مش ذنبي !!

كتبت : أميرة زكريا .... مش ذنبى إنى اتعلمت أخاف مدرسينى قبل ما احترمهم!، مش ذنبى إنى بفرح كتير بماتش كورة نكسبه.. ما الأفراح فى بلدنا قليلة!، مش ذنبى إنى بحلم ابقى حاجة، وأنا طاقتى ولا حاجة!، مش ذنبى إن الشوارع متسرش، مع إنى مبرميش فيها حاجة!، مش ذنبى إن المواصلات زحمة، ماهو ماحدش شاف اليابان عملت إيه!، مش ذنبى بعد يوم طويل ألاقى إعلانات تفور الدم فى تليفزيون بلدنا!، كتبت : أميرة زكريا .... مش ذنبى حال الغلابة فى بلدنا، ونفسى أعرف ذنب مين!، مش ذنبى أشوف اطفال مرمية فى الشارع، حالهم يبكى أكتر من حالنا!، مش ذنبى لو سواق الميكروباص مشى عكس الاتجاه، علشان غيره قفل الطريق ومحترمش حد!، مش ذنبى إنى طلعت بحب الجيش، ومش قادرة أخون حد فيه!، مش ذنبى تتبخر أحلامى أنا وكل المصريين بإشارة من الطرف التالت!، مش ذنبى إنى مبعرفش أكتب كلام يعبر عن غضبى!، مش ذنبى إنى مبنزلش فى مظاهرات، ومتمناش تجبرنى الظروف عليها!، مش ذنبى إنى عايزة افرح وافتخر بناسى من غير وجع قلب!، مش ذنبى إنى بحب بلدى، مع إنها مليانة هموم ومشاكل!، مش ذنبى إنها أحلى فى عينيا من أحلى بلد فى الدنيا!، مش ذنبى إنى عندى أمل فى بكرة مع إن الدنيا عاتمة!، مش ذنبى إنى مصرية.. دى أحلى ميزة فى الدنيا.!