التار

ليه القتل وليه التار؟! = تعالوا نعيش الدنيا عمار
تعالوا نسامح بعض ونصفح = نلاقى الحب طرح أشجار
بلاش نخلِّى حياتنا عذاب = هروب وتربص ليل ونهار
لمَّا بإيدك تاخد حقك = تصبح غابه وتبقى دمار
لمَّا بتقتل نفس بريئه = غضب المولى عليك والنار
معانا قانون يدينا حقوقنا = ميزان العدل دا لينا شعار
طفل برئ بيموت إيه ذنبه ؟! = وتقتل حلمه ف عز خضار
جبن وغدر كمان وخيانه = لمَّا تهاجم ناس أبرار
تقتل تدبح تفسد أرض = تنوى جريمه فيها اصرار
قسوة قلب بشكل غريب = لو قلنا صخور نظلم أحجار
دايرة حرب أديها مفتوحه = نفس الخطأ يجيب تكرار
لمَّا الدم الطاهر يسيل = طعم الدنيا هيبقى مرار
هتعيش محروم من كل أمان = هتعيش متهدد قط وفار
وكل أمالك راح تتحطم = وحابس ابنك بين أسوار
حل مشاكلك قبل ماتكبر = شوف أسبابها وطفى شرار
بتجيب سلاح بقوت أولادك = وتزرع حقد ف قلب صغار
بتقتل أحسن ورده ف أسره = وتقول العيله غسلت عار
ليك السجن أديه مستنى = وابنك سابك هرب وطار
أهلك بيتك حلم وراح = باقى خراب عشعش فى الدار
سيبوا عادات الجهل تموت = ضميرنا ودينا وليه نحتار
دا التار عمره ما حل مشاكل = ندم ودمع وبيت منهار
شوف المجنى عليه والجانى = تلقى الكل عليه أدوار
فين تعليمنا وفين إعلامنا ؟! = تحسين دخل كمان أفكار
لسَّا صعيدنا حقيقى محروم = محتاج نظره ياناس ياكبار