"فرح بالرحيل".. قصيدة جديدة للشاعر ماهر مهران

دى مِشْ نهاية الحياة
دا فرح بالرَّحيل
وانتقال م الزَّوال
للخلود الجَّميل ..
ف ابكوا .. مفيش مشكلة
هيلوا التراب ع الروس
اطفوا نيران المجوس
الطموا خدودكم بقسوة
وبالدمع الغزير حلُّوا المسألة
ما اللى قتلوا الحسين
جابوه من آخر الدنيا
وساعة العطش الكبير
استخسروا فيه نقطة فى حجم الخردلة..
الخروج م الضلمة جايز
الدخول للنور عايز عوايز
عايز له قلب أبيض
وروح ورقة بفرة
مش عيون حمرا
ودقن بتنقط بداوة
وكهنة بيستحلوا شرف البنات بالمريلة !!
الخروج م الضلمة جايز
لكن اللى مش جايز
إنك تقنعنى بأن الشيطان
معشش زى العنكبوت
جوه البرجل والميكروسكوب والكمبيوتر والمنقلة ..
عالم بلة!!
بكرة هايتقال عليه
عصرالتخلف والبهدلة
والظلم والتفكك والهوان
بكرة هايتقال عليه
عصر دمه غطَّى نوُّار البرتكان
عصر انقرض فيه البياض
وحل مكانه الجهلة والسماسرة والطماعين والأمريكان !!
ههههههههه زوِّد قوى
يا أخطبوط يافهلوى
عشان ما تفضل فى العلالى
زوِّد عشان ما يفضل الدولار يلالى
زوِّد وطيِّن يا سيدى حالى
وخليِّنى أكفر بالحياة
وفى مزبلة القيم ارمينى
غيِّرلى اسمى ورسمى ودينى
امحى بلاد وعلِّى بلاد
اقتل عباد واسحل عباد وشرِّد عباد
واهبر من مناجمنا هبر..
هات الفاس واحفرلى قبر..
عشان الأسود يبقا ماضى
وأعيش البمبى اللى حلمت العمر بيه
وأجرى زى العيال فى العيد
أركب عصايتى واعملها طيارة
أنفخ فى عود البرسيم واعمله زمَّارة
فيه أمم حويطة
وأمم ذكية
وأمم جشعة
وأمم أغبى من حمارة!!
أمسك عود حطب
وأعمله سيف
وأحارب الحقد بجسارة
واحضن الجنة ف بلادى ولو يومين
دوله مين
ودوله مين؟
ليه دوله مقتولين؟
وليه دوله مشردين؟
وليه ولاد العز يبهدلهم الحظ
وللقمة يبقوا متسولين!؟
وليه دوله مزهزهين ؟
ودوله مذلولين؟!
ودول يكفرونا ببلادنا باسم الدين؟؟
وفين أرواحنا اللى كانت حمام أبيض؟
وليه سبنا السواد يسكن القلب والروح والوش؟
طلعنا من نار السكوت يا سيدنا
وعلى سورة يوسف خُش
خلينا نبص فى الأرض ونطوُّل البصة
خلِّى الوشوش تتكسف من بعضها
ويبان الكسوف من الطلة
خدنا ياسيدنا واكشف لنا الداء والعلة
خلينا نطِّهر نفسنا بصوتك
اللى منه بنتصالح على الأرض والفاس والغلة
وننسى ملوك بياخدوا القصور بالحضن
أمَّا العشش فلازم تدفع وإلا...
تدفع مية وهى بتشرب ملح!!
تدفع كهربا وهى ما بتشوفش النور غير فى الصبح!!
تدفع معونة شتا وهى اللى السقيع بيغيِّر لون بشرتها!!
اقرا يا سيدنا وداوى قلوب العيانين
نسيِّنا إن أمريكا يتَّمت ملايين
ودمَرت ملايين
وشتَّت ملايين
لكنها يا حبة عينى زعلانة من بلادنا
اللى بتضيِّق ع الشواذ والمثليين!!
اقرا ياسيدنا
وداوينا بسورة ياسين
خلِّى قلوبنا الحجارة تلين
رجِّعنا من تانى بنى آدمين
نصلى للفجرفى الشروق
ونشم ريحة الطين وهو بيحضن ف التاريخ
اقرا يا سيدنا
ونسيّنا الوطن الدبيح
اللى بيتسلخ فى اليوم ستميت مَرَّة
اقرا وداوى حلوق مُرَّة
وضهور من كتر الحمول بقيت زى المدق
على جنبها نبَّت الصبار
وف أخرها الصبح اتحرق ..
اقرا يا سيدنا
وورينا نهاية اللى سرق
واللى طلطل رقبته م الحرج
واللى استسهل الولايا
ولدمهم حرق
اقرا يا سيدنا
وقول وعيد
يمكن حد يفهم
إن الألوان مش بس أبيض وأسود
وإن الإجابات مش أيوه ولا
وإن الناس مش سادة وعبيد
اقرا يا سيِّدنا
وقول وعيد
يمكن حد يفهم الفولة
ويبِّدل الصبار بحنة
اقرا وخدنا بصوتك يا مولانا للجنة !!