رد الاعتبار بالانتصار ا

وفى أنجولا لا السودان عزفوا ولادنا لحن جنان
أذاقوا الخضر كأس الذل أشرب وانسى أم درمان
لاتقولى عنتر ولا عبلة لا تقولى شاوشى ولا زيان
ورابح أفند ى طلع خاسرو لا كانش أبدا يوم سعدان
وأبو لزقة زرقة خلع كتفه أربع أجوان خلوه توهان
ولما بص فى عين حسنى قال يالهوى أسد عطشان
وأبو روراوة شايل طاجن داير بيه يا ناس حيران
قال يا هووه أنا مش قادر اتخنقت من الدخان
هى ناقصة كمان جدو حرام عليكو دا أنا غلبان
مرة يرقص ويدلع كده بصراحة أنا زعلان
الرحمة حلوة يا معلم أنا خلاص جالى سيلان
جيبتو الثانى والثالث الواد حليش بقى حرنان
وشاوشى يا عينى فقد عقله يا ناس خلاص أنا زهقان
يرفس فى جدو ويشلت أشد شعرى حرام دا جنان
حط لزقة فى رقبته وقال يا زيزو أنا خرمان
كسر رقبتى بتصويبته حرام عليك يا عم زيدان
وعبد الشافى لوح وسطى من أول لمسة نازل شرقان
أحسن ألطم وأصوت وأصرخ فى فرقة بقت نسوان
رحت مخلص على جدو سيبت الملعب وأنا حزنان
الفرقة لفت على الفاضى والكل قال أنا تعبان
عبدون مطمور ونذير زيانى يا بلح زيان
سى حسنى فايق ومروق حط بلنتى أحلى نشان
والصقر راسى ومصحصح سرعة تساوى ألف حصان
متعب جمعة والحضرى فتح الله غالى اسقينى كمان
رجالة يا ولاد رجالة وسلمولى على الجدعان
جهازكو واعى ومطاطا مش فرن واحد تلت أفران
الأصل غالب على المصرى ما بنفرقش بين الألوان
المصر ى مسلم ومسيحى قلب واحد مهما كان
المصرى عصرى فى أخلاقه ليل ونهار فى كل أوان
أخلاقنا راية خفاقة صلاتنا دايما كل أذان
تشوفه ساجد فى الملعب شاكر لرب كريم منان
حقق فوزه بجدارة قطع لسان رابح سعدان
نيجيرى غانى وكاميرونى إيفوارى صبح والله زمان
واسأل جيرمى على خيبته وقوله عيب يا عم جبان
خدلك تلاته يا معلم وسيب سونج عايش قرفان
والتالتة تابته يا معلم مصر الخير جيبك عمران
أنا قلت كل إللى فى نفس ى إدينى عقلك أنا فرحان
يارب كلل مجهودهم ما تحرمنيش أنا طمعان
يارب كمل فرحتهم خلى طريقهم كله أمان