أنا مش بعشق الأحزان

قالتلى وهى تتكلم
بتعشق أنت أحزانك
وتشعر وانت تتألم
بلذة جرح من خانك
عبيطة دى ولا أيه يا زمان
سؤالها ما كنش له داعى
أنا الآهة فى كل زمان
وهى بتنكر أوجاعي
أنا مش بعشق الأحزان
ولا نفسى أبات مغلوب
أنا مشكلتى إنى إنسان
فهمت الدنيا بالمقلوب
فهمت إن الأمل إحساس
نحسه فى عز أحزاننا
وكلمة حب تجمع ناس
برغم السوء فى أحوالنا
فهمت حاجات كتير بالعكس
وعكس العكس له معنى
لابد ما تمشى فيها عكس
وعكس السكة يجمعنا
كلام فاضى مابفهمهوش
ولا أصدق تقاليده
وشوش لابسة قناع مغشوش
فصبح الوش تقليده
أنا الغلطان من جهلي
فهمت الدنيا متأخر
حسيبها ومهما تندهلى
هكون أطرش وحتأخر
أنا مش عاشق الأحزان
ولا كاره دموع عينى
أنا ذكرى فى جسم إنسان
بتسألنى أنا فينى
عرفت إن الأمل كلمة
نصبر بيها أحزاننا
وكل الحب ده كدبة
فلا معنى لأحلامنا
واهو زى البشر عايش
على أمل إنه يجمعنا
ولو عاشق لأحزاني
أقله دا عشق لُه معنى!