ننشر نص كلمة السيسى فى احتفالية ليلة القدر وسط رجال الدين والدولة.. الرئيس: مهم ألا نكون حافظين للقرآن فقط بل قادرين على فهمه.. الأزهر دوره عظيم وله منا كل الدعم.. ووالله لن نترك قتلة شهداء الفرافرة

كرم الرئيس عبد الفتاح السيسى عددًا من حفظة كتاب الله الكريم وعددًا من ذوى الاحتياجات الخاصة والمكفوفين خلال الاحتفالية بليلة القدر، التى أُقيمت فى مشيخة الأزهر، بحضور المهندس إبراهيم محلب، رئيس مجلس الوزراء، وكِبار رجال الدولة، وفيما يلى كلمة السيسى فى الاحتفالية.
"بسم الله الرحمن الرحيم، الحضور الكريم، كل عام وحضراتكم بخير وسلام، اسمحوا لى فى البداية ان اتوجه ليكم جميعا بكل التحية والتقدير والاحترام، واهنأ المتسابقين اللى احنا كرمناهم النهاردة، وحتى المتسابقين اللى ماكانوش ليهم حظ يكونوا معانا النهاردة، وكمان أحيى الضيوف من الدول العربية الشقيقة والدول الإسلامية الصديقة أهلا وسهلا بكم".
وأضاف: "أتحدث إليكم اليوم بالاحتفال بذكرى ليلة القدر والحقيقة فى كلمة أنا مجهزها صحيح بس هاتكلم كإنسان مسلم مهموم بدينه، مهموم بشكل دينه ومهموم بالإساءة لدينه، جميل أن نحتفل بحفظة كتاب الله دا كويس، لكن المهم أن نحتفل بفهم حقيقى وأبحاث حقيقية لكتاب الله، مهم قوى إن إحنا مش بس نبقى حافظينه نبقى فاهمينه فهم حقيقى ما أمكن بما يتناسب مع العصر الحالى وهو جاهز لهذا التحدى، وكمان ممارستنا ليه، وأتصور إن إحنا محتاجين لمثل هذه المسابقة لنضيف ده، نضيف هذه البنود والأبحاث والدراسات، التى أكيد هى موجودة وأكيد فيه ناس شغالة فى ده، لكن محتاجين إلقاء الضوء عليها ونشوفها فى ليلة احتفال زى كده، وفى مناسبة تكريم متسابقين زى كده".
"إحنا كتير مننا حافظ الكتاب، لكن كمان فى ناس بتقتلنا حافظة الكتاب، عشان كده بقول بلاش اتكلم بورق، أنا بتكلم بهموم إنسان يرى الإساءة الحقيقية لدينه على وجه الأرض واحنا بنتفرج عليها بشكل أو بآخر، وسايبين الإساءة دى، وبندور فقط إذا كان فيه أذى لينا، ومتصور أن الإيذاء الأكبر ومتصور إنى هاتحاسب على غيرتى على الله ودينه أن أسمح بالإساءة لهذا الدين وتقديمه للناس بالشكل المتقدم بيه".
وتابع: "خلينا نتكلم بوضوح أكتر، الإسلام تكلم عن الصدق يا ترى تميزنا وسط الأمم بالصدق والإتقان والسماحة، فهل تميزنا وسط الأمم بالصدق والإتقان والسماحة، فيه كلام كثير موجود يا ترى إحنا فين منه، علشان كده الأزهر دوره عظيم جدا كمؤسسة دينية وله منى ومنا كل الدعم، لا أجامل علشان أنا فى هذا المحفل والمناسبة أنا أتلكم عن دور أتحاسب عليه وهانقف أمام ربنا يوم القيامة هنت عليكم تقدمونى للناس بهذا الشكل ولم تحركوا ساكنا".
واستطرد فى كلمته "الخطاب الدينى يتطور بالتطور الإنسانى، لن نتكلم أبدا فى ثوابت الدين، مافيش حد يقدر يتكلم فيها، لكن الخطاب الدينى بالتعامل مع الناس مش ممكن أبدا يكون غير قادر على التعامل مع التطور الإنسانى الذى خلقه ربنا، والذى خلق الأديان هو ربنا والذى خلق التطور الإنسانى هو ربنا، ولم يتقاطعا، لكن إحنا ممكن نكون مش قادرين نطوره بالشكل الذى يتناسب مع هذا التطور، مش معقول إن إحنا ننعزل عن محيطنا، أنا مش بتكلم عن أهل الوسطية والسماحة، أنا أتكلم عن فصائل بعينها أساءت لينا، والحالة التى نراها بدون مبالغة فى العالم اللى حولينا مش ممكن".
واستشهد السيسى بالحديث النبوى الشريف: "إنما بُعِثت لأتمم مكارم الأخلاق"، مضيفًا "فين المسابقات التى تؤكد هذه الممارسة؟، لو جبنا مجموعة من المدرسين يتميزوا بمكارم الأخلاق، ممكن نعمل كده، ولو جبنا أفضل مسلسل ومذيع يقدم مكارم الأخلاق فى الراديو والتليفزيون اتسموا سلوكهم بمكارم الأخلاق، سواء فى مجال الصحافة والإعلام وأى مهنة أخرى ناس اتسمت بمكارم الأخلاق".
وأضاف: "أتصور أننا محتاجين نضيف لمسابقة حفظ القرآن المعانى الطيبة اللى ديننا طالبنا بيها، وفضيلة وزير الاوقاف وشيخ الازهر فكروا فى ده، احنا كتير مننا حافظ الكتاب لكن فيه ناس كمان بتقتلنا حافظة الكتاب، عشان كده بقولولكوا بلاش اتكلم بورق، الازهر ورجال الدين من فضلكم ستسألون انتم الاول وانا معاكم طالما انا فى مكانى وانا مستعد لدعمكم من أجل تقديم خطاب دينى سَمِح حقيقى يعبر عن الإسلام والمسلمين أمام العالم".
"كان فيه ناس بتقول فيه رسوم مسيئة للإسلام أو لرسول الإسلام الناس تنفعل وتتألم، أنا كنت بقول يا ترى احنا كمان بنسيئ ولا لأ، إحنا زعلانين من اللى بيعمل أفلام ورسوم مسيئة طيب يا ترى إحنا عملنا إيه؟، فى الأول والآخر ما قدمناه وما نقدمه للناس من ممارسات هى اللى خلت الناس تطمع فينا وتهاجمنا بسلوكيتنا أنا بتكلم بحاول أكون متجرد ومنصف فى هذه المسألة.. الاحتفال بليلة القدر جميل وعظيم لكن يستدعى فى نفسى الأشجان دى، والحقيقة مش عندى مسألة أو اتنين، الكلام ده بفكر فيه بقالى أكثر من 40 سنة، كنت مهموم بيه وبدينى، ليه احنا بنمارس دينا بالشكل ده.. نحتاج نعمل جهد كبير قوى فى كل مؤسساتنا، علشان نقدمه بالشكل الذى يرضى عنه الله سبحانه وتعالى".
"مش عايز أطول عليكم، أهنئ كل المتسابقين والناس الطيبة التى حضرت والضيوف الكرام وبقول دى ليلة 27.. انا بطلب منكم ومن كل المصريين وكل المسلمين من فضلكم الليلة دى طيبة جدا ارجو ان تدعوا ربنا سبحانه وتعالى من فضلكم الناس الغلابة تدعى.. الناس المساكين تدعى.. الناس المرضى تدعى.. الناس اللى ظروفها صعبة تدعى الله سبحانه وتعالى ان يوفقنا وينصرنا وربنا يوفقنا جميعا".
وقال "عسى الله سبحانه وتعالى ينظر الينا بعين الرحمة، بقول يا رب، أنا يمكن بقول يارب يمكن ما يكنش ليا خاطر عندك، بس استحلفك بخواطر من ليهم خاطر عندك، ان تهدينا وترحمنا وتكرمنا وتنصرنا وتعطف علينا، انا بقول كده يكون فيه قلب طيب ونفس سمحة ولسان طاهر يستجيب ربنا ليه علشان كده بقول كل الناس من فضلكم دا مش هايخلينا ما نشتغلش".
"قبل ما خلص الكلام فضيلة الامام شيخ الازهر كان بيتكلم عن واقعة الوادى الجديد فى الفرافرة، عايز اقوله يا فضيلة الامام ولكم فى القصاص حياة، ما كنتش احب اكون فى الليلة دى عنيف، لكن والله لن نتركهم، واحنا متأكدين وانا متأكد ان شاء الله من النصر.ز نصر ربنا لأن ربنا ينصر اهل الحق على الباطل وهما اهل الباطل، وكل من قتلنا فى الايام الماضية ربنا اعنا عليه، يا قبضنا عليه يا قاومناه وقتلناه، انا بقول لكم كده علشان تبقوا مطمنين، مستعدين للموت دون وطننا بلدنا مصر ودون ديننا لا توجد اى مشكلة والامر واضح جدا، احنا على الحق المبين، وعلشان كده بقول ولكم فى الحياة قصاص يا اولى الالباب، لن نتركهم هما واللى بيساعدوهم".
"ان شاء الله انا هتكلم فى اخر كلمة هاوجهها لحضراتكم وللمصريين لصندوق تحيا مصر، احنا عندنا مشكلة كبيرة، المشكلة دى هى العَوَز، واحنا انشاء الله مصممين على ان نتغلب عليها وعلشان كده احنا عملنا صندوق تحيا مصر والقادرين كتير جوه مصر وبره مصر، ومش هاتخلى عن مجابهة الفقر فى مصر، سأقاتلها لأنه احد اسباب ما نحن فيه، علشان كده بفكر نفسه وبفكركم هذا الامر اذا لم يكن معنا ما نعمل بيه بجد للمسكين والغلبان وللشباب اللى بالملايين لا عارف يتجوز ولا عارف يشتغل طيب وبعدين وما عندوش امل".
وأنهى السيسى كلمته "أنا مصمم على الهدف أن يكون فى الصندوق 100 مليار ومسائل كثير تركت لسنوات كثيرة، من فضلكم لكل المصريين داخل وخارج مصر من فضلكم مايصحش ان مصر تكون محتاجة منكم وماتلبوش لها كما ينبغى بأشكركم جميعا وبقولكم كل سنة وانتم طيبين وبقول لكل المصريين والأمة العربية وكل الناس كل عام وأنتم بخير شكرا والسلام عليكم ورحمة الله وبركاته".
موضوعات متعلقة..
الرئيس السيسى يتعهد بالقصاص لضحايا حادث الفرافرة من الجناة
الرئيس السيسى: من المهم أن نحتفل بفهم حقيقى لكتاب الله
الرئيس يكرم عددًا من حفظة كتاب الله خلال احتفالية ليلة القدر
بالفيديو.. لأول مرة.. طفلة تفتتح احتفاليات ليلة القدر بتلاوة القرآن
شيخ الأزهر: هناك مستعمرون يريدون تفتيت العالم العربى
وزير الأوقاف: بلد فيها الأزهر لا يمكن أن تختطفه يد التشدد