فى ذكرى عبد الناصر

مهما تمر الحياة وتسافر الأزمان
اسمك هيفضل عظيم عالى فى اسمى مكان
كفاياك فى يوم الوفاة ملقوش معاك مليم
وضبطوا فى خزنتك من الهموم ألوان
...
جسدت معنى الشرف فى الفعل قبل القول
وكنت عن كل مصرى فى الوطن مسئول
ملكتنى الأفدنة ومكنش حيلتى قيراط
وكنت بالمُعدمين والتعبانين مشغول
...
السد يشهد بأنك فتحت باب الخير
وبنيت مصانع وكان إنتاجها لينا كتير
تشهد قناة السويس أنك نبيل وشجاع
وبورسعيد والسويس شاهدين على التعمير
...
مهما تمر السنين راح نذكرك يا جمال
ومصر هتخلدك أجيال ورا أجيال
غنينا باسمك وقولنا الشعر فى حياتك
ولحد ألفين سنة فيك المديح يتقال
...