عزة أحمد ياسين

ده اسمها بالكامل.. هى بنت فوق الوادى ناطرانى بحبها، ومن اسمها باكتب معانى، عارفك مش طالبة غير الستر وفاهم كلامك رغم أحزانك ونظره لعيونك تزلزل هموم الدهر، وكلمة عتاب ليا فى أرض من غيرك، أطمس نجوم الليل فيها وأعاند الدهر وأضوى برمشى ظلام ينور لياليكى رغم حالة القهر،بحبك يا عزة حب فارس مغوار اخترق الجبال وصارع أسود الصحارى وعدى كل الحدود سد كان أو بحر، وأوصل أراضيكى وأطلب أعود بيكى وعن كتاف أهلك أنفض تراب الغدر، ويكون الأمل ليا تبصى فى عنيا وتشعرى بيا وحبى هو السحر، وأحكى لأحبابى وأقول لأصحابى هاوفى ليكى الندر، والندر هو الستر ، وأحميكى من طاغى بيحوم حواليكى وأنيابه كلها شر، خلاص أنا مصمم، وناوى أكون صامد وبدمى أفديكى وسانن حدود سيفى ورمحى يتكلم ولا فيه سبب ولا عذر، يمنعنى أشوف والدك وأضحى من أجلك وأصبح كمان شهيد فى صورة البدر، يابنت أحمد ياسين أبوكى هو القدوة وهم غدارين فاكرينه راح بالموت أبدا ده حى يرزق فوق واضح ضياه كالدر، رغم أنه كان على كرسى لكن إرادته تكفى لرهبة الأوباش وذلهم ليلة القدر، سألونى عزة دى مين، وأنا قلت سامحونى لوحة مفاتيحى ناقصة حرف الغين واخترت حرف العين وكلامى عن غزة جنة فلسطين بنت الشهيد الغالى أحمد ياسين يا مهرة خلاص جايلك أسدد المهر.