«أحب أكون مذيعة ومعدة برامج عشان أفيد الناس بشكل عام، وأخاطب المراهقين بشكل خاص، وأوصل لهم الأفكار اللى بيها يقدروا يعيشوا أحسن، ومش باقتنع بمعتز الدمرداش عشان هو بيطارد ضيوفه والمفروض أسئلته هى اللى تطارد ضيوفه، يعنى زى ما بتعمل أوبرا وينفرى أو حتى منى الشاذلى».. هذه الكلمات ليست لمذيعة شابة أو صحفية مخضرمة ولكنها لطفلة تبلغ من العمر 12 عاما، لكنها استطاعت وعن جدارة أن تفوز بالجائزة الأولى للمسابقة التى أقامتها ساقية الصاوى تحت عنوان «البرامج الحوارية» وذلك وسط كم كبير من المشاركين الذين من المفترض أن فاقوا عقل وسن «منة أسامة الأهل» بكثير! وعن سر حبها لهذه الهواية والفوز المفاجئ الذى حققته، قالت منة إن فكرة تقديم برامج حوارية تسيطر عليها منذ فترة، ولكنها عكفت طوال إجازة نصف العام المنصرم على إعداد برنامج حوارى بأسماء وأفكار وضيوف مختلفين، وساعدتها والدتها على إتمام هذه المهمة لأنها كانت تعمل معدة سابقة فى أحد برامج قناة «أنا» قبل إغلاقها، وحرصت «منة» على الذهاب مع والدتها أثناء تصوير حلقات البرنامج والتعرف على ما يحدث خلف الكاميرات. تضيف منة: «ماما عرفتنى فى الأجازة إزاى ممكن أعمل فكرة توصل للمراهقين، وأنا كان هدفى إنى أعرف المراهقين إزاى يعيشوا بشكل أحسن، ودا كان من خلال 40 حلقة أنا كتبتهم، وكل حلقة بتتكلم عن موضوع مختلف، وفيها ضيوف مختلفين، وابتديت أقترح أسماء الضيوف وأحضر لهم أسئلة، وفعلا عملت حلقة تجريبية وماما وبابا عرضوها على شركات إنتاج عشان إذاعتها بس المحاولات فشلت». وكان إعلان ساقية الصاوى عن مسابقة «البرامج الحوارية» بمثابة العناية الإلهية التى أنقذت «منة» من اليأس، وكل ما اشترطته المسابقة أن يقدم المتقدم فكرة حلقة من برنامج حوارى ويقوم بتنفيذها. وحكت «منة» عن فكرة حلقة البرنامج التى قدمتها فى المسابقة، قائلة: «موضوع الحلقة كان الموضة وكنت عايزة أركز من خلاله على أننا مش لازم نلبس على الموضة عشان نكون شيك، وكانت ضيفتى فى الاوستديو هى صاحبة محل أزياء، وبعدين حضرت الأسئلة وأوقات الفواصل ووقت التقرير الخارجى اللى كان من الشارع وفى الآخر النهاية». ولم تتوقع «منة» أن تفوز بالمركز الأول، تقول: «أنا كنت فقدت الأمل خالص فى إنى ممكن أكسب، بس لما قالوا اسمى فى المركز الأول ساعة إعلان النتيجة حسيت بخوف وفرحة فى نفس الوقت». ترى منة أن نجاح أى برنامج حوارى يعتمد على مقدم البرنامج بشكل أساسى أكثر من المعد لأن المقدم هو مظهر للبرنامج، ولكن هذا لا يمنع من أن يضع المعد أسئلة ذكية للضيوف، وتقول: لكن أنا أخاف أقدم برامج ذات بعد سياسى لحسن «يتقبض عليا!». وعن طموحها التعليمى قالت منة «أنا شايفة إن معظم الناجحين فى مجال الإعلام مش خريجين كلية إعلام، وعشان كدا أنا بافكر برضة فى كليات الفنون سواء الجميلة أو التطبيقية».
