أطفال الشوارع

فتحت عينى على الرصيف
مش لاقى هِدمة ولا حتى رغيف
نايم فى الشارع شتا وصيف
ونوم الشوارع والله مُخيف
وأنا إيه ذنبى.. وإيه عملت
يا وجع جنبى.. من نوم الأسفلت
بشكيلك يا ربى.. يومين ما أكلت
دا غير المستخبى .. ولغيرك ما قُلت
مش عارف ليه.. الناس بيلومونى
وأنا ذنبى إيه.. دا ذنب إللى رمونى
دا مجنى عليه.. وكمان بيحكمونى
وبجيب الجنيه.. بدمع عيونى
يا ترى مين أبويا
ويا ترى مين أُمُى
ياترى مين أخويا
ويا ترى مين عمى
ما صعبتش عليكم
وإنتوا بترمونى
فى الشارع بإيديكم
طب ليه جبتونى
نوم الشوارع ده أكبر خطر
كلاب ووحوش وبرد ومطر
مش لاقى حد يحن عليا
ولا قلب أم عليا انفطر
لكن عندى أمل فى ربنا
يحنن قلوب تبعدنى عن هنا
وتطبطب علينا وتخفف عننا
علشان الذنب مش ذنبنا