الكعب العالى من الأنوثة للمحسوبية

الكعب العالى كان زمان رمز الأنوثة لكن دلوقتى رمز للمحسوبية
أيوة أصل أنا كعبى عالى عليه؟؟؟
بقينا بنسمعها كتير فى حياتنا اليومية. أصل أنا ابن مدير البنك فمحدش يقدر يكلمنى علشان أنا كعبى عالى فى البنك. وأنا بقى أبويا عميد الكلية وكل الناس عرفانى فى حد يقدر يقولى ورينى الكارنيه بتاعك ولا متدخلش بالعربية أصل أنا كعبى عالى. ويا سلام بقى لو أبويا محافظ ولا وزير ده بقى ممكن يعمل أى حاجة براحته خالص ومحدش هيقدر يقوله أنت بتعمل إيه. لأن الرد ساعتها أنت عارف أنا ابويا يبقى مين وبتخلص على آسفين يا باشا.
فعلا خلاص بقت ماشية بالواسطة والمحسوبية وأنا ابن مين وأبويا يبقى مين فى البلد دى.
طبعا مش كل الناس كدة فى ناس محترمة فوق الوصف بس بنتكلم على جزء منهم
أنت بقى أبوك إيه فى البلد.. مش حد مهم
طيب بالنسبة للعيلة إيه أخبارها لا باردو
يبقى الحق اعمل حاجة لنفسك اتصرف ناسب حد من الناس دى أو أقولك اعتمد على نفسك ادخل كليه اقتصاد وعلوم سياسية يمكن مين عالم نشوفك سفير كدة ولا حاجة أو نشوفك قاعد على القهوة مع باقى الشلة مش لاقى شغل وساعاتها بقى هتبقى فلاتة يعنى معندكش كعب . علشان اللى عنده كعب عالى أول ما بيتخرج بيشتغل لا ده وهو بيدرس كمان. لكن أنت حتى لو مجموعك أعلى منه هتقعد على القهوة.
آه يا بلد ماشية بالكعب وإحنا فيكى يا دوب فلاتة.
بس أرجع وأقولك حاجة أنت لو عايز توصل هتوصل حتى لو حافى