عايز تفهم نظام الانتخاب فى مجلس النواب الجاى؟..التصويت فى ورقتين إحداهما للقوائم والأخرى للفردى.. لازم تعرف عدد المقاعد الفردى فى دائرتك حتى لا تصوت لأكثر من مرشح فيبطل صوتك.. والمشاركة واجب مش رفاهية

عايز تفهم نظام الانتخاب فى مجلس النواب الجاى؟.. هذا الأمر ممكن ببساطة شديدة من خلال قراءة التحقيق التالى، والذى يتضمن معلومات تفصيلية حول عدد الدوائر الانتخابية وخطوات التصويت فى انتخابات مجلس النواب، كما أوردتها مصادر قانونية على مواقع التواصل.
هاحاول أبسط الموضوع خالص.. طلع ورقة وقلم واكتب ورايا. .مجلس النواب الجاى (اسمه كده فى الدستور.. مجلس النواب.. مش مجلس الشعب.. وطبعا مجلس الشورى اتلغى خلاص).. مكون من 567 عضوا متوزعين كالتالى..
420 عضوا ينتم انتخابهم فردى..
120 عضوا يتم انتخابهم بالقوائم ..
27 عضوا يعينهم رئيس الجمهورية ..
أولا : الفردى..
مصر تم تقسيمها إلى 237 دائرة للفردى.. لانتخاب ال 420 نائبا.. فيه دوائر هيتم فيها انتخاب عضو واحد.. ودوائر يتم فيها انتخاب عضوين.. ودوائر يتم فيها انتخاب 3 أعضاء.. حسب كثافة السكان فى كل دائرة.
مثال.. محافظة الإسكندرية اتقسمت ل 14 دائرة لانتخاب 25 نائبا فردى.. والدوائر هى..
منتزه أول (3 نواب) .. منتزه ثان (2) .. رمل أول (2) .. رمل ثان (2) .. سيدى جابر (2) .. باب شرقى (2) .. محرم بك (2) .. مينا البصل (2) .. الدخيلة (2) .. العامرية (2) .. كرموز (1) .. العطارين (1) .. الجمرك (1) .. برج العرب (1 ..
وهكذا فى كل محافظة باختلاف عدد النواب الفردى من محافظة لأخرى حسب عدد السكان.. والفردى فردى.. مفيش حاجة اسمها واحد فئات وواحد عمال زى زمان ..
ثانيا : القوائم ..
مصر اتقسمت إلى 4 دوائر كبار لانتخاب 120 نائبا بالقائمة.. دائرتين منهم هيتم انتخاب 15 نائبا لكل منها.. ودائرتين لانتخاب 45 نائبا لكل منها ..
45 + 45 + 15 + 15 = 120 نائبا
الدائرة الأولى (45 نائب) .. وتشمل القاهرة والقليوبية والدقهلية والمنوفية والغربية وكفر الشيخ ..
يعنى الحزب أو التحالف هينزل المحافظات دى كلها بنفس القائمة كدائرة واحدة.. مش الحزب أو التحالف ينزل فى كل محافظة منهم بقائمة.. والتصويت هيتم على نفس القائمة اللى فيها 45 اسما فى كل المحافظات دى ..
الدائرة الثانية (45 نائبا) .. وتشمل الجيزة والفيوم وبنى سويف والمنيا وأسيوط والوادى الجديد وسوهاج وقنا والأقصر وأسوان والبحر الأحمر ..
. الدائرة الثالثة (15 نائبا) .. وتشمل الشرقية ودمياط وبورسعيد والإسماعيلية والسويس وشمال سيناء وجنوب سيناء ..
الدائرة الرابعة (15 نائبا) .. وتشمل الإسكندرية والبحيرة ومطروح ..
طب القائمة بتتشكل ازاى؟؟ أقولكوا
أى حزب أو تحالف هينزل قائمة يبقى لازم يكون عدد الأسماء اللى فيها مطابق لعدد نواب الدائرة.. يعنى فى الدائرة الأولى والتانية القائمة يبقى فيها 45 اسما.. والثالثة والرابعة القائمة يكون فيها 15 اسما ..
ما تقلقش من كتر الأسماء لأن حضرتك هتعلم على اسم القائمة فى الاستمارة .. مش هتعلم على أسماء ..
يبقى ده أول شرط .. العدد الإجمالى .. الشرط التانى هو أن القائمة ال 15 لازم يكون فيها 7 سيدات.. أقل من كده لأ.. والقائمة ال 45 فى الدائرتين الكبار يكون فيها 21 سيدة.. أقل من كده لأ .. ممكن أكتر ..
الشرط الثالث أن فى كل قائمة لازم كل محافظة يبقى ليها عدد محدد من المرشحين حدده القانون.. يعنى مثلا القائمة اللى هاتتنافس فى الدائرة الرابعة.. أم 15 اسما.. لازم يكون منهم 7 من إسكندرية و 7 من البحيرة وواحد من مطروح.. قائمة الدائرة الأولى .. 45 اسما .. لازم منهم 14 من القاهرة و7 قليوبية و8 دقهلية و5 منوفية و 7 غربية و 4 كفر الشيخ .. وهكذا.
الشرط الرابع فى القائمة إنها لازم تحتوى على فئات محددة وبعدد محدد
1- مسيحيين ........... 3 أعضاء فى القائمة ال 15 .. و 9 فى القائمة ال 45
2- عمال وفلاحين ..... 2 أعضاء فى القائمة ال 15 .. و 6 فى القائمة ال 45
3- شباب (تحت 35) .. 2 أعضاء فى القائمة ال 15 .. و 6 فى القائمة ال 45
4- مصريين بالخارج .... عضو فى القائمة ال 15 .. و 3 فى القائمة ال 45
5- احتياجات خاصة ... عضو فى القائمة ال 15 .. و 3 فى القائيمة ال 45
وباقى القائمة متنوع .. أى حاجة ..
.
يعنى المواطن فى إسكندرية مثلا هايستلم الاستمارة هايختار فيها اسم أو اتنين أو ثلاثة مرشحين للفردى .. حسب دايرته .. وهايختار فيها اسم للقائمة أم 15 مقعدا .. والقوايم اللى بيختار منها دى هى هى اللى معروضة لسكان البحيرة ومطروح .. لأنهم دايرة واحدة قوائم .. أما الفردى يختلف من دايرة لدايرة ..
واضحة كده؟؟ تمام جدا .. فاضل حاجة واحدة بس علشان الصورة تكتمل.. دلوقتى لو قائمتين بيتنافسوا فى دايرة 15 مثلا .. وقائمة اخدت تلات ارباع الأصوات وقائمة أخدت الربع .. ال 15 مقعدا هايتقسموا بينهم إزاى؟؟
الإجابة .. مش هايتقسموا .. القايمة الكسبانة هاتاخد كل المقاعد ال 15 .. أو ال 45 لو فى الدايرتين الكبار .. ده نظام اسمه القائمة المطلقة .. المهم القائمة الكسبانة لازم تجيب لوحدها اكتر من نص عدد الأصوات .. ولو ماحصلتش بتحصل إعادة بين أعلى قايمتين من القوائم المرشحة ..
أصلهم لو اتقسموا ما بينهم .. واخدت أول 10 أسماء من الكسبانة مع أول 5 أسماء من الخسرانة مثلا .. كده الناس اللى أسماؤهم فى آخر القائمتين طلعوا بره .. لو كل قايمة حطتلى الشباب فى الآخر مثلا .. ممكن تلاقى مفيش شباب أصلا فى البرلمان .. غير الخناقة اللى هاتحصل علشان الترتيب جوه القائمة ..
دلوقتى مفيش الكلام ده.. القائمة بتمثيلها النوعى لو جابت 50% من الأصوات + 1 تدخل كلها بشبابها وعمالها ومعاقيها ومسيحييها .. لضمان تمثيل كل الناس دى وعدم وضعهم فى ذيل القوائم بصورة شكلية زى ما حزب النور عمل مع الستات كده فى انتخابات برلمان الإخوان وحطهم فى الآخر علشان مايدخلوش ..