الحد الأدنى للأجور

فك الحزام شويه هيزيد مرتبك
معدش يوم ما تقبض الهم هيركبك
الحد الأدنى كافى تعيش عليه سنه
والحد الأقصى طبعا بعيد عن اشنبك
. ..
فك الحزام شويه وافتح للخير مكان
ولو ان المعده قفلت ونشفت من زمان
وبطل تانى تمشى تبحلق للمطاعم
وابعد مناخير سيادتك عن مطبخ الجيران
. ..
وياريت كمان توسع هدومك القديمة
وتلبس اكس لارج واسع فضفاض وقيمة
وشوف جزار قريب بيتوصى وطيب
وكل شهر اعمل لاولادك وليمه
. ..
وأن كنت نسيت مكان الفكهانى إللى جنبك
روح أتعرف عليه واحكى وافتحله قلبك
وقوله آخر يناير هجيلك بالبشاير
والحد الأدنى هو اللى هيخلينى أحبك
. ..
وامسك نفسك شويه متقولش الخير كتير
وتبعزق فى المرتب وتعيش زى الوزير
وكفاية ربع لحمة أو نص كيلو كرشة
وكفاية فرخة بيضة لو جالك ضيف كبير