:لخبطة

المحور اللى اتفتح.. بالونش جم قفلوه
والموكب اللى عبر.. ميت عسكرى حيّوه
والشارع اللى اتردم من شهر.. ليه شقّوه؟
والحالة صبحت عدم والدعم أهو رفعوه
خليك معايا وصحصح للأمور ديه
أصل الحكومة دى من طينة سويسريه
الله عليه العوض.. غنّى يا واد ظلموه
***
كان إيه لزوم الضريبة والبكش على مين؟
والحفلطة فى المجالس ولا سب الدين؟
علشان نقول الحقونا والغلابة لمين
بعديها يظهر جدع عترة بفم متين
يعفينا من ربعها أو نصها ويزيد
ويطبلوا فى الجرايد: "الرياسة حديد"
والخلق يتمرمغوا فى الأرض منبطحين!
***
لو كل واحد ضرب نفسه قلم حيفوق
وان صدّره للّى جنبه تبقى قلة ذوق
بس الحريقة ماتصبحشى رماد وتروق
من غير ما ندلق عليها جردل المزنوق
ماتكونش فاهم غلط وإياك تقول دا قبيح
أنا بس قمت النهارده قلت حبقى صريح
من يوم ورايح ولو كان الثمن.. مشنوق