الرئيس ل"شباب الجامعات": لا مجال للفساد ومفيش جنيه ورق هيتاخد دون وجه حق.. الدستور كتب بنوايا حسنة لكن البلاد متتحكمش بحسن النوايا.. السيسى يشكر محلب.. ويؤكد: محتاجه جنبى.. ومش هنسمح لحد يهد بلدنا

توجه الرئيس عبد الفتاح السيسى بالتحية والشكر للمهندس إبراهيم محلب وحكومته "المستقيلة" على ما قدموه، خلال المرحلة الماضية، قائلاً: "كنا لازم نشكرك لأن الحقيقة أى حد بيتولى المسئولية بيضحى بحاجات كتير أوى أثناء توليه هذه المسئولية".
وأضاف الرئيس خلال كلمته، بأسبوع شباب الجامعات العاشر الذى تستضيفه جامعة قناة السويس بالاسماعيلية اليوم الأحد، أنه "ليس من المعقول أن تتسبب مشكلة فى ضياع جهد الناس.. إحنا لازم كمصريين نخلى بالنا أوى من تعليقاتنا وردود أفعالنا". وتابع: "المهندس إبراهيم محلب هيكون جنبى أنا شخصياً لأنى محتاجه".
وأكد السيسى أن الاستحقاق البرلمانى الأخير من خارطة المستقبل سيتم لتكتمل بذلك خارطة المستقبل، داعياً الشباب إلى المشاركة الفعالة فى الانتخابات المقبلة. وأضاف: "مشاركة الشباب مهمة جداً لان لديهم القدرة على الحركة والفرز.. والبرلمان القادم فيه كثير".
وقال الرئيس فى كلمته: "الدستور المصرى كتب بنوايا حسنة.. والبلاد متتحكمش من حسن النوايا، إما إعاقة أو فرصة كويسة لمستقبل أفضل".
ووجه الرئيس حديثه للقوى السياسية قائلاً: "نقوا مجموعة من فضلكم انزلوا واختاروا ونقوا كويس، أنا معنديش حد أقول لكم اختاروه"، مطالباً نساء مصر بحسن اختيار ممثليهن بتجرد ووطنية.
وعن أزمة اللاجئين السوريين، قال الرئيس إن مصر بها 5 ملايين لاجئ، فى ظل ظروفها الاقتصادية الصعبة، مضيفاً: "معندناش كتير نقدمه لكن الموجود بنقسمه.. وانا متكلمتش فى الموضوع ده قبل كده علشان ميكونش فيه إساءة لأهالينا".
وتابع السيسى: " قلنا قبل كده اننا مش عايزين نتحول لأمة لاجئين، وده اللى إحنا شايفينه فى بلادنا مش فى مصر، احنا عملنا وبنعمل وهنفضل نعمل طيب".
وقال: "إحنا بنتكلم عن اشقاء واهل لنا من العراق واليمن وسوريا وليبيا والسودان وجنوب السودان وإريتريا وإثيوبيا وعمرنا متكلمنا عن الموضوع ده ومحدش حاسس بيهم لأننا بنعاملهم كجزء مننا".
واستطرد الرئيس: "هدفنا الاستراتيجى هو الحفاظ على الدولة المصرية وربنا اراد إننا نرى حولنا ما يدعونا للتشبث والإصرار على اننا نحمى بلادنا ونخلى بالنا منها"، متسائلاً: "البلد اللى اتهدت هترجع تانى ازاى، والناس اللى خرجت من بلادها دى هترجع تانى إزاى؟!"، مضيفاً: "ده قدام مصر صغير جداً، مصر 90 مليون لازم نحافظ على مصر ونحميها ونكبرها ونرعاها وده مش بالكلام، ده بالعمل والتضحية".
وخاطب السيسى المصريين بقوله: "خلوا بالكم من بلادكم، اللى بيعمل وقفات لمطالب أو كده بقول له انت واخد بالك انت بتعمل ايه حتى لو العدد قليل، احنا عايزين نسمع الناس لكن لازم يكون فيه وعى ومعرفة، لازم يكون عندنا بداية للمعرفة، لازم نعرف احنا فين، احنا مين، احنا كام، معانا مين، تحدياتنا ايه".
وأشار إلى أن الوعى الحقيقى يجب أن يكون فى كل شئ، فى المدارس والجامعات والإعلام، مضيفاً: " تفتكروا لو البلد تقدر تقدم طب مش هتقدم ليه، هو لازم تطلب منى علشان أقوللك خد؟".
وتابع الرئيس: "وقوفك ملوش لازمة، البلد دى كانت المرتبات فيها 70 مليار جنيه فى 2011، ودلوقتى 218 مليار جنيه فى القطاع الحكومى، كله على حساب الدين، لو ما راعيناش بلدنا كويس ممكن لا قدر الله نؤذى بلدنا من غير منحس، احنا 90 مليون".
وحذر الرئيس مما يجرى من حولنا، وقال: "محتاجين نخلى بالنا كلنا لاجل خاطر بلدنا، احنا بلدنا بظروفها الصعبة دى تساعنا وتحقق لنا الأمن والاستقرار". وتسائل: " خراب البلاد هيفيد بإيه؟، لا يمكن أبداً أن فيه حضارة وتقدم تبنى على جماجم ودماء الناس، بل تبنى بطهارة اليد وبالتجرد والإيثار وحسن الخلق والعلم والعمل".
وتابع الرئيس: " بقول لهم تانى لو خدتم بالكم كتر خيركم، مخدتوش بالكم احنا هناخد بالنا ومش هتقدروا تعملوا حاجة، مش هنسمح لحد أبداً أنه يهد بلدنا أو يشرد شعبها.. ده مش مسئولية القوات المسلحة والشرطة بس، دى مسئوليتنا كلنا، والإعلام جزء رئيسى فى المعركة.
وأعلن الرئيس خلال كلمته إطلاق مبادرة البرنامج الرئاسى لتأهيل الشباب للقيادة، من خلال إنشاء قاعدة قوية وغنية بالكفاءات الشبابية، لتكون مؤهلة للقيادة فى المستقبل فى كافة المجالات.
وحول قضية الفساد التى طالت الحكومة المستقيلة وتحديداً وزير الزراعة، قال الرئيس: " أنا معجبنيش التناول بتاعنا لقضية الفساد خلال الأيام اللى فاتت والله، عايزين واحنا زعلانين نخلى بالنا، انتم سمعتونى حتى وانا بغضب بأسئ لحد؟، فيه قانون، وفيه قضاء، مش عايزين نقفز على حاجة، حتى لو هتتكلم لا تسئ لأن انت بتتكلم عن أسر".
وقال الرئيس: "الفساد لا مجال له ولن نسكت عليه، ولن نسمح بذلك والله لن نسمح بجنيه ورق يتاخد دون وجه حق.. والفساد مش بس إنك تاخد، انك أيضا متأديش المهمة بالشكل المناسب".
واعترف الرئيس خلال كلمته بارتفاع الأسعار، قائلاً: "بالفعل يوجد ارتفاع فى الأسعار، ولكن هناك تحرك لإنشاء منظومة لضبطها داخل مصر".
موضوعات متعلقة:
السيسى: أنا محتاج "محلب" جنبى ولن أتركه
السيسى: الدستور المصرى كُتب بنوايا حسنة والدول لا تبنى بالنوايا الحسنة
السيسى: "والله لن نسمح بجنيه ورق يتاخد دون وجه حق"
السيسى: "مش معقول نضيع جهد سنة ونص بسبب مشكلة"