بالصور.. وليد طبع صورة "السيسى" على نتائج العام الجديد عشان يكسب زبون

طلب الرزق هو ما دفع الشاب الثلاثينى "وليد جاد" لطباعة صورة الفريق عبد الفتاح السيسى على آلاف النسخ من نتائج عام 2014، لأنه يعلم أن حب كثير من زبائنه لشخص الفريق سيجذبهم لنتائج "تسلم الأيادى"، التى يقف بها على رصيف شارع الفجالة الشهير ببيع الأدوات المكتبة.
جاد الذى يبيع الأدوات المدرسية والنتائج منذ 10 أعوام فكر فى الخروج عن الأشكال المتعارف عليها لنتائج العام الجديد كصور الكعبة أو الشيخ الشعراوى، وطبع صور السيسى على النتائج هذا العام قائلا: "الناس بتلاقى صورة الفريق السيسى على أى حاجة بيشتروها، عشان بيحبوه وحاجة زى كده عليها إقبال جامد، عشان كده طبعت منها لحد دلوقتى 3 آلاف نسخة وقربت أشطبهم".
3 جنيهات هو سعر نتيجة "تسلم الأيادى" التى تحمل وجه الفريق عبد الفتاح السيسى يدفعهم زبائنه عن طيب خاطر، معتبرين أنهم أصابوا عصفورين بحجر واحد، حيث اشتروا نتيجة العام الجديد واحتفظوا بصورة السيسى عليها فى بيوتهم.
يقر جاد أن دافعه الأول هو الرزق لكن هذا لا يمنع حبه للفريق قائلا: "بحب الفريق السيسى بس نفسى يفضل وزير دفاع وميترشحش للرئاسة عشان أى حاجة هتحصل فى البلد بعد كده الناس هترميها على الرئيس، وهيقولوا إن اللى عمله للبلد كان عشان الكرسى"، مؤكدا أنه محبوب فى منصبه كوزير للدفاع أكثر من كونه رئيسا للجمهورية.