها تحول لعادات وتقاليد ياخد سنين طويلة".
وتابع :"مفيش حاجة وحدة غيره هو .. لكن ربنا خلقنا مختلفين أديان وأشكال وألوان ولغات وعادات وتقاليد كل حاجة ..محدش يقدر يخلى الناس وأنا قلت الكلام ده قبل كدا .. لا أحد قدر قبل كده ولا هيقدر بعد كده يخلى الناس حاجة وحدة .. محدش هيقدر ده .. مش أنا بقول محدش يقدر يعمله".
وكشف الرئيس عن لقائه بأحد المفكرين، قائلا:" كنت بتكلم مع أحد المفكرين منذ أيام بقوله من فضلك احنا عاوزين نعمل كتاب أو كتب تعلم الناس ان الدنيا مش زى بعضها من أول أولادنا فى المدرسة الصغيرين لحد اللى فى الجامعة نقولهم مش زى بعضنا ونقبل ده ومش يقبلوا بس يقبلوا بحب لأن ربنا خلقنا كده.. دى وحدة".
وأكمل السيسى حديثه:"والنقطة التانية اللى عاوز اقولهالكم اننا عملنا ده علشان ندى المثل والنموذج للمحبة الحقيقة بين الناس وبعضها البعض ومفيش حاجة تألمنا وتعذبنا أبداً .. دى نقطة تانية .. تحيا مصر بيكم تحيا مصر بيكم".
واعتذر الرئيس عن تأخر ترميم الكنائس المحترقة، بقوله:" خلو بالكم احنا اتأخرنا عليكم فى ترميم وإصلاح اللى تم إحراقه اتأخرنا.. ان شاء الله السنة دى كل اللى اتأخر قداسة البابا هيكون متصلح.. واسمحولى أقولكم يا ريت تقبلوا اعتذارنا فى اللى حصل ده .. يا ريت تقبلوا اعتذارنا فى اللى حصل، إن شاء الله إن كان لينا نصيب من أهل الدنيا السنة الجاية ما يكونش فيه بيت واحد ولا كنيسة وحدة من كنائسكم الا لما يكون رجعناها".
وتابع:"خلوا بالكم ده مش تفضل مننا.. ده حق واحنا مش هننسى أبداً ليكم ولا قداسة البابا الموقف الوطنى المشرف العظيم اللى اتعمل خلال الفترة دى.. أنا بشكرك يا قداسة البابا وبشكركم كلكم ..مرة تانية كل سنة وانتم طيبين وعيد سعيد عليكم وعيد سعيد علينا كلنا.. وإن شاء الله السنة الاجية تبقا خير وسلام وأمن واستقرار بينا كلنا .. وفى الأخر تحيا مصر بينا كلنا.. تحيا مصر بينا كلنا .. تحيا مصر بينا كلنا ".
وختم الرئيس كلمته، ب" تحيا مصر تحيا مصر تحيا مصر.. تحيا بأهل مصر مش بالسيسى.. تحيا مصر بأهل مصر كلها".