عايز تعرف هتعمل إيه يوم الانتخابات؟!.. ادخل هنا بسرعة

إذا كنت مش عارف إيه الخطوات اللي المفروض هتتبعها يوم الانتخابات.. وإيه اللي ماينفعش تعمله يوميها علشان صوتك مايبقاش باااااطل..

هقول لك هنا عليها وباختصار.. وهتعرف إيه اللي هتعمله يوميها قبل ما تدخل لجنتك اللي هتنتخب فيها لغاية ما تخرج منها.
يلا بينا نعرف بسرعة
في البداية.. ادخل على موقع اللجنة العليا للانتخابات على الإنترنت www.elections2011.eg علشان تعرف مكان اللجنة الانتخابية اللي هتدي صوتك فيها.. ودخل الرقم القومي لبطاقتك الشخصية المكوّن من 14 رقم، أو اتصل ب 140 دليل.. وبالمناسبة مافيش مشكلة لو بطاقتك منتهية الصلاحية.. المهم إن الخطوة دي بعد ما تعملها هتقدر تعرف اسم لجنتك الانتخابية، وعنوانها، ورقمك المسلسل كمان في الكشوف الانتخابية.
خلي بالك.. مش هينفع تدي صوتك إلا في اللجنة المحددة لك في الموقع، اللي هو مكان الإقامة الثابت في بطاقتك؛ يعني مش هينفع تروح أقرب لجنة ليك زي ما عملنا في الاستفتاء.
وبعدها هتروح للجنة الانتخابية اللي إنت تابع ليها في اليوم اللي هيتم فيه الانتخابات.
متنساش لازم تاخد بطاقة الرقم القومي معاك في اليوم ده؛ لأن مش هيتم الالتفات لأي وسيلة تُثبت شخصيتك إلا هي علشان تدي صوتك.
في اليوم ده حاول تروح بدري بقدر الإمكان علشان الطابور مايبقاش زحمة أوي.. هتقدر تدي صوتك في الانتخابات من الساعة 8 صباحا إلى الساعة 7 مساء، وكمان اللجنة العليا للانتخابات قررت مدّ التصويت في كل مرحلة لمدة يومين.
بعد ما تدي رئيس اللجنة بطاقتك علشان يتأكد إن اسمك موجود في كشوف اللجنة.
بعدها هيسلمك رئيس لجنتك الانتخابية أو عضو من أعضاء اللجنة ورقتين للانتخاب، كل واحدة فيهم لونها مختلف عن التانية.
الورقة الأولى هيكون فيها أسماء المرشحين أو رموزهم في دوائر الانتخاب بالنظام الفردي، هتعلّم فيها ورا الستارة على اسمين بس (لا أقل ولا أكتر)، واحد فيهم عمال أو فلاحين والتاني فئات، أو الاتنين عمال.

وإذا علّمت على 3 أسماء أو أكتر صوتك هيعتبر باطل، ولو علّمت على مرشح واحد بس بكده هبيقى صوتك باطل ومش هيكسب أي مرشح، وخلي بالك؛ الورقة بتاعة النظام الفردي هيكون لونها أبيض.
أما الورقة التانية فهيكون فيها أسماء الأحزاب أو التحالفات اللي بيكون فيها أكتر من حزب في دوائر الانتخاب بنظام القوائم الحزبية المغلقة، والورقة هيكون لونها بصلي وفيها هتعلّم على قائمة واحدة بس، (علّم على اسم القائمة بس، مش المرشحين اللي جواها).
خد بالك.. صوتك هيبقى باطل لو علّمت على أكتر من قائمة، أو علّمت على ناس جوه كل قائمة... ولازم تتأكد من وجود ختم اللجنة الفرعية على ظهر الورقتين ومعاهم تاريخ الانتخاب؛ علشان لو البطاقة مش عليها الختم صوتك هيكون باطل.
ماتنساش.. القلم اللي هتستخدمه علشان تعلّم بيه جوه الورقتين لازم مايكونش قلم رصاص، علشان صوتك مايعتبرش باطل، ولاحظ إنك لو علّمت في أي مكان في الورقتين علامة بتعبّر عن رأيك أو شخصيتك أو توقيع ليك.. ده هيبطل صوتك.
بعد ما علّمت في الورقتين، هتطبقهم ويبقى قدامك خيارين: يا تحطهم بنفسك في الصندوقين المخصصين ليهم، يا هتسلّمهم لرئيس لجنتك، وهو هيحطهم في الصندوق الخاص بيهم، وإنت واخد بالك عشان تكون مطمئن.
ودلوقتي هتوقع أو تبصم جنب اسمك في كشف أسماء لجنتك الانتخابية.
وتيجي آخر خطوة في الانتخابات، اللي هي غمس صباعك في الحبر الفسفوري اللي مش بيطلع من إيدك قبل مرور 24 ساعة.
يتبقى سؤال واحد قبل ما ننهي كلامنا.. وهو: إزاي الناخب لو هو كفيف أو من ذوي العاهات يقدر يصوت؟!!
رئيس اللجنة هيسأله: عايز تقول رأيك شفهي ولا حد ينوب عنك؟
لو اختار أول طريقة.. فرئيس اللجنة هياخد رأيه ويثبت أمين اللجنة رأي الناخب في بطاقة الانتخاب.. ويوقّع رئيس اللجنة على البطاقة، وبعدها هيطبّقها ويحطّها في الصندوق.
أما لو اختار الناخب إن حد ينوب عنه.. فهيثبت الشخص اللي بينوب عنه وراء الستارة.. ويقوم أمين اللجنة بإثبات الإنابة دي في المحضر.

ولما تخلص كل الخطوات دي.. اسمح لي أهنيك بإننا عدينا أول خطوة في سنة أولى ديمقراطية
إضغط لمشاهدة الفيديو: