بالفيديو.. خليك إيجابي واعرف النظام الانتخابي (القائمة)

عرفت في الحلقة اللي فاتت إنك لما هندخل لجنتك الانتخابية علشان تمارس حقك في التصويت، هتدّي للقاضي -رئيس اللجنة- البطاقة بتاعتك وهيقوم مدّي لك ورقتين؛ الورقة الأولى فيها مجموعة من الأسماء هتختار منهم اتنين، واحد عمال وواحد فئات؛ لكن ماينفعش تختار الاتنين فئات..
الورقة التانية بقى هتلاقي مكتوب فيها أسماء قوائم.. يعني بقى القوائم دي؟ وهنختار منها إزاي؟ ومين اللي بيفوز في القوائم دي؟
تعالى مع بعض واحدة واحدة نفهم قصة القوائم دي بكل بساطة...
نظام القوائم في انتخابات مجلس الشعب اللي جاية دي اسمه..
نظام القائمة النسبية المغلقة المشروطة
اوعى تتخض... الموضوع سهل جدا وهنشرحه لك ببساطة...
نعالى نعرف كلمة كلمة...
القائمة يعني: لِستة من أسماء المرشحين.. مجموعة من أسماء المرشحين مكتوبة تحت بعضها.. وعددهم بيبقى بالكتير عشرة..
وعدد المرشحين في القايمة بيبقى حسب الدايرة اللي هم مرشحين نفسهم فيها.. فإذا كانت الدايرة مساحتها كبيرة وعدد سكانها كتير بتلاقي القايمة مكونة من عشر أسماء، ولو الدايرة أصغر وعدد سكانها أقل بتلاقي القايمة مكوّنة من 8 أسماء فقط...
وكل قايمة ليها اسم.. يعني تلاقي قايمة اسمها قائمة حزب فلان.. أو قائمة ائتلاف علان.. أو قائمة مستكة وحبهان.. (طبعا إحنا ماقلناش أسماء من القوائم اللي مرشحة نفسها علشان ماتبقاش دعاية ليهم).
ويا سيدي لما إنت.. بتاخد في اللجنة ورقة مكتوب فيها أسماء القوائم دي، مكتوبة تحت بعضها، وإنت بتعلّم على قايمة واحدة من اللي مكتوبين... بس كده.
طب يعني إيه نسبية؟
شوف يا كبير الموضوع سهل بس ركز حبة صغيرين معايا..
كل قايمة زي ما قلنا بتبقى مكونة من عدد من أسماء المرشحين، مترتبة تحت بعضها.
مثلا.. يعني لو عندنا في الدايرة 3 قوايم مرشحة نفسها؛ قايمة اسمها (أ)، وقايمة اسمها (ب)، وقايمة اسمها (ج).. زي كده:
قائمة (أ) قائمة (ب) قائمة (ج)
اسم المرشح (1) اسم المرشح (1) اسم المرشح (1)
اسم المرشح (2) اسم المرشح (2) اسم المرشح (2)
اسم المرشح (3) اسم المرشح (3) اسم المرشح (3)
اسم المرشح (4) اسم المرشح (4) اسم المرشح (4)
اسم المرشح (5) اسم المرشح (5) اسم المرشح (5)
اسم المرشح (6) اسم المرشح (6) اسم المرشح (6)
اسم المرشح (7) اسم المرشح (7) اسم المرشح (7)
اسم المرشح (8) اسم المرشح (8) اسم المرشح (8)
اسم المرشح (9) اسم المرشح (9) اسم المرشح (9)
اسم المرشح (10) اسم المرشح (10) اسم المرشح (10)
وعدد المواطنين في دايرتك اللي هيروحوا يصوّتوا في الانتخابات عشرة آلاف صوت (10000).. ده مثلا يعني.. (هم أكيد أكتر من كده بكتير)
تمام كده..
بعد ما الانتخابات خلصت بيشوفوا كل قايمة خدت كام صوت
وجه بعد ما الانتخابات خلصت بيشوفوا كل قايمة خدت كام صوت..
فلو مثلا القايمة (أ) خدت 3000 صوت؛ يعني (30%) من عدد الناخبين في الدائرة..
والقايمة (ب) خدت 6000 صوت؛ يعني (60%) من عدد الناخبين في الدائرة..
والقايمة (ج) خدت ألف صوت؛ يعني(10%) من عدد الناخبين في الدائرة.
يبقى النتيجة هتبقى كالآتي:
فوز أول 3 مرشحين فقط في القايمة (أ) اللي خدت 3000 صوت.
وفوز أول 6 مرشحين فقط في القائمة (ب) اللي خدت 4000 صوت.
وفوز أول مرشح فقط في القائمة (ج) اللي خدت 1000 صوت.
وعلشان كده اسمها نسبية..
يعني:
نتيجة الفوز بتتوزع بنسب كل ما قايمة خدت نسبة أعلى من الأصوات؛ كل ما كان عدد الفائزين فيها أكتر.. وطبعا الترتيب في أسماء المرشحين داخل القائمة مهم جدا؛ لأن الفوز في القائمة بيبقى بالترتيب زي ما قلنا فوق..
وبالطريقة دي كل قايمة بينجح منها واحد على الأقل.. وده بيزوّد من تمثيل القوائم داخل البرلمان...
باقي كده آخر حاجة.. يعني إيه مشروطة؟
سهلة أوي..
يعني في شروط لازم تحقق في كل قايمة..
الشرط الأول إن كل قايمة يكون فيها مرشحة (امرأة) على الأٌقل.. يعني ماينفعش يبقى فيه قايمة كل اللي مرشحين نفسهم فيها رجالة؛ لازم يكون بينهم مرشحة واحدة على الأقل...
الشرط التاني... ركز معايا لأنه مهم جدا..
لو مترشح على مستوى الجمهورية كلها 3 قوائم اللي إحنا قلناهم دول: قائمة (أ)، وقائمة (ب) ، وقائمة (ج).. لازم كل قايمة من دول تاخد نسبة تصويت 0.5% على مستوى الجمهورية...
يعني إيه الكلام ده؟
يعني علشان القائمة دي تتحسب أصلا لازم كل الناخبين على مستوى الجمهورية يكونوا موافقين عليها بنسبة 0.5% من عدد الناخبين.. واللي هم تقريبا على حسابات اللجنة العليا للانتخابات 100000 (مائة ألف صوت)...
يعني ببساطة هيجمعوا النتيجة على مستوى الجمهورية.. والقائمة اللي هيلاقوها خدت أصوات مائة ألف صوت أو أكتر على مستوى الجمهورية؛ هتتحسب في الانتخابات وهيبتدوا يشوفوا القايمة دي خدت كام صوت بقى في كل دايرة، ويحسبوا عدد الفائزين بالطريقة اللي سبق وقلناها..
طب لو في قايمة ماخدتش على مستوى الجمهورية مائة ألف صوت؛ إيه إللي هيحصل؟
ولا كأن القيمة دي موجودة أصلا؛ يعني القايمة هتتشطب من حسابات الانتخابات وكأنها مرشحتش نفسها...
من الآخر بقى وفي كلمتين وبس...
إنت لما هتخش لجنة الانتخابات.. وتدي للقاضي بطاقتك الشخصية.. هتمضي قدام اسمك إنك حضرت.. وهيقوم القاضي مدّي لك وررقتين؛ ورقة منهم مكتوب فيها عدد من الأسماء.. هتعلّم فيها على اسمين بس؛ واحد عمال والتاني فئات، أو الاتنين عمال.. لكن ماينفعش تعلم على اتنين فئات.. وهتقوم حاطط الورقة دي في صندوق مخصص ليها، القاضي هيقول لك عليه جوه اللجنة..
الورقة التانية مكتوب فيها أسماء قوائم.. هتعلّم فيها على اسم قائمة واحدة بس.. ركز واحدة بس.. وهتقوم حاطط الورقة دي في صندوق مخصص ليها، القاضي هيقول لك عليه جوه اللجنة..
وبعدها هتقوم حاطط صباعك في علبة الحبر الفسفوري علشان تبقى تُورّيه لأصحابك وتفتخر إنك شاركت بإيجابية في الانتخابات...
اوعى تروح عليك نومة وماتروحش الانتخابات.. علشان لو نمت ومارُحتش.. هتفضل نايم على طوووووووووووووووووووول...
خليك إيجابي وشارك بصوتك في الانتخابات

ولو مافهمتش أوي من الكلام اللي فات اتفرج على الفيديوهات دي


إضغط لمشاهدة الفيديو:
إضغط لمشاهدة الفيديو: