قراء "اليوم السابع" يقدمون حلول لوقف خسائر المترو.. ويقترحون: زيادة سعر التذكرة حسب عدد المحطات.. وتطبيق الكارت الذكى.. وطباعة إعلانات مدفوعة الأجر على التذاكر.. وتشديد الرقابة على البوابات

استمرارًا لتفاعل قراء "اليوم السابع"، مع الخدمة التى أطلقها الموقع تحت عنوان "صحافة المواطن"، للمساهمة فى تحرير المواد الصحفية، وتوثيقها بالصور والفيديو، شارك اليوم السابع القراء فى إستطلاع لحل مشكلة تذكرة مترو الأنفاق والتى أثارت الجدل خلال الفترة الماضية حول تطبيق سعرها من قبل الحكومة المصرية، حيث أكدت وزارة النقل أن تذكرة المترو التى تباع بجنيه واحد تكلف الشركة فعليا 5 جنيهات، وأن خسائر شركة المترو نتيجة الفرق فى قيمة التذكرة تبلغ 20.5 مليون جنيه كل شهر وبالتى هناك مشاورات لزيادة سعر التذكرة لوقف هذه الخسائر واستخدام الإيراد فى تحسين الخدمة.
وبناء على ذلك استقبل "اليوم السابع" العديد من المقترحات والأفكار من قبل القراء ما بين مؤيد ومعارض للفكرة.. ونرصدها فى التقرير التالى.
قال سامى حمزة، "عندى فكرة اعلانات على التذكرة والاستغلال الأمثل لكل المساحات بجوار محطات المترو، وكمان وضع اعلانات على المداخل الكبرى للمترو باشكال كبيرة"، فيما قال فتيح محمد، "طباعة اعلانات مدفوعة على التذكرة، واستغلال كل شبر فى محطات المترو كمنصات إعلانية"، فيما أيد مواطن يدعى هانى نادر قرار الحكومة بزيادة أسعار تذاكر المترو، قائلا "يا جدعان تذكرة المترو عندنا تعتبر ببلاش روحو شوفو تذكرة المترو بكام فى الدول الاوروبية لازم يغلو التذكرة شوية ويكون بالمعقول"، وقال أخر " ثمن تذكره المترو على عدد المحطات أو عدد الكيلو مترات".
فيما قال محمد سامح محمد إبراهيم، "هو ليها حل، احنا نلغى التذاكر تماما ونعمل بكروت ذكية تتشحن، وتخصم من الرصيد على قد المحطات الى انت راكبها، يعنى مثلا ركبت 5 محطات جنيه، 10 محطات 1.5، 15 محطه 2 جنيه وهكذا، ونعمل مناقصة للشركات لطبع هذه الكروت ويبقى ليك نسبة فى الشحن من شركات الشحن ويبقي انت كدة الحكومة مكلفتش حاجة وممكن تزود دخلها من خلال الاعلانات فى المترو وداخل عربات المترو بوضع شاشات داخل العربات للإعلان بجانب تأجير محلات للإنشطة التجارية وممكن نعمل مينى مول خاص بهيئه المترو" .
فيما عرض مواطن أخر يدعى، محمد سمير زيدان، حلا قائلا "الموضوع بسيط، نعمل تذكرة ذكية حسب طلب المواطن، يعنى نعمل تذكره بأسبوع كامل وتذكرة بأسبوعين وتذكرة بشهر ويتم التغير بعد ميعاد انتهاء التذكرة حتوفر لينا فى كل حاجه حتى الورق حنوفر فيه كتير، الأفكار كتير بس اللى ينفذ فين"، فيما شدد اخر على مراقبة البوابات قائلا "أعمل رقابة صح على بوابات الدخول والخروج هتلاقى مبيعات التذاكر هتزيد 100% لأن نص الناس مش بتقطع تذاكر".
فيما عرض أحد المواطنين ويدعى حسين السيسى، أحد الأفكار، قائلا "المترو بيرتاده يوميا اكتر من 3 مليون مواطن، لكن خلينى اطاوع الحكومة لما نشوف اخرتها، نبدأ بالاعلانات وخاصة الشاشات الالكترونية وده لو مش هبالغ هيجيب ملايين، الحاجة التانية خدمات الشركات العالمية زى فودافون وموبينيل واتصالات وغيرها اللى ممكن تتقدم فى المحطات المختلفة وتكون عنوان سهل للناس ودى برده هتدخل ملايين، فكرة المصرى اللى بتطبق دلوقتى فى الامارات عن طريق الاعلان على تذاكر المترو لازم تطبق، العدالة الاجتماعية فى اجور العاملين بمترو الانفاق ودى محتاجة شفافية فى مرتبات رئيس الهيئة وخلافه، العالم اللى بتاخد مئات الالوف ومبيعملوش أى حاجة، وإضافة ماكينات ATM للمحطات وتحصيل رسوم من البنوك عليها"، بينما قال أخر "ما تخلوها 2 ج وتخلصونا بقى هاتو من الاخر هى جت على تذكرة المترو".
وأضاف أحد القراء" واى فاى على المحطات وداخل القطارات، وزياده متدرجة نصف جنيه سنويا، والعمل بالنظام القديم المراحل، مش اللى راكب محطة زى اللى راكب عشره، واستغلال اقتصادى لكل مساحة غير مستغلة من المحطات، وجذب الاعلانات، ممكن المترو يتحول للربحية بس انتو اسمعوا للناس، ولما تعملوا زيادة متدرجة علي سنوات تعلنوا الخطوه مسبقا عشان الناس تبقى عارفة مواعيد الزيادة مسبقا، حسسونا أنكم بتخططوا".
وقال أخر "بجانب البارتشنات اللى اتعملت وفكرة الدعاية والاعلان، ممكن نعمل فى كل محطة مكان متوسط فى الاركان الفاضية يبقى فيها تقديم مشروبات سخن وساقع للركاب، واللى مستنى حد، واللى مش عايز يركب فى الزحمة، ولواحد ومراته رايحين مشوار صدقونى الموضوع هيختلف"، فيما شارك مواطن أخر بفكرة قائلا "الاعلانات على تذكرة المترو من الخلف هوه اكيد هيغطى الخسائر، وهيرحم الشعب المصرى من زيادة سعر التذكرة".
فيما قال مجدى البنا، "عربة مميزة فى كل قطار بعشرة جنيه، وقطار مميز فى تمام الساعة بتذكرة عشرة جنيهات تحجز بنظام القطار برقم المقعد"، بينما قال أحد القراء، "عمل مناقصات لشركات الدعاية لشراء حق الاعلانات، وطباعة الاعلانات على ظهر التذكرة وكل تذكرة يكون لها رقم كودى ويتم عمل مسابقات اسبوعية وشهرية على ارقام التذاكر ويوضع لها جوائز قيمة كركوب المترو لمدة سنة مجانا"، فيما شارك مواطن أخر بفكرة قائلا "ممكن زيادة خمسون قرش، وممكن كمان طرح فكرة الاعلان بتجيب دخل، بالاضافه لفكره 2 جنيه لعدد 2 مسار شبرا وحلوان و1جنيه مسار واحد، هيبقى معقول".
وعرض محمد فاروق أفكار متعددة قائلا، "شغلوا التلفزيونات بعد تطويرها ويبقى عليها اعلانات مدفوعة، ركبوا لوحات الكترونية متحركة داخل المترو للاعلانات، اعملوا زى اسواق صغيرة متطورة داخل كل محطه بدل اللى بيلفوا، اعملوا دورات مياه داخل كل محطة وبرسوم رمزية، فى كتير بس انتوا مش عايزين"، فيما قال أخر "ترفع إلى 3 جنيهات لأن التوكتك أقل أجره 5 جنيه واللى مش عاجبه مايركبش".
فيما قالت سهر العمر، "بعد إيه ما خلاص فكرة الشاب المصرى الخاصة بعمل دعاية على تذكرة المترو طارت للامارات، وإللى تصدت لها بمصر استاذ روتين طيب، والله خطرت على بالى فكرة تصدير أفكارنا للخارج ادام الحكومه بتضرب ابتكارات المصريين بعرض الحائط، والبركه باستاذ الاساتذه روتين باشا مدعوما من اصحاب العقول الكلاسيكية"، فيما قال أخر "إيه المشكلة فى زيادة التذكرة جنيه بس يكون فى خدمة أفضل".
شاركونا فى تحرير المواد الصحفية بإرسال الصور والفيديوهات والأخبار الموثقة لنشرها بالموقع والجريدة المطبوعة،ليتم نشر الأخبار المصورة والفيديوهات بإسم القراء، عبر البريد الإلكترونى send@youm7.com، أو عبر رسائل "فيس بوك"، على أن تُنْشَر الأخبار المُصَوَّرَة والفيديوهات باسم القُرّاء.