لا علاج وصفوه ولا فى تذكرة داود ذكروه!!

قالوا و قلنا وهيقولوا كتير.. وقلنا وهنقول و بالقول نزيد.. وهيقولوا ونقول وبالكلام نعيد.. يقولك ليه يامصرى ليه تهجربلدك ليه.. يا أبن بلدى ليه ليه صحيح ليه.. أيه يعنى ناس مش محصله شغله.. وما بين كل قهوة وغرزه قهوه.. وبحظه اللى يحصله قعده.. والشاب يتخرج من الجامعة.. يحجز له كرسى و حجر وشيشه تفاحه.. بدل مايحصله صنعه نافعه.. يروح لأمه ترفع صوتها بعد ما تغطيه.. تناجى رب العباد وتشتكى ليه.. يارب الستر دحنا غلابه.. وأبوه شقيان وطفح الكوته فيه..
إيه يعنى ناس مش لاقيه.. ما طول عمرهم جيوبهم فاضيه.. وطول ما الفول موجود الدنيا ماشيه.. أيه يعنى الكبشه بقت بجنيه.. والرغيف بقى قد اللقمه.. واللى عايز يشبع عايزله مشنه.. وكيلو اللحمه عايزله ماهيه.. والفاكهه عن العيال مخفيه.. مش كفايه تصوموا رمضان.. راح فين رجب راح فين شعبان.. يوم العيد فيه فتوى أنكم تصموه.. يقولك الجوع صحه وعافيه.. لازم يكون عندكوا فطنه.. تفهموها و هيا فى الهوا طايره.. موائد الرحمن عامره.. ألحق بدرى وأحجزلك مكان تقعد فيه.. وماتسألشى أن كانت صاحبته رقاصه.. أو حتى واحده فاتحه خماره.. أو بيه واكل من البنوك خمسين مليون جنيه.. على الأقل لاقيتلك يوم تنام فيه شبعان.. وأكلت لحمه وملوخيه وبدنجان..
و ناس تركب البحر طفشانه.. وترجع لأهلها غرقانه.. أو حتى مايلاقوله جثه يصلوا عليه.. وناس توصل لبر الأمان.. وبعد سنين ياخدها الحنين للأوطان.. تكون النهايه فى عباره كانت لهم أكفان.. يصرخوا فى الظلمه ولاد و ستات وشبان.. فين حقنا فين حقوق الإنسان.. ياناس ليه الضعيف منهان !!
حاله نفسيه مالهاش علاج وصفوه.. ولافى تذكرة داود ذكروه.. شعب قفاه ورم من كتر الضرب فيه.. واقف طابور علشان اللقمه والشربه.. ومستنى فرصه علشان تبان الحقيقه.. مع أنها باينه ولكن عيونهم نايمه..!!