بالفيديو..مرتضى منصور: لو فى مشكلة بين ساويرس و"عبد الرحيم على" هنقعد نحلها

قال المستشار مرتضى منصور، إنه كان بصحبة رجل الأعمال نجيب ساويرس، منذ ساعة، لافتا إلى أن المهندس نجيب قال له: "اللى بينى وبين عبد الرحيم على سوء فهم، واسأل عبد الرحيم احترامى له وتقديرى له.. أنا وهو كنا فى معركة واحدة مع بعض ضد الإخوان، وشوف أنا مختلف مع الراجل ده دلوقتى، وأقسم بالله عبد الرحيم عمل معركة مفيش حد عملها قبل 30 يونيو ضد الإخوان المسلمين".
وأضاف مرتضى منصور: "والله العظيم ده كلام نجيب ساويرس لى، ولم أراه منذ سنوات".
وأوضح منصور، خلال مداخلة هاتفيه مع الإعلامى أحمد موسى عبر برنامجه "على مسئوليتى" المذاع على فضائية صدى البلد، أنه "إذا كان فى مشلكة هنقعد نحلها لأننا كلنا فى مركب واحدة عايزين بلدنا تطلع وتنهض، والحمد لله الإرهاب الأسود اتقطعت رقبته بس لسه ديله، عايزين نكمل وعايزين الاستثمار فى بلدنا عايزين المستثمرين يرجعوا تانى، الناس حاسة بأمان، وكانت حالات الخطف فى عز الظهر".
وأضاف رئيس نادى الزمالك، أن نجله أحمد مرتضى والدكتور عبد الرحيم على من معسكر 30 يونيو، مؤكداً أن البرلمان القادم هو برلمان 30 يونيو، موجهاً رسالة للدكتور عمرو الشوبكى، المرشح بنفس الدائرة بجولة الإعادة بالدقى والعجوزة: "المجلس ده بتاع 30 يونيو وحضرتك قولت عليها انقلاب، عايز تبقى فى المجلس الانقلابى ليه، وحضرتك قولت فى أمريكا إن اللى حصل ضد مرسى انقلاب، بس إحنا انقلابنا ضد الفساد والبلطجة والفاشية والإعلان الدستورى".
وطالب مرتضى منصور، الدكتور عبد الرحيم على عضو مجلس النواب عن الدائرة، بحشد أنصاره للتصويت لصالح نجله أحمد مرتضى منصور، مضيفا: "عبد الرحيم أكد ذلك".
وتابع: "ليا عتاب على الأستاذ عمرو أديب، لأنى عندما تحدثت عن أموال الإمارات كنت أقصد شخص معين خد فلوس وسافر بها الإمارات والصين ورسيا، وكلامى واضح وحزين لأنه يريد أن يعمل وقيعة".