خلاويص..... لسة

خلاويص ... لسة
فار مزعور وكلب وبسة
ورضينا إحنا يا اخوانا
نكون الفار فى أوطاننا
بنسكت لجل ما نعيش
ونطلب شئ من الرحمة
يجينا الرد "مافيش"
وضاع الحق فى الزحمة
وصرنا عبيد حرافيش
بنحنى الضهر ونطاطى
واحنا القوة والجيش
خلاويص
خلاويص بصوت عالى
يهز الأرض ويلالى
يا كلب السلطة يا عالى
أنا الإنسان
أنا الإنسان بتكوينى
أنا الإنسان بتمكيني
أنا الإنسان
بصرخة أم فى ولادة
أنا الإنسان
بطرحة أرض ولادة
أنا الإنسان...... ومين غيرى
يقول للظلم "يا ظالم"؟!
أنا الإنسان.. ومن خيرى
يعيش الحق ويقاوم
سلام ليّا.. ولولادى
وللناس الفواعلية
سلام
بصوت الدانة والمدفع
سلام
يقول للعدو ارجع
سلام
بقوة ترد وبتوجع
سلام
بلون الدم ... لو عاوز
بلون الورد... لو عاوز
سلام
بلون الذل فى بلادى
بلون البسمة فوق خد الشهيد
-ابنى -
بلون الدمعة فوق خد المريض
-ابنى -
خلاويص
خلاويص.... يا أمة
الصمت ديدنها
وقول الحق بيدينها
وبيهينها أكابرها
خلاويص
خلاويص خلصت حكاوينا
أشيل الغمة عن عيني؟!
ولا أسيبها واعيش؟!!!!
خلاويص.. خلاويص