بالفيديو.. "اليوم السابع" يحاور أهالى شارع الأهرام بشبرا مكان واقعة ذبح الكلب.. المتهم كابوريا: أنا برىء وذنبى إن اللى قتلوه أصدقائى على فيس بوك.. وشقيقه: التشهير أضره فى شغله وتسبب فى أزمة سكر لأمى

استطاع "اليوم السابع"، إجراء حوار مع "سيد كابوريا" ابن شارع الأهرام بمنطقة شبرا الخيمة، والمُتهم فى واقعة ذَبْح الكلب "ماكس"، بعد أن انغلقت المنطقة على نفسها، ورفض سكانها التعامل مع الإعلام خوفًا من أحكام المُجتمع.
"كابوريا" يُبرّئ نفسه
"أنا برىء من دم الكلب وكل ذنبى إنى صديق للمتهمين على الفيس بوك" هكذا بدأ "سيد كابوريا" أحد المتهمين فى واقعة ذبح الكلب "ماكس" بشارع الأهرام فى شبرا الخيمة، نافيا أية صلة له بتورطه فى فى هذه الجريمة.
بداية اتهام "كابوريا"
وقال "كابوريا"، ل"اليوم السابع": "أنا ماليش أى علاقة بالحادثة ولا من بعيد ولا من قريب كل ذنبى إنى صديق لعمرو الجزار على الفيس بوك والناس اللى وصلت للصفحة بتاعته استسهلت وخدت صورتى وابتدو ينشروها على الإنترنت ويشهروا بى".
وأضاف "كابوريا": "فى الوقت اللى كنت أنا فيه فى محل الستائر بمارس شغلى زى كل يوم فوجئت ببعض البرامج بتعرض صورى ضمن المتهمين من غير ما يرجعولى أو حتى يرجعوا لقسم أول شبرا الخيمة اللى مسئول عن التحقيق فى الواقعة واللى نزل رجالته وقبضوا على المتهمين الأصليين عمرو الجزار، وأحمد أبو عزة (حمادة) واللى استبعدونى تماما من التحقيق بعد استجواب المتهمين نفسهم وأهل الشارع ونفوا أى علاقة ليّا بالحدث".
"كابوريا": أنا مجرم بدون جريمة
واستكمل حديثه قائلًا: "أنا تضررت فى شغلى وأكل عيشى، طبيعة عملى كبائع للستائر بتخلينى أتعامل مع كل فئات المجتمع، وللأسف بعد التشهير بيّا بدأت الزباين تتصلو ويسبونى ويهددونى بمقاطعتى تمامًا ده غير شكلى اللى اتشوه قدام اللى اعرفه واللى معرفوش، وبقيت أحس إن عيون الناس بتطاردنى فى الشارع وكأنهم بيقولولى أهو المجرم عديم الرحمة اللى ذبح الكلب، أنا مابقتش عارف أنام من ساعة الواقعة دى نمت وصحيت لقيت نفسى بقيت مجرم من غير ما ارتكب جريمة".
شقيق "كابوريا" الأصغر
وقطع "عبد الحليم" شقيق "كابوريا" الأصغر، مشيرا إلى صاحب الكلب كونه المتهم الأول على الرغم من أنه خارج القضبان حاليًّا.
وقال عبد الحليم: "صاحب الكلب إللى اسمه أوشا عليه مسئولية كبيرة بداية ما دخل الكلب فى مشاكل بينه وبين الناس وخلاه يدافع عنه ويتهجم على أهالى المنطقة وربا الغيظ والغل داخلهم تجاه الكلب، لغاية ما سلم الكلب بإيده وسلسله وهيئه تماما أنه يندبح ورجع وأنكر عن إن هو اللى قيده، وفى الآخر أخويا اللى ملهوش علاقة بأى مشكلة يتاخد فى الرجلين يعنى لسه موجود جانى بره الحبس والتهمة بتطارد أخويا فى كل مكان".
واستكمل عبد الحليم، حديثه واصفًا مدى الأضرار التى وقعت على شقيقه ووالدته: "غير الأضرار المادية ووقف الحال اللى اتسبب فيه اتهام أخويا الزور فى ذبح الكلب، أمى كمان جت ضحية لتهمة إحنا مالناش أى علاقة بيها إحنا حتى ماكُنّاش موجودين فى الشارع وقت حدوثها".
وأضاف: "فنتيجة للبرامج والإعلاميين إللى بيشهروا بالناس من غير حتى ما يتحققوا من الفيديو ويشوفوا إذا كان أخويا موجود فيه ولا لأ، اتعرضت أمى لأزمة سكر حادة بمجرد ما شافت صورة أخويا معروضة فى التلفزيون وبيقولوا عليه إنه متهم، ومش هيرضينا إلا لما تترد كرامتنا ونتعوض على المستوى المعنوى إحنا مش عايزين أى حاجة غير إن اللى اتهم اخويا وأشاع خبر غلط يرجع وينفيه".
شاهد العيان يتحدث
فيما قال محمود الحناوى، أحد شهود العيان على الواقعة: "أنا طرف وسط ماليش علاقة بأى من الجانبين لا مع دول ولا مع دول لكن لازم أقول شهادة حق صحيح الطريقة اللى اتدبح بها الكلب مش إنسانية لكن الكلب كان يستاهل وصاحبه هو اللى عمل فيه كده وسيّبه على الناس وكان سبب فى استئصال خصية (حمادة) وكل ذراع واحد وعض حوالى 8 رجالة".
الشيخ "يُحلل" قتل الكلب
وأضاف الحناوى ل"اليوم السابع": "صحيح كان بيدافع عن صاحبه وكان وفى له لكن الناس ذنبها إيه فى الشارع اللى أتأذت دى ذنبها إيه إن صاحبه رايح جاى (يتمنظر) بيه ولما مايقدرش على حد يسيبه، كمان الشيخ إللى سألوه كان السبب فى كل المشكلة دى لأنه حلل قتل الكلب طالما مسعور".
وتابع الشاهد: "ساعتها فكروا يضربوه بالنار لكن لو كانت طلقة رصاص واحدة اتضربت كانت الحكومة هتقلب الدنيا عليهم واحنا مش عايزين نخش فى مشاكل فكان الذبح بالنسبة لأهالى المناطق الشعبية هو الحل الوحيد علشان كرامتهم اللى راحت لما الكلب (جَرَّاهم) وماقدرش ولا راجل يقف قدامه ولا حتى ولا كلب من اللى جابوه علشان يقاتله قدر عليه".
موضوعات متعلقة..
مستخدمو مواقع التواصل يتداولون فيديو وحشيا عن قتل كلب بالأسلحة البيضاء
شقيقة أحد المتورطين بذبح كلب الأهرام: "أخويا سأل شيخ قبل عملية الذبح"
بالصور.. هاشتاج "كلب شارع الأهرام" الأعلى تداولاً على تويتر
بالصور.. هاشتاج "كلب شارع الأهرام" الأعلى تداولاً على تويتر
خبراء علم نفس يحللون واقعة "كلب شبرا"..ويؤكدون: القتيل هو الإنسان الوحيد فى الحادث..وأسقط ورقة التوت عن المجتمع.. وصاحب الكلب "خائن".. وقاتله "سيكوباتى".. والمصور "مهووس" والمشاهد يفرغ طاقته العنيفة