معركة ساخنة على "فيسبوك" بين الفنان تامر عبد المنعم وزياد العليمى بسبب"مبارك".. الأول: هعلقك فى ميدان التحرير يا خاين يا عميل.. والثانى يرد: هجيب حقى بطريقتى والشتايم مش هتبعدنى عن القضايا الرئيسية

شهدت مواقع التواصل الاجتماعى، معركة ساخنة بين الفنان تامر عبد المنعم، والناشط السياسى زياد العليمى، وذلك حينما رد "عبد المنعم" على ما كتبه "العليمى" عبر صفحته على "فيسبوك"، أن والد تامر هو سكرتير مبارك الصحفى وحماه هو محامى مبارك، فرد تامر: "الكائن الملظلظ اللى اسمه زياد العليمى بيهددنى وبيعايرنى إن أبويا كان سكرتير مبارك الصحفى وحمايا محامى مبارك وأنا بأعلنها قصاد الجميع وبأقوله: أوعى ياللى من الثدييات تتصور إن صوابعك زى بعضها أقسم بالله العظيم أجيبك من بيتكم وأعلقك يا خاين يا عميل فى ميدان التحرير بتاعك والدكر يخلصك منى اللهم بلغت اللهم فاشهد".
فيما رد "العليمى" على عبد المنعم:" هرد بطريقتى وفى وقتها، شكرًا لكل الزملا اللى اتضايقوا حسسونى إن كلنا واحد، وعموما كل واحد بيدل على البيئة اللى طلع منها، والبيئة اللى طلعت منها والبلد اللى أنتم كلكم بتحلموا بيها بتعلمنا مانسيبش حقنا، وبتعلمنا كمان ناخد الحق صح، بس فيه ملاحظتين صغيرين: أى حد أخد الابتدائية عارف إن الإنسان أصلا من الثدييات، وفيما يتعلق باللظلظة، كل أصحابى القريبين عارفين إن دى أغنيتى المفضلة:-)، كل سنة وأنتم طيبين يا شباب".
واستمرت حالة التراشق بالألفاظ من بين الطرفين عبر حساباتهم على فيسبوك وتويتر، وقال العليمى: "الزملاء ؛ شكرًا جداً على اهتمامكم بموضوع قلة الأدب اللى حصلت إمبارح، ولو سمحتوا خلينا نركز فى معاركنا الرئيسية، المشكلة أصلا كانت بسبب كلامى على انتهاك حق دومة فى العلاج، وحقى أنتم كلكم عارفين أنى بأعرف أجيبه كويس وبطريقتنا مش بطريقة الشتيمة اللى ما يملكوش غيرها ".
وأضاف:" ليا كذا رجاء.. أولاً: لو سمحتم لو حد شتم الشخص ده بأمه يمسحها لأن دى مش طريقتنا وأمه ست غلبانه ومقهورة على موت ابنها التانى، ومالهاش ذنب فى اللى بيعمله الشخص ده، وزى ما اتضايقت إن أمى جت سيرتها من شخص زى ده وحقها هعرف أجيبه كويس، ما نرضاش إننا نعمل ده فى ست ما لهاش ذنب".
وتابع:"أى حد اتريق على فكرة المشخصاتى لو سمحتوا يراجع نفسه لأن المشخصاتى شغلانة محترمة بتنقل فكر وحضارة وفيه ناس كتير بيشتغلوها وهما مايستاهلوش الشرف ده، كما أن الكومبارس مش شتيمة والكومبارسات أشخاص محترمون ما جالهمش فرصة ياخدوا أدوار أكبر، وافتكروا إن كل الأبطال اللى بتحبوهم تقريبا بدأوا كومبارسات، وما ينفعش نشبه ناس شرفاء بناس إحنا شايفينهم مش كدة ونعتبر أننا كدة بنشتمهم".
وأكمل "العليمى":"أنا أصلا فى إجازة ومستجم ومش هشغل نفسى ولما أرجع أنتم عارفين أمى ما اتعودتش حقى يبات برة، بس بنجيب حقنا بطريقتنا".
وقال:"خلينا نركز فى معاركنا الرئيسية وما ندخلش فى خناقات جانبية وتافهة علشان ما نفقدش بوصلتنا وعلشان ننتصر ف النهاية، وندى كل حاجة وكل حد حجمه، وطالما قررنا يبقى لنا علاقة بالعمل العام يبقى لازم نقبل أنه ياما هنتشتم، والشتيمة لا بتقلل اللى اتشتم ولا بتزود اللى شتم بالعكس هى دليل ضعف لأن أى عيل صغير ماشى فى الشارع يعرف يشتم ويهزأ أى شخص مهما كان احترامه، خلينا نركز فى المحبوسين ظلم والمنتهكة حقوقهم وفى المستقبل اللى هنبنيه أيا كان التمن، وعيب قوى ناس أسقطت أنظمة وبتحارب علشان تبنى بلد نستحقها كلنا يتخانقوا على شتيمة ورى ما الصوفيين بيقولوا"المتلفت لا يصل".
وأوضح"العليمى":"اللى بيحصل ده معناه أن رجالة مبارك بيقاوموا لكن ده مش هيغير حاجة لأنهم بقوا زى الديناصورات جزء من الماضى وبيحاربوا للعودة وده مش هيغير حقيقة أن المستقبل ليكم حتى لو كان صعب وبدا فى لحظات عكس ده".
واختتم تدوينته :"كل سنة وأنتم طيبين وربنا يخلينا لبعض، وهننتصر طول ما كتفنا فى كتف بعض، ويجعل أيامكم كلها عيد وآخر تعبكم نصر".
التويتات