فى الامتحانات حبيبك عامل معاكى إيه؟

طبعا اليومين دول فى ناس بتبدأ امتحانات وفى ناس فى وسط المعمعة بالفعل، وناس خلاص بتشطب وبتستعد لتسليم ورقة الإجابة الأخيرة (أوعدنا يارب) الناس اللى فى الاول بيقولوا كده طبعاً دلوقتى المهم خلينا فى موضوعنا فى ناس كتير من دول مرتبطين وعايشين قصص حب وفى من يحب فعلاً بجد (حب .حب يعنى على حق ربنا مش اى كلام ) وفى اللى بيهزر وبيسلى وقته . يوووووه برضه مش مهم خلينا موضوعنا وموضوعنا سؤال واحد موجه فى الأساس للبنات الباشا حبيبك عامل معاك إيه اليومين دول؟
أكيد طبعا فى بنات هتقولك العجب من نوعية ان الباشا اتغير ومعدش يعرف حد وقافل الموبايل وبالكتير ممكن يبعت رنة بعد كل لجنة إن افتكر، ومش بشوفه خالص قال ايه بسلامته عامل معسكر مذاكرة وقافل على نفسه ويوم ما اشوفه ده لو فرضنا وحصل يعنى وده بالصدفة البحتة البعيدة كلياً واخد بالك وتماماً من اى تدبير تلاقيه جاى ذقنه طويلة وهدومه تصعب على الجيران وحالته غريبة، قال يعنى الواد خلاص مفيش وقت وحضرته واقع وفى عرض دقيقة.
هو اللى يستاهل كل أما كنت اقوله لم نفسك كفاية لعب واقعد ذاكر يقولى سيبك قعدة الكافيه ما تتعوضش احسن يا راجل خليه يشرب، يمكن يتعلم الدرس وياخد باله من روحه ومذاكرته بعد كده.
وفى بنات تانية تقولك عادى الكابتن مش فى دماغه امتحانات ولا غيره زى ما هو وده اللى قلقنى .اصل معنى كده ان جنابه مستهتر ومفيش حاجة جد فى حياته انا بدأت اقلق منه واشك فى مستقبلى معاه شكلنا ممكن نسيب بعض على اول الصيف الجو حر اساساً والحكاية مش ناقصة خنقة.
وفى بنات من نوع تانى خالص تقولك حاسب عندك .انت بتكلم فى ايه . اهدى كده وخد نفس عميق ونقطة ومن اول السطر عشان حبيبى ده واد محترم واد رجولة رجولة يعنى . مفيش منه.
الصراحة من اول السنة واحنا مع بعض وعاملين نظام زى ما فى وقت نبقى فيه مع بعض برضه ضرورى وحتماً يبقى فيه وقت نذاكر فيه ونشوف دراستنا عشان كده حبنا لا يعانى اطلاقاً من مشاكل ايام الامتحانات..
انتى بقى حبيبك عامل معاك ايه؟