بالفيديو.. زوج شيماء الصباغ: زوجتى أصبحت من أيقونات الثورة وقاتلها ما زال طليقًا.. كانت شاعرة وباحثة وأحبت مصر والفقراء.. و"لو فضلنا نخسر شباب بالشكل ده فإحنا قدام مستقبل مظلم"

وجه أسامة السحلى، زوج شيماء الصباغ، التى لقيت حتفها إثر تلقيها رصاصة خلال مشاركتها فى وقفة صامتة بميدان طلعت حرب للمطالبة بالقصاص، رسالة إلى المصريين، قائلاً: "شيماء كانت بتحب مصر مش على طريقة الأغانى الوطنية ولكن كانت فى شخصيتها جوانب إيجابية كتير وكانت بتحب الفقراء والمهمشين، وماتت وهى بتقول عيش حرية عدالة اجتماعية".
وأكد السحلى، فى رسالة فيديو تم بثه عبر قناة تحمل اسم شيماء الصباغ على موقع "يوتيوب"، أن زوجته لها حق وماتت فى ميدان عام أمام أعين الأمن، مشيرًا إلى أن "شيماء أصبحت أيقونة من أيقونات الثورة المصرية، ولا يزال قاتلها حرًا طليقًا".
وتابع: "زوجتى وأم ابنى بلال قتلت غدرا فى ميدان طلعت حرب يوم 24 يناير، شيماء بحكم تخصصها كانت بتشتغل باحثة فى مجال الفلكلور وكانت بتوثق من خلال أبحاثها وأوراقها العلمية التراث الشعبى المصرى بجانب كده كانت بتكتب شعر وكانت بتعمل فى مجال مسرح العرايس، وعملها الحزبى كان تطوعى وكانت نشيطة فى الملفات العمالية وحقوق العمال والطبقات الفقيرة بحكم قناعتها وأفكارها وكان ده مهم فى رأى فى الفترة ديه لبناء مستقبل سياسى فى مصر أن إحنا ندعم الشباب اللى بيشتغل بشكل تطوعى بدون أجر، ندعهم مش نقتلهم".
وواصل "شيماء كانت بتحب مصر مش على طريقة الأغانى الوطنية كانت بتحبها لأنها بتحب المصريين خصوصا الفقراء واعتقد اللى عرفوها لمسوا ده فيها وإن فى شخصيتها جوانب إيجابية كتير، خسارة شيماء واللى زيها فادحة لأنها كادر سياسى يتم إعداده كان الأولى بالرعاية ولو فضلنا نخسر شباب بالشكل ده فإحنا قدام مستقبل مظلم".
واستطرد: "ماتت وهى بتقول عيش حرية وعدالة اجتماعية، ومعها ورد ورايحة مع زمايلها يحطوه تأبين لشهداء ماتوا عشان خاطر نفس الشعار اللى كانت بتردده قبل ما تموت، حق شيماء واضح وضوح الشمس فى جريمة ارتكبت فى ميدان عام فى وضح النهار فى وجود أجهزة الأمن بشكل مكثف تحت عيون وكاميرات كتير بمعنى أن لو حقها راح فإحنا مش فى دولة".
واتهم زوج شيماء الصباغ أطرافًا متصارعة على حساب دماء شيماء، قائلاً: "الناس اختلفت حول شيماء منهم من يدور على دليل براءة لجهاز أمنى ومنهم بياخد ده سبب عشان يحرج به النظام هم أحرار فى نموذج واضح زى شيماء كان واجب علينا الاتفاق مش الاختلاف.. أظن مفيش حد فينا مختلف أن شيماء بريئة ومظلومة وأنها اتقتلت غدر بيد مجرم لو اختلفنا فى ده يبقى عليه العوض ومنستحقش نعيش فى البلد ديه اللى قتل شيماء لا يزال حر طليق وقتل قبلها ناس ولسه هيقتل لو مخدش جزاؤه".
واختتم رسالته قائلاً: "خلاصة اللى عايز أقوله بلا شك أن شيماء أصبحت أيقونة من أيقونات الثورة المصرية شئنا أم أبينا فدعونا نتجمع حول رمز يخلينا نعرف نتوافق ونتعايش مش نختلف عشان حنفية الدم ديه تقف ونعرف نبنى مستقبل لولادنا ولانا اللى فى منهم اتيتموا أصبحوا يتماء عشان خاطر العيش والحرية والعدالة الاجتماعية أن مش شايف أن ديه جريمة".
موضوعات متعلقة..
الأربعاء.. "التيار الديمقراطى" يناقش آخر تطورات قضية مقتل شيماء الصباغ