ريهام سعيد تُهاجم "إيمان الحصرى" بعد غلق الهاتف ب"90 دقيقة": حسن راتب اللى اتكلمتى عنه باستهزاء هو اللى عملنى.. ول"فتاة المول": "أقسم بالله أنا سترت عليكى" وأخلاقى وشرفى منعونى أقول مين بعتلى صورك

نشبت مشادة كلامية بين الإعلامية ريهام سعيد، والإعلامية إيمان الحصرى مقدمة برنامج 90 دقيقة، على الهواء بفضائية المحور، لرد الأولى على الاتهام الذى وجهته لها سمية عبيد - الفتاة التى تم التحرش بها فى مول الحرية بمصر الجديدة - خلال برنامج 90 دقيقة، بأن فريق إعداد برنامج "صبايا الخير"، قام بسرقة صورها من على تليفونها وعرضها دون إذن منها، وهو ما تسبب لها فى أضرار نفسية ومعنوية فاقت تعرضها للتحرش.
وبدأت الإعلامية ريهام سعيد، مقدمة برنامج "صبايا الخير"، حديثها بتجاهل إيمان الحصرى موجهة حديثها لها قائلة: "أنا معرفش إنتى مين أصلاً، ولا اسمك ايه وأنا بتصل عشان الدكتور حسن راتب"، فردت الإعلامية إيمان الحصرى عليها قائلة: "لما ماتعرفيش انا اسمى إيه بتتصلى ليه بالبرنامج؟، إحنا طلبناكى لحق الرد لأننا برنامج محترم ومش لازم تعرفى اسمى"، فردت عليها ريهام سعيد قائلة: "انا أتكلم زى ما أنا عايزة وأنتى تسمعنى غصب عنك"، فطالبت إيمان الحصرى، فريق إعدادها بإنهاء المداخلة مع ريهام سعيد.
وبدأت المشادة بعد اتهام سمية عبيد، الفتاة المتحرش بها بأحد المولات بمصر الجديدة، فريق إعداد برنامج ريهام سعيد بالحصول على صور وفيديوهات من الهاتف الخاص بها، دون علمها، مضيفة: "موبايلى كان هيفصل شحن، فقولت لحد من الانتاج يشحنه لأنى محتاجاه عشان أطمن أمى عليا، وبعدها فوجئت بأن الإعلامية ريهام سعيد تهاجمنى بشكل غريب، لأن الصورة مكنتش موجودة فى العالم غير موبايلى واتاخد كوبى منها".
ريهام سعيد ل"فتاة المول":واجبى وأخلاقى وشرفى منعونى أقول مين بعتلى صورك
وعلَّقت الإعلامية ريهام سعيد، على الهجوم عليها بعد لقائها بسمية عبيد، الفتاة المتحرش بها بأحد المولات بمصر الجديدة، واتهام الفتاة لفريق إعداد برنامج "صبايا الخير" بسرقة صورها وإذاعتها بدون إذنها، عبر برنامج "90 دقيقة".
وقالت ريهام سعيد خلال تقديمها برنامج "صبايا الخير"، على فضائية "النهار": "الناس دى ساعات بحس إنها شوية غبية لأنها بتزودنا مش بتنقصنا"، مشيرة إلى أنها ترددت فى الحديث عن الموضوع وعدم الرد، إلا أنها تعجبت من رد فعل الفتاة، والتى ادعت أنها رفضت إذاعة الحلقة، رغم أنه ما بين اللقاء والهواء دقيقة ونصف.
وأوضحت أنه عقب لقاء أمس تصافحا وضحكا، ولم تكن هناك أى مشكلة، نافية اتهام الفتاة لها بسرقة صور من هاتفها المحمول، قائلة: "متصورة والموبايل على رجليها وماسكة الموبايل لحد ما خرجت من الاستوديو".
وأشارت ريهام سعيد، إلى أن أكبر دليل على أن صور الفتاة لم تُسْرَق من هاتفها، قائلة :"انتى لو تعرفى أنا معايا إيه.. وأنا شفت إيه.. وأنا عرفت إيه، ماتجرؤيش تتكلمى على التليفزيون"، موضّحة أن ما منعها من تقديم بلاغ، والرد بالشكل الذى يرد لها اعتبارها، هو أنها أم لفتاة.
وذكرت أنها عندما عرضت صورة للفتاة ب"المايوه" فهى صورة عامة، كمثل أى فنانة، لافتة إلى أن الفتاة تضع صور لها على "فيس بوك" كما أن لها صورا على البحر، وهى فى سيارة بالشارع وأخرى على الرمال بالشاطئ.
وتابعت: "لما انتى عملتى كده وماكنتيش راضية عن ده.. دى كانت فى أوضة نومك، والصورة اللى حد شايلك فيها، لأنك بتضرى الشخص ده، ومش هقول هو مين، عشان واجبى المهنى وأخلاقى وشرفى وبنتى مش هقول مين اللى بعتلى وعندى إيه وعرفت إيه.. على جثتى، من إمبارح وأنا خافية تليفونى حفاظا عليكى.. ومش همسحهم وانتى بتقطعى فيَّا.. ولو حاجة واحدة طلعت الناس كلها هتعتذر لى أنا.. شيلوا ريهام سعيد من دماغكم واشتغلوا وبصوا قدامكم أفيد".
ريهام سعيد ل"فتاة المول": "أقسم بالله أنا سترت عليكى.. وهفضل أستر عليكى"
وعرضت الإعلامية ريهام سعيد، فيديو للفتاة المتحرش بها بأحد المولات بمصر الجديدة، سمية عبيد، قبل بدء لقائها أمس، وهى تحمل هاتفها المحمول، ردًا على اتهامها بسرقة صور لها من الهاتف، قائلة :"انا واقفة بضحك وراها وهى واقفة عادى خالص وماسكة الموبايل فى إيديها، ومحدش خد موبايلها".
وقالت ريهام سعيد: "أشخاص كثيرون يوسّعون فى بيوتهم ولديهم أموال كثيرة، ويكبرون فى أسمائهم وجاههم والشهرة، ولكن كلنا هيبقى مقاس قبورهم واحد، وهننزل فى متر فى متر.. وأنا بشيل هم اليوم ده.. وأقسم بالله أنا سترت عليكى.. وهفضل أستر عليكى.. ولو عملتى إيه هفضل ساترة عليكى".
وأضافت: "لو عاوزة تطلعى بطلة.. اطلعى بطلة زى ما انتى عاوزة.. ولو فى صور على موبايل أى واحدة ممكن يتسرق، تحبى أعرض الحاجات التانية اللى معايا تشوفى ممكن تبقى على موبايل ولا لا؟".
وقطعت ريهام سعيد كلامها، وتركت هاتفها على المنضدة بالاستوديو خلال شرح الموقف قائلة: "أنا مش هتكلم لأنى حلفت إنى مش هتكلم لأن عندى بنت.. انتى جميلة وحلوة والراجل تحرش بيكى.. وماقلتش أى حاجة امبارح على إنك وحشة، أنا قلت انتى مش منكسرة ومش بتحكى الحكاية وانتى مضايقة وشايفة إنك جريئة أوى.. وشايفة إنك أكيد عملتى غلط شجعه أنه يعمل كده".
ريهام سعيد لإيمان الحصرى: حسن راتب اللى اتكلمتى عنه باستهزاء هو اللى عملنى
وقالت الإعلامية ريهام سعيد، إن هناك بعض البرامج تركت الحديث عن الانتخابات اليوم، وتحدثت عنها، موضحة أنها أجرت مداخلة هاتفية على قناة المحور اليوم، قائلة: "كنت بتكلم على برنامج معرفش مين بتقدمه، بقالها 3 ساعات تقول الإعلام الحقير والإعلام المنحط وإعلامنا وإعلامها".
ووجهت ريهام سعيد رسالة شديدة اللهجة، للإعلامية إيمان الحصرى مقدمة برنامج "90 دقيقة"، على فضائية المحور، قائله إنها -أى ريهام- قليلاً ما تجرى مداخلات هاتفية، ولكنها فعلت ذلك من أجل الدكتور حسن راتب رئيس قنوات "المحور".
وأضافت ريهام سعيد: "قالت لى ابقى كلميه على تليفونه الشخصى هو مالوش دعوة، حتى لو هو مالوش دعوة كان لازم تتكلمى عليه باحترام أكتر من كده بكتير، لأن فى الآخر لما هتعملى انتى كارثة القضايا وكل حاجة هتترفع على الدكتور حسن راتب، فى الآخر المحور ليه دعوة ولا ملوش دعوة، واللى اتكلمتى عليه باستهزاء ده هو اللى عملنى وهو اللى خلانى ريهام سعيد، وهو اللى ادانى الفرصة، وهو اللى جالى مديرين كتير أوى قالوله دى ماتنفعش فقالهم تنفع".
وتابعت حديثها عن الدكتور حسن راتب مالك قنوات المحور: "هو اللى كتير أروح له وأنا صغيره بعيط لأن فلان مش راضى يطلعنى هو يقوله طلعوها البنت دى شاطرة هتطلع، استحمل حاجات زى الزفت مالهاش أى علاقة بأى حاجة عشان مقتنع جدًا بموهبتى وإنى هطلع، وتركت قناة المحور لحصولى على عرض جديد أفضل، والواحد لابد أن ينتقل من مكان لآخر لكى يكبر".
واستطردت: "بس مين اللى عمل ريهام سعيد.. الدكتور حسن راتب، مين اللى ادى فرصة لريهام سعيد هو، مين أصر إنها تظل على الشاشة، هو، مين لما طلعت حلقة عن الشذوذ بين بنتين والدنيا اتقلبت ماقعدتش والناس كانت عايزه توقفنى، هو، وطلعنى مع سيد على فى برنامجه وقتها وحارب هو، هو اللى علمنا يعنى إيه سيناء، وودانى العريش وأنا عندى 25 سنة، وقالى دى أغلى تربة فى الدنيا، وأغلى بلد فى الدنيا هى دى".
وأوضحت: "الشخص اللى انتى استهزأتى بيه شخص كبير جدًا عندى"، لافتة إلى أنه عندما يكبر الموضوع لن تضار هى، لأن طوال عمرها تتكلم بالحق، ودائما تراعى الله فى عملها، مستطردة: "أنا اتكلمت عشان بيتى -فى إشارة إلى المحور- اللى قاعدة تشتمينى فيه ليا فيه أكتر منك، بيتى اللى انتى قاعدة على الكرسى وبتقولى لازم تتحبس، والإعلام... أنا القناة دى أنا تعبت فيها أكتر منك، أنا فرشت مكاتب فيها أنا دربت مذيعين فيها، وأصغر مدير إنتاج فى القناة زى أخويا وأكلت وشربت معاه، يصعب عليا يقعوا فى خطأ مهنى ويصعب عليا هما اللى يقعدوا يقطعوا فيا".
ووجهت حديثها للإعلامية إيمان الحصرى: "أنا ماعرفكيش لأن حتى لو بتطلعى على الشاشة بقالك سنة أو سنة ونص، الناس دى بقالى 20 سنة أعرفهم، مش هكلم الدكتور حسن راتب على تليفونه الشخصى زى ما قولتيلى، لأنك اتكلمتى عليا على شاشته وعلى قناته اللى هى بفلوسه اللى هى بتاعته اللى انتى بتشتغلى عنده، ولما تتكلمى عليه اتكلمى عليه باحترام، أنا دلوقتى مش بدافع عن علاء الكحكى، أنا بدافع عن الدكتور حسن راتب، اللى بقالى 6 ساعات بتشتم على قناته، بس أنا مش زعلانه لأنى لو دخلت القناة عنده دلوقتى، 100 واحد هيشيلنى على دماغه من فوق، تانى وتالت ورابع".
وعن "فتاة المول" قالت ريهام سعيد: "أنا دلوقتى لما استضيف بنت عندى مين حط الموضوع ده فى الإعلام، هى البنت، لأنها طلعت فى كل القنوات وقالت عايزة حقى وطلعت مع وائل الإبراشى قبلينا وعلى العاصمة، والمحور، وجت عندى هنا، ومتصورة بكاميرات مدينة الإنتاج، ومعمول لها تصريح بدخول المدينة وقعدت معانا وكل ده مثبوت".
وقالت ريهام سعيد: "أنا قبل كده طلعت مع الجميلة أروى جودة، وناس كتير وكنت ببقى قاعدة كده وبيطلعوا صورة ليا، وفى صورة كنت قاعدة وحاطين شيشة على رجلى، عارفين الصورة دى بتطلع فى أى حتة، أى حد عايز يشتم فيا بيطلع الصورة دى، وببقى قاعدة فى برنامج لا ليا ولا عليا والصورة بتطلع، هو أنا مش بنى آدمه؟ هى دى مش صور شخصية؟ طيب انتى جيتى وبقيتى شخصية عامة والناس كلها عرفت إن اسمك سمية، ومن حقى لما انتى عرضتى نفسك قدام الناس كلها، يبقى من حقى أعرض صورة، أعرض كليب، أعرض أى حاجة أقول بها وجهة نظرى، طالما أنا مادخلتش وراكى الحمام انتى متصورة على البلاج، ومتصورة فى الشارع، يعنى فى ناس كتيرة شافتك، وانتى مش مكسوفة من الصور، دى أنا شايفة إن اللى بتعمليه دلوقتى هو اللى هيضرك جدًا لأن محدش خد حاجة من موبايلك، لأنك متعرفيش اتبعت لنا إيه وعرفنا إيه".