إحنا لو عايشين فى غابة

فيها إيه قرشين زيادة
قصدى لو جنيهين زيادة
يووووه...
قصدى لو عشرين جنيه
هيه فارقة معانا حاجة
ولاّ إحنا نبقى حاجة
علشان نقول
اللى إحنا معترضين عليه
أيوه فارقة
أيوه هاتكلم وأقول
إنه مش فرض القبول
وأنا ليا اعتراض
أيوه فارقة
أيوه هاتكلم بحق
والكلام يطلع بصدق
مش خيال أو افتراض
مصر فيها كتير غلابة
وإحنا لوعايشين فى غابة
كان ح يحمينا الأسد
مش يسيبنا للديابة
مصر فيها ناس وناس
ناس معاها ..
وناس عليها الفقر داس
وإحنا عايزين لقمة حلوة
مش مناجم فيها ماس
النهاردة سولار بيغلي
والحديد كان قبله أغلي
خوفى ييجى يوم علينا
والهوا فى بلادنا يغلى
خوفى ليعبوه فى كيس
خوفى ع الشعب التعيس
خوفى لا اللى معاه يعيش
والفقير يموت فطيس
صدقونى أنا نفسى أعيش
بس فين العيش مافيش
مش باقول اللحمة فين
أصلها ماتهمنيش
مش هاموت فى البعد عنها
الدكاترة حذرونى وقالوا تاكل
حتة واحدة بس منها
قلت فين الحتة قالوا ماتلاقيش
مش مشكلة مايهمنيش
دانا نفسى بس والله أعيش
نفسى أقوم الصبح
أشوف مصر الحضارة
نفسى أحس بجد إننا نملك إرادة
مش بنتكلم وبس
كتر الكلام ماهوش شطارة
وفيها إيه قرشين زيادة
فيها إيه على الغلابة
فيها إيه ياشعب طيب
ياللى عايش جوا غابة
فيها إيه لو يوم أسدنا
حطنا ف وش الديابة