أنا مكسوف أتكلم

انا مكسوف اتكلم خالص والموضوع خلانى حزين
لكن ماهينفعش انى اسكت ولا هادفن راسى فى الطين
هاتكلم علشان إتفشى وسطينا سرطان لعين
واقف هنا ننوس عين مامته وصفاته مش بنى آدمين
بيعاكس فى بنات الناس وسط الشارع والميادين
ومفيش مانع قال يتحرش بيهم وهما ماشيين
وان قلتله دا يبقى حرام أو برهنت كمان بالدين
بيقول اسكت منتاش فاهم كل الستات كده عايزين
والبرهان أهو باين واضح فى اللبس مش محتشمين
جنز وبدى واللبس الفاضح خلونا زى المجانين
بعد ده كله تقولى حرام قول والنبى دا حرام على مين
أيوه حرام ياأخى على أهلك فيهم بتجرح وتهين
وكأنك انت الضحيه وهما اللى ليك ظالمين
افرض كانت امك ،اختك؟ أو حتى لو كانت مين
راح تسكت لو حد عاكسهم ولا تحارب فى الملاعين
لازم نقضى على المتحرش يتعامل زى الحيوان
لو مش قادر يحكم نفسه بايدينا نفصّله لجام
يُضرب قدام كل الناس بالشبشب أبو ورده كمان
لازم يتعاقب وبشده بالقوانين والأحكام
ويكون عبره لكل أمثاله لازم يُعدم فى ميدان عام