بالعلامات الستة على التحرش.. مى وصاحباتها للمتحرشين: عفوًا لقد نفذ رصيدكم

بتتمشى وسط الشارع بعيدا عن الرصيف.. ملامحها كلها توتر واستعجال وقلبها الخوف ساكن فيه، بتعدل فى ملابسها وتضمها بقوة وجسمها نفسها تخفيه، إنها ليست مجنونة أومجرد فتاة تخشى على نفسها من السرقة ولكنها ببساطة واحدة من ملايين الفتيات فى مصر اللواتى يتعرضن للتحرش كل يوم، بل ويتهمهم المجتمع بالجنون عند مجرد التفكير بالشكوى أو نطق الأمر بصوت عال .
لكن الحال ربما يتغير على يد "مى فتحى" وصديقاتها، بعد أن قررن محاربة التحرش ومواجهة الرجال تحت شعار " عفوا لقد نفذ رصيدكم"، وذلك بشرح الحالة التى تمر بها البنات بعد التحرش المتكرر فى مجموعة صور شديدة البساطة، تبين مدى التعذيب النفسى وظهور العلامات الستة للمتحرش بها، أملا فى أن تتغير طريقة تعامل المجتمع مع هؤلاء الفتيات.
لم نستغرب شجاعة مى ورفيقاتها ، التى تحدثت لليوم السابع قائلة:" البنت اللى بنركز عليها فى الصور بيبصلها الناس والمجتمع على أنها مجنونة، وبيحاولوا بكل الطرق أنهم يأكدوا لها ده مع كل موقف جديد بتتعرض للتحرش فيه قدامهم وهم ساكتين ، أو بيطالبوها أنها تسامح المتحرش ومتفضحش نفسها ، وللأسف بتكون النتيجة هى ظهور العلامات الستة لتكرار حوادث التحرش عليها وتعرضها للاكتئاب وأحيانا الانتحار" .
وأضافت المسئولة عن حملة مواجهة التحرش :" هدفنا بالأساس جمهور السوشيال ميديا ، لأنه أول مكان بدأت البنات تتكلم فيه عن التحرش اللى بيحصلهم بصوت عال، خاصة لأننا كبنات مفيش بنت فينا متعرضتش للموقف ده وإحنا ما بنبقاش مرتاحين فى المواصلات ولا حتى بقينا نفرح بالأعياد، وكل اللى موجود فى الصور من بنات حكت لنا وإحنا نفسنا شفناهم كتير جدا فى الشوارع وعايزين نوصل صوتهم".
واختتمت "مى" :"نفسنا لما الناس تشوف كدة تبطل تساعد المتحرشين بأى شكل، لأننا عارفين كويس إن ده مش هيأثر على المتحرش، لكن ربما يؤثر على الناس بعدها فيراعوا أنهم ياخدوا حق البنات اللى بيتهدر كل يوم فى كل شارع فى مصر ".