بالفيديو..أهالى قرى أبو النمرس بالجيزة يعانون "الجفاف" منذ 5 أيام..والمسئولون لا يتحركون.. السكان: "بنشترى المياه فى جراكن".. والأطفال يتنازلون عن الحلويات فى المدرسة من أجل (إطفاء الظمأ)(تحديث)

يعانى أهالى قرى تابعة لمركز أبو النمرس بمحافظة الجيزة، من مشكلة انقطاع المياه لعدة أيام متتالية، دون أى تحرك قوى من المسئولين، بحسب شهادة أهالى القرية.
التقت عدسة كاميرا "فيديو7 قناة اليوم السابع المصورة" عدد من أهالى قرية المنوات التابعة لمركز أبو النمرس حيث أكدوا أنهم يعانون انقطاع المياه لمدة تستغرق عدة أيام متواصلة.
وقالت "الحاجة شادية" (ربة منزل) من سكان قرية ميت شماس عزبة بسيونى فرحات: المياه بتقطع كتيرعندنا، وبنشترى من برا وسعر "الجركن" بيوصل لجنيه و2جنيه"، مضيفة: المياه بتقطع لكن لما بتيجى بتكون صفرا وفيها رمل وبنبقى عايزين نتوضا وولادنا ما بيعرفوش يروحوا المدرسة".
وأضافت: بنتمنى أن المياه تيجى لو 5 ساعات فى النهار، وتقطع بالليل.. عايزين نشوف التزامتنا".
فيما قال "الحج ربيع"- صانع أقفاص- إن "انقطاع المياه أزمة كبيرة فى القرية، وبيأثر عليا فى الصناعة، وبشترى جركن مياه لقضاء احتياجتنا". وقال الحج عواد عثمان "المياه بتقعد بالأسبوع غير موجودة، رغم التحسن اللى عملوة بس المياه مش نظيفة، ولو اتملت فى إزازه بيبقى فيها رواسب ورملة.. والمشكله أنهم بيجوا يطالبونا بفلوس طب والناس الغلابة تجيب منين ".
وعقبت "الحاجة سامية كامل: بنشترى الجركن بجنيه و2 وبيتنكوا علينا ويقولنا عاجبك ولا مش عجبك ولو مرضتش بيخدوه ويدلقوه فى العربية".
وذكر آخرون، إن المياه تسبب العديد من الأمراض، وقال "واكد زهير عودة" إن "المياه تتسرب من ماسورات المجارى المتواجدة بالقرية وتسببت فى فشل كلوى للعديد من سكان القرية".
وأضاف: المياه وحشه، وعاملين طرمبات وبتطلع من المجارى، وخزان المياه اللى عاملينوا فى القرية مش شغال من أربع سنين، وبندفع فى شراء المياه كتير، وبتوع مجلس المدينة قاعدين فى مكاتبهم ومابيعملوش حاجة".