"افتح قلبك" مع د. هبة ياسين.. "ابعد عن الشر وغنى له"

أرسل (أ) إلى "افتح قلبك" يقول:
أنا شاب عمرى 30 سنة، مشكلتى من زمان إنى بخاف أقرب من الناس أوى، مبحبش أسيب حد من أصحابى ياخد عليا وأخد عليه، مبحبش أرتبط بحد بشدة، وطبعا طول عمرى بقاوم إنى أتعلق ببنت أو أعلقها بيا، بحس إنى لما أحب حد هاكون ضعيف من ناحيته، وهاكون عرضه لأى صدمات فى أى وقت، وبالتالى ممكن أنجرح وأتألم بقية حياتى لمجرد إنى خليت حد يملك قلبى ومشاعرى.
الموضوع ده مكانش عامل لى أزمة لغاية فترة قريبة، لغاية ما بدأت أفكر فى الارتباط والجواز، اكتشفت إنى مش عايز أحب فعلا، مش ضامن إيه إلى ممكن يحصل لو سلمت قلبى لواحدة، لكن فى نفس الوقت مش عارف أرتبط من غير مشاعر، مش مقتنع بفكرة جواز الصالونات والعفش والقايمة ده...
أهلى طبعا معندهمش أى فكرة عن اللى جوايا، وفاكرين إنى بارفض الجواز لأنى باتشرط أو باطلب طلبات سوبر، لكن الحقيقة هى إنى خايف...فعلا خايف.
وإليك أقول:
إللى حضرتك بتقوله ده مش حاجة غريبة فى الزمن ده على فكرة، بل بالعكس ده رد فعل طبيعى جدا لكثير من المواقف اللى بنعيشها وبنشوفها فى عصرنا الحالى، ممكن حضرتك تكون مريت بأحد التجارب الآتية:
_ إنك تكون نشأت بين والدين منفصلين، أو مش منفصلين لكن غير متفاهمين، أو كانوا مشغولين عنك على طول، وبالتالى إنت كبرت لقيت إنك مش قادر تعتمد عليهم كأى آباء طبيعين، وفهمت من صغرك إن تعلقك بيهم مش هايسبب لك غير خيبة الأمل والإحباط والإحساس بالرفض، فمع الأيام بقيت ماتسمحش لحد إنه يكون قريب منك أو عزيز عليك بأى شكل من الأشكال عشان ماتتصدمش فيه تانى زى ما حصل مع أهلك.
_ أو إنك تكون ارتبطت عاطفيا فى سن مبكر بواحدة مكنتش مناسبة، أو كان غير مسئولة وبتلعب وبتتسلى، أو حتى كانت هى كمان صغيرة ومش فاهمة يعنى إيه ارتباط، وبالتالى فشل الارتباط، وطبعا ده سبب لك ألم كبير وقتها، وفضل له آثار لسه مش قادر تتخلص منها لغاية دلوقتى.
_ أو يمكن تكون كل تجربتك السلبية هى عبارة عن سماعك لحكاوى وقصص الفشل فى حياة الناس اللى حواليك، قصة حب فاشلة من هنا، على خيانة من هنا، على جوازه تعيسه من هنا، على طلاق ومشاكل وقضايا ومحاكم من هناك، لغاية ما لقيت نفسك مابتسمعش عن أى مشاعر حلوة، ومش مصدق إنه ممكن يكون لسه فى ناس بتحب وبتقدر الحب وبتخاف على اللى بتحبه.
لو فكرت هاتلاقى كتير من الشباب حاليا واحد من التلاتة اللى فاتوا دول، عشان كده باقولك إن شعورك ده مش غريب، وشكوتك مش مفاجئة بالنسبة لى، لكن الحل إيه؟...
أولا لازم تحط فى دماغك إنه مفيش حد كامل، ولا علاقة كاملة من مجاميعه، يعنى كل الناس اللى بتحب وترتبط بتعمل ده مع ناس (ناقصة)، لأنها هى كمان (ناقصة)، وبيعيشوا حياة برضه (ناقصة)، لأن هى دى الدنيا، وهم دول البشر، كلنا ناقصين فى حياة مليانة عقبات ومشاكل، لكن بالرغم من كده ممكن نعيش ونحب وننبسط زى ماحنا كده، ونستمتع بالحياة على حالها ده، تبقى غلطان لو فكرت إن الناس السعيدة فى حياتها أو فى علاقاتها سعيدة عشان هى صح الصح، ومعاها ناس مية مية، وعايشين حياة مافيهاش غلطة، أبدا، الفكرة كلها فى إنهم بيركزوا على الحاجات الإيجابية، وبيقللوا تركيزهم على السلبيات، وبيسامحوا بعض، فالحياة بتمشى.
ثانيا فى فرق كبيييييير بين الحب والتعلق، أنت ممكن تحب أبوك، أمك، مراتك، أولادك، إخواتك، لكن مش هاتموت أو حياتك هاتنهار لو حد فيهم بعد عنك، أو لا قدر الله فارق الحياة، ممكن تتعب، تتألم، تحزن، لكن بعد فترة لازم تقف على رجليك تانى، وتعرف إن الحياة لازم تتعاش مهما خسرنا فيها.
لما تحب حد اهتم بيه من قلبك، وانبسط معاه، واتعب عشانه، لكن خليك عارف من جواك إنه لا هو ولاغيره ينفع يكون هو كل حياتك، أو ينفع تعيش حياتك عشانه هو وبس، لأنه ببساطة لازم حد فيكم يسيب التانى، محدش فينا مخلد، يا أنت يا هو هايفارق، لكن مين الأول؟... الله أعلم، أنا مش باقولك الكلام ده عشان تتعامل مع الناس ببرود، وتبعد عنهم، أو تحس إنهم مش فارقين فى حياتك، أبدا... ده حتى قالوها فى الأمثال (الجنة من غير ناس ماتنداس)، يعنى لا يمكن تقدر تعيش من غير ناس تحبهم ويحبوك حتى لو كنت فى الجنة، لكن أنا باقولك الكلام ده عشان إحنا فاهمين الحب غلط، وفاكرين إنه لو حبيت حد يبقى لازم يكون هو كل شىء فى حياتك، ولازم يكون هو وبس محور تفكيرك واهتمامك وسعيك فى الحياة، وبالتالى لو فقدته أو علاقتكم اختلت تحس إنك ضايع، زى القارب اللى فقدت بوصلتها.. محدش قال إن هو ده الحب.
ثالثا (مفيش حلاوة من غير نار)، أنت خايف على قلبك ينكسر، وعلى مشاعرك تنجرح، عشان كده أنت شايلهم بعيد عن كل شىء، أو بمعنى آخر معطلهم عن الحياة، طب إيه فايدتهم؟، والأهم من كده هاتحس إزاى بأى متعة فى الحياة وأنت معطلهم كده؟.
فى أكلات كتير أوى بتعمل عسر هضم وحموضه وأكتر من كده، ومع ذلك بنحبها وناكلها، وفى أماكن بعيدة أوى والطريق ليها صعب وخطر، ومع ذلك بنروحها، وفى حاجات غالية أوى ويمكن تكون أكتر من إمكانياتنا، ومع ذلك بنتعب ونشتغل ونحوش عشان نجيبها، كل ده ليه؟، عشان نستمتع، وننبسط، ونحس بالرضا والفرحة، ولو للحظات بسيطة.
كل شىء حلو لازم تتعب عشان توصل له، والعلاقات والحب برضه كده، لازم تقبل المخاطرة والمجازفة، بس بعد ماتحكم عقلك وتفكر وتختار كويس طبعا، ولازم تقبل بعض المشاكل والسلبيات عشان تجرب الحياة وتستمتع بيها وتعيشها بكل ما فيها، لكن عمرك ما هاتحس بأى حاجة من دى طول ما أنت متخيل إن الحب شر، و طول ما أنت رافع شعار (ابعد عن الشر وغنى له).
الصفحة الرسمية للدكتورة هبة يس على الفيس بوك: Dr.Heba Yassin