بالفيديو والصور.. صرخات أم تطالب بإنقاذ ابنها المريض بأرض اللواء.. الأم: مراكز التأهيل رفضت قبول ابنى وعلاجه ومش قادرة أوفرله ثمن البامبرز وعندى إحساس إن السيسى هيساعده.. والطفل مربوط بسلسلة فى السرير

عيون امتلأت بالدموع، وقلب ملأه الحزن، وأسرة عمها اليأس، حزنا على ابنها المريض الذى لم يجد يدا رحيمة تمده بالعون، ولم تلجأ إلى التسول أو التسكع فى الشوارع بأرض اللواء محافظة الجيزة، بل لجأت إلى الله، ليشفى لها هذا الابن المسكين الذى لا يعرف اسمه أو حتى يساعد نفسه.
صرخات أم تطالب بإنقاذ ابنها المريض
قالت سماح عبد العزيز محمد، والدة خالد صبرى محمد 11 سنوات، المقيمة بأرض اللواء شارع الشهداء متفرع من شارع 10 بجوار عبد الرحيم عمرو محافظة الجيزة والدموع تملأ عينيها: "يا ناس ألحقوا ابنى ساعدونى أنا مش عايزة فلوس ولا أكل ولا شرب ولا حاجة من حد غير أن تساعدو ابنى المريض".
الأم: مراكز التأهيل رفضت قبول ابنى وعلاجه
وأضافت الأم، "أنا ابنى معاق ولفيت بيه كعب داير على مركز حدائق الزيتون والجيزة ومركز القوات المسلحة والبحوث، قالولى ابنك يتبول على نفسه، وكنت أعطيه جلسات تخاطب الجلسة الواحدة ب10 جنيهات، بالإضافة إلى جلسات تعديل سلوك، وتنمية قدرات، حتى يتمكن من الفهم، فقالوا لى عنده ضمور فى خلايا المخ ولا يستطيع دخول الحمام، كما ذهبت به إلى أسوان، وكذبوا على وقالوا لى فيه طبيب سوف يحضر من فرنسا لعلاج مثل هذه الأمراض" .
وتابعت الأم: حد يرعى ابنى المسكين، لأنى مش قادرة أوفره ثمن البامبرز وعندى إحساس إن الرئيس عبد الفتاح السيسى هيساعدنى عندما يعلم بمشكلتى .
وأضافت الأم، أطالب أى حد يرعى ابنى المسكين، لأنى مش قادرة أوفره ثمن البامبرز وعايزاه يدخل مدرسة، إن شا الله حتى يجيلى جمعة وسبت بس، وأجهشت الأم بالبكاء، قائله: "بناشد الرئيس عبد الفتاح السيسى أن يقف جمبى، وعندى إحساس إنه هيساعدنى، وعايزاه حتى يوصى عليه فى مدرسة فكرية، فأنا عندى الضغط والسكر، ولما بغيرله بتعب، ومش عارفة هعيش تانى ليه ولا لأ، وأنا مش محتاجه إنى أتسول بيه".
الأم: رابطة ابنى بسلسلة فى السرير لأنه عنده فرط حركى
وقالت الأم المسكينة: "أنا رابطة ابنى بسلسلة فى السرير، لأنه عنده فرط حركى، يعنى بيتحرك كتير ولو فيه زبالة هيكلها ولو كهربا هيلعب فيها، وممكن يسقط من الشباك من غير ما ياخد باله، وحدث ذلك بالفعل، وسقط قبل ذلك من الطابق الثالث وأخد 12 غرزة، وما بيكلش كتير، وكل اللى بيطلبه إنه يشرب، كما أن جلسات تعليم قدرات الذكاء غالية على، والمراكز التى لجأت لها عندما تعلم إنه يتبول على نفسه وهو الآن عنده 11 سنة يرفضون مراعاته، كما ذهبت لمركز فى المقطم ورفضوه.
الابن عنده ضمور فى خلايا المخ وما يعرفش هو ساكن فين ولا الأكل اسمه إيه ولا الحمام أو اسمه
أضافت الأم: ابنى عنده ضمور فى خلايا المخ، ما يعرفش هو ساكن فين، ولا الأكل اسمه إيه وما يعرفش الحمام ولا اسمه زى أخواته، وطالبة من الله ثم الرئيس عبد الفتاح السيسى إنه يساعده ويوصوا عليه فى مدرسة تساعده، لأنى مش قادرة عليه، ولفيت كتير محدش بيرضى بيه، أنا مش عايزة إعانة ولا شهرية، لأنها تانى يوم هتتصرف، عايزة حد يساعد ابنى، أنا لو مت بكرة محدش هياخده، وأنا لما تعبت ابنى حدثت له تسلخات فى جلده، وجبتله مرهم وصابونه ديتول.
وأكد الأب أنهم يسكنون فى شقة بإيجار 700 جنيه وهو على باب الله ولا يستطيع توفير الإيجار بشكل منتظم، مطالبا بتوفير شقه لهم.
الطفل خالد صبرى مقيد بالسلاسل
والدة يقيدة بالسلاسل
أثناء تقييد الطفل بالسلاسل فى السرير
الطفل ينظر إلى والده وهو يقيده
الطفل خالد يقف مبتسما