تامر عبد المنعم: هعلقك يا خاين في التحرير.. وزياد العليمي: حق أمي حاجيبه

هاجم الفنان تامر عبدالمنعم، زياد العليمي، البرلماني السابق زياد العليمي، القيادي بحزب المصري الديمقراطي، واصفا إياه بالخائن والعميل.
وكتب «عبدالمنعم» عبر حسابه بموقع التواصل الاجتماعي «فيس بوك» قائلا: «الكائن الملظلظ اللي اسمه زياد العليمي بيهددني ويعايرني إن أبويا سكرتير مبارك وحمايا محامي مبارك، وأنا بأعلنها قصاد الجميع وبقوله: «إوعى يا تافه يللي من الثدييات تتصور إن صوابعك زي بعضها».
وأضاف «عبدالمنعم»: «أقسم بالله العظيم أجيب أمك من بيتكم وأعلقك يا خاين يا عميل يا حقير في ميدان التحرير بتاعك، والدكر يخلصك مني، اللهم بلغت اللهم فاشهد».
يذكر أن «عبدالمنعم» هو نجل الكاتب الصحفي محمد عبدالمنعم، المستشار الصحفي للرئيس المصري الأسبق محمد حسني مبارك، كما أنه متزوج من ابنة المحامي فريد الديب، الذي يتولي مسؤولية الدفاع القانوني عن مبارك في محاكمته بتهم قتل المتظاهرين إبان ثورة 25 يناير.
وعلق زياد العليمي على هجوم «عبدالمنعم» قائلا: «يا زملا؛ شكرًا جداً على اهتمامكم بموضوع قلة الأدب اللي حصلت امبارح، ولو سمحتوا خلينا نركز ف معاركنا الرئيسية، المشكلة أصلا كانت بسبب كلامي على انتهاك حق دومة في العلاج، وحقي أنتم كلكم عارفين إني بأعرف أجيبه كويس وبطريقتنا مش بطريقة الشتيمة اللي ما يملكوش غيرها وليا كذا رجاء:
أولا: لو سمحتم لو حد شتم الشخص ده بأمه يمسحها لأن دي مش طريقتنا وأمه ست غلبانة ومقهورة على موت ابنها التاني، وما لهاش ذنب في اللي بيعمله الشخص ده، وزي ما اتضايقت إن أمي جت سيرتها من شخص زي ده وحقها هعرف أجيبه كويس، ما نرضاش إننا نعمل ده في ست ما لهاش ذنب.
ثانيا: أي حد اتريق على فكرة المشخصاتي لو سمحتوا يراجع نفسه، لأن المشخصاتي شغلانة محترمة بتنقل فكر وحضارة، وفيه ناس كتير بيشتغلوها وهما مايستاهلوش الشرف ده.
ثالثا: الكومبارس مش شتيمة والكومبارسات أشخاص محترمين ما جالهمش فرصة ياخدوا أدوار أكبر، وافتكروا إن كل الأبطال اللي بتحبوهم تقريبا بدأوا كومبارسات، وما ينفعش نشبه ناس شرفاء بناس إحنا شايفينهم مش كده ونعتبر إننا كده بنشتمهم.
رابعا: أنا اصلا ف إجازة ومستجم ومش هشغل نفسي ولما أرجع إنتم عارفين أمي ما اتعودتش حقي يبات بره، بس بنجيب حقنا بطريقتنا.
خامسا: خلينا نركز في معاركنا الرئيسية وماندخلش ف خناقات جانبية وتافهة علشان مانفقدش بوصلتنا وعلشان ننتصر ف النهاية، وندي كل حاجة وكل حد حجمه، وطالما قررنا يبقى لنا علاقة بالعمل العام يبقى لازم نقبل إن يا ما هنتشتم، والشتيمة لا بتقلل اللي اتشتم ولا بتزود اللي شتم بالعكس هي دليل ضعف لأن أي عيل صغير ماشي ف الشارع يعرف يشتم ويهزأ أي شخص مهما كان احترامه، خلينا نركز ف المحبوسين ظلم والمنتهكة حقوقهم وف المستقبل اللي هنبنيه أيا كان الثمن، وعيب قوي ناس أسقطت أنظمة وبتحارب علشان تبني بلد نستحقها كلنا يتخانقوا على شتيمة وزي ما الصوفيين بيقولوا «المتلفت لا يصل».
سادسا: اللي بيحصل ده معناه إن رجالة مبارك بيقاوموا، لكن ده مش هيغير حاجة لأنهم بقوا زي الديناصورات جزء من الماضي، وبيحاربوا للعودة ودة مش هيغير حقيقة إن المستقبل ليكم حتى لو كان صعب وبدا ف لحظات عكس ده.
سابعا: كل سنة وأنتم طيبين وربنا يخلينا لبعض، وهننتصر طول ما كتفنا ف كتف بعض، ويجعل أيامكم كلها عيد وآخر تعبكم نصر.