جنازة 48 يوما بدون ميت.."محمد":أخويا مات وأمى هتحصلو من حرقة قلبها عليه عايزين جثته ياعالم..سافر من غير مانعرف فى مركب صيد بعد ما كفر بالفقر اللى أحنا فيه أصله كان نفسه يساعد أمه بدل قعدته عاله عليها

"كل ذنبنا فى الحياة اللى بنتعاقب عليه كل يوم أننا فقراء ممنوع علينا كل حاجة محرومين حتى من الحلم واللى يفكر فى يوم يهرب من الفقر فى مركب صيد لبلاد بره بيرجع جثة لأهله، بس للأسف أحنا بقى عكس كل الناس حتى جثة أخويا مش عارفين نجيبها لينا 48 يوم والحكومة بتلففنا كعب داير، يا ناس إكرام الميت دفنه هاتولى جثته أبوس إيديكم".. هذه كلمات الأخ المكلوم "محمد.طلعت" ل"اليوم السابع" والذى لقى أخوه حتفه أثناء رحلة هجرة غير شرعية إلى إيطاليا أثر غيبوبة سكر والذى لم يسعفه القدر للوصول إلى الحلم.
وتابع "محمد" فى حزن يحكى مأساة الفقر بقرية فاقوس بالشرقية قائلا: "الفقر والعوزة فى قريتنا يخلى أى حد يكفر بالحياة، الناس بتقضى عشاها نوم عشان تقدر تكمل عيشة وأحنا أبونا مات وسابنا من عام 91 وأمنا اتكسرت علينا وحاولت تعلمنا بس ما باليد حيلة طلعنا أنا وأخويا من غير شهادة كبيرة وكانت أخرتنا دبلوم وملقناش وظيفة وبعد 23 سنة قرر أخويا يهرب من غير ما نعرف ويخاطر بحياته مقابل الحلم وياريته عاش معانا ولو كلناها بالملح".
وأكمل "محمد" يروى تلقيه خبر وفاة أخيه: "بعد غياب أكتر من 3 أيام لأخويا من غير حس ولا خبر قررت عمل محضر بقسم شرطة فاقوس بالشرقية وانتظرنا أن ربنا يبعت لنا خير من عنده وييجى أخويا ولكن للأسف جت مكالمة رديت عليها كان صوت شاب قولتله مين معايا، رد، أنا اللى كنت مع أخوك فى المركب اللى سافرت إيطاليا، قولتله إيطاليا إيه ده النمره غلط، رد عليا: أخوك كان مسافر معانا وهو على المركب فجأة إغماء وحاولنا نفوقه مردش علينا.. أخوك مات يا محمد.. ولما وصلنا إيطاليا سلمنا جثته للشرطة اتصل وأسال عليه وقفل.. ومن يومها وأنا بدور على أخويا.
وأكمل "محمد": لجأت لوزارة الخارجية وعرفت منهم أن أخويا توفى بسبب غيوبة سُكر ولأننا فقراء حاولت أجيبه على نفقة الدولة وللأسف ليا 48 يوم عامل عزاء من غير "ميت" والناس قالت الدولة مش هتجيبه وبالفعل دا اللى حصل وردوا علينا أن الشرطة الإيطالية ما زالت بتبحث سبب موته، وهى سبب التأخير بالرغم من أن الشرطة الإيطالية أخطرتنا بضرورة تسلم الجثة، مش عارفين نصدق مين أمى هتموت بحسرتها على أخويا".
فيما قالت والدته "أمل حسن" البالغة من العمر 60 عاما وهى ترثى ابنها فى حسرة: ابنى مات من الفقر وأنا السبب أنا اللى جبته للعذاب ومعرفتش أحميه ومش هسامح نفسى.
وتابعت فى بكاء: هاتولى جثة ابنى أدفنه جنبى أرحموا قلبى اللى بيتقطع عليه مش كفاية مات من غير ما أشوفه يا عالم إكرام الميت دفنه أرحموا أم مسكينة ملهاش حد دا اتكسر ضهرى وأنا بربيهم عايزة أدفن ابنى جنبى عشان لما أموت أدفن معاه.
أحمد ضحية الهجرة غير الشرعية
محمد شقيق الضحية
صورة أحمد وعليها علامة الحداد
تعطل مركب هجرة غير شرعية فى البحر بالإسكندرية