مش جميلة

مش جميله
بس أنا باشعر واحب
مش جميله
بس عندى يا خلق قلب
ليه نصيبى تمللى جارح
مش كفايه قاسيه الملامح
زيكم وف قلبى روح
نبض يعشق أو يبوح
ليه تقابلونى بجروح
واعتبرتوا الشكل ذنب
هى غلطه لونى أسمر
أو عيونى ماهيش بتسحر
ما تقيسوها بلون دموعى
لما نظراتكم بتكسر
و الألم ده بجد صعب
ذنبى انى مش طويله
وابتسامتى مش جميله
اعتبرتوا الحسن فضل
والوحاشه بقت رزيله
والقبيح ما لهش قلب
بس قلبى .. رغم قبحى .. لسه شايل نبض شوق
لسه بتحرك مشاعرى أى بسمه تاخدنى فوق
فجأة أطير وأفرد عنادى
وأنسى تفاصيلى وملامحى
ألقى قسوتكم قصادى
والنتيجة بتبقى جرحى
خدتوا منى الحق إنى أكون حبيبة
شكلى.. وسط الخلق خلا غرامى.. عيبة
والمصيبة
أن عندى م المشاعر كم فوق طاقة البشر
بانسى نفسى واما أقرب .. قلبكم زى الحجر
خليتونى شايله وصمه .. ذنب ومحال يغتفر
م المراية بقيت باخاف
نفسى أشعر باختلاف
لما تشوفونى بعيونكم
مش ورا حروفى اللطاف
ما أستخباش م العيون
ولا تقتلنى الظنون
نفسى أتحرر وأخرج
بره سجن ..... التليفون
مش جميلة
بس إنسانة وبحب
مش جميلة
بس عندى .. يا خلق ... قلب