لحظات الموت فى اعترافات الناجين من مذبحة الاتحادية

استكمالًا لروايات الناجين من مذبحة الإخوان على أبواب قصر الاتحادية، الذين اتهموا بأنهم من مثيرى الشغب، تنشر «الدستور الأصلي» الحلقة الثانية من نص تحقيقات النيابة مع 5 ممن تم التعدى عليهم وسحلهم على يد شباب من جماعة الإخوان المسلمين، من بين المجنى عليهم طالب كان ينوى توصيل ابنة عمته، وكان بحوزته ألفا جنيه استولى عليها مؤيدو قرارات الرئيس، وتحدثوا إليه: «دى فلوس تمويل.. مين اللى بيديهالك؟»، قبل أن يتعدوا عليه بالضرب، وأصابوه بجروح قطعية بالأنف، وفى أنحاء متفرقة من جسده، فى حين قال حلاق من بين المجنى عليهم إنه كان ذاهبًا إلى وسط البلد قبل أن تقوم مجموعة ملتحين بالتعدى عليه.

حلاق: خلعوا ملابسى نهائيًّا وسحلونى وكانوا بيقولولى «إنت جاى تموت إخواتنا فى الإسلام.. ومين اللى محرضك وأنت تبع حمدين»

المتهم الثامن:

خدونى وودونى للضابط وقعدوا يضربوا فيا وكان معايا ألفين جنيه خدوهم منى وقالولى دى فلوس تمويل

■ اسمك وسنك وعنوانك ووظيفتك؟

- عبد الله حسين محمد موسى، 18 عامًا، طالب، مقيم بالحى الثامن بالمنطقة التاسعة، شارع عبد العزيز عيسى بمدينة نصر.

■ ما الذى حدث؟ وما ظروف ضبطك وإحضارك؟

- اللى حصل إن أنا إمبارح كنت بوصل بنت عمتى للشركة اللى شغالة فيها فى شارع الميرغنى، وبعد كده، وأنا راجع وبركب العربية لقيت ناس وقفتنى وواحد منهم سألنى انت من الثوار، فأنا قلت لهم لا، ولقيت ناس بدقون اتلمت علىّ وطلعت لهم البطاقة وكارنيه الجامعة والرخصة بتاعتى، وقالولى هنشوف تليفونك وقالولى إنت شكلك من الثوار، وخدونى وودونى للضابط، وهما واخدنى فقعدوا يضربوا فيا وكان معايا ألفين جنيه خدوهم منى وقالولى دى فلوس تمويل وصورنى وسألونى مين اللى بيديك فلوس، وأنا قلت لهم دى فلوسى وهصلح بيها العربية وبعد كده الشرطة خدونى وجابونى على هنا دلوقتى.

■ متى وأين حدث ذلك؟

- الكلام ده حصل 5/12/2012 الساعة السابعة فى شارع الميرغنى.

■ ما سبب وجودك بالمكان والزمان سالفى الذكر؟

- أنا كنت وقتها بوصل بنت عمتى وكنت مروح،

■ ومع من تقابلت آنذاك؟

- هم ناس بدقون من جماعة الإخوان المسلمين.

■ وما مضمون الحوار الذى دار بينك وبين هؤلاء الأشخاص؟

- هما قالولى إن أنا باخد فلوس ومتمول وشافوا الكارنيه الجامعة والبطاقة والرخصة.

■ ما الذى دعاك إلى الاقتراب من محيط قصر الاتحادية آنذاك؟

- عشان أنا كنت بوصل بنت عمتى.

■ وهل لك نشاط سياسى أو انتماء حزبى؟

- لا.

■ ومن هم الأشخاص الذين قاموا بضبطك آنذاك؟

- هما ناس كتير من الإخوان المسلمين.

■ وكيف وقفت على أن ملقى القبض عليك ينتمون لجماعة الإخوان المسلمين؟

- علشان كانوا كلهم بدقون ولما سألت الضابط قالى إن هم من الإخوان.

■ ما أوصاف هؤلاء الأشخاص والملابس التى كانوا يرتدونها، التى دعتك إلى التأكد من انتمائهم إلى جماعة الإخوان المسلمين؟

- هما اثنين منهم لابسين جلاليب وفى منهم بجواكيت وكلهم بدقون وكان فى واحد لابس بدلة.

■ وما العبارات التى تناهت إلى سمعك فى أثناء قيام هؤلاء الأشخاص بضبطك والتى جعلتك تتأكد من انتمائهم لجماعة الإخوان المسلمين؟

- هما قعدوا يقولولى إنت إيه اللى جابك عند قصر الاتحادية، فقلت لهم أنتم مين فقالولى إحنا الإخوان، وإحنا أول ناس نعمل مليونية هنا.

■ وما الذى دعا هؤلاء الاشخاص إلى ضبطك إذن؟

- علشان أنا كنت حاطط باندانة على راسى، فافتكرونى من الثوار.

■ وهل قام أى من سالفى الذكر بالتعدى عليك بالضرب فى أثناء ضبطك؟

- أيوه هما ضربونى على وشى وعلى قفايا.

■ وما الأقوال التى ترغب فى الإدلاء بها؟

- أنا عايز اتهم الدكتور محمد مرسى وخيرت الشاطر وبديع وعصام العريان والبلتاجى على تحريضهم على ضرب الناس فى الشارع والناس اللى ضربونى أخذوا منى ألفين جنيه.

وتبين من التقرير الطبى على المتهم بوجود آثار جروح أعلى الحاجب الأيسر وتورم أسفل العينين اليمنى واليسرى وجروح قطعية بالأنف وآثار لسحجات وخدوش بالجانب الأيسر بجوار الصدر من الناحية اليسرى، وكذلك بالبطن من الناحية اليسرى.

المتهم التاسع:

لقينا ناس كتير بدقون نزلوا

فينا ضرب وأخدوا منى الفلوس اللى كانت معايا

■ اسمك وسنك وعنوانك ووظيفتك؟

- محمد حسين عباس تمام، حلاق، 24 عامًا،المعادى.

■ ما تفاصيل ما حدث؟ وما ظروف ضبطك وإحضارك؟

- اللى حصل إن إمبارح كنت نازل وسط البلد أنا وواحد صاحبى اسمه أيمن، وإحنا فى طريقنا بالميرغنى علشان نشوف إيه اللى بيحصل جنب الاتحادية فلقينا ناس كتير بدقون نزلوا فينا ضرب وأخدوا منى الفلوس اللى كانت معايا وقعدوا يقولوا مين اللى محرضك وقلت لهم علشان شغل وقالوا إنت جاى عشان تحدف علينا طوب وبعد كده راحوا رامينى أودام القصر وبعد كده الصبح أخدونى للقسم وجابونى على هنا.

■ متى وأين حدث ذلك؟

- حصل ده يوم 5/12 / 2012 فى شارع الميرغنى قبل البنزينة بمصر الجديدة.

■ ما الذى دعاك إلى الاقتراب من محيط قصر الاتحادية آنذاك؟

- أنا كنت رايح اتفرج على اللى بيحصل هناك.

■ ما الذى استدعى انتباهك آنذاك؟

- أنا لقيت ناس بتضرب فى بعضها.

■ وهل وقفت على هؤلاء الأطراف الذين كانوا يشتبكون ببعضهم البعض؟

- لا أنا معرفشى هما مين وهما ناس كتير بدقون.

■ ما مضمون الحوار الذى دار بينك وبين هؤلاء الأشخاص؟

- هما قالولى إنت هنا ليه ومين اللى محرضك وإنت تبع حمدين ونزلوا فيا ضرب.

■ وما التصرف الذى بدر من هؤلاء الأشخاص؟

- هما مسكونى وضربونى وقلعونى ملط وخدوا منى التليفون والمحفظة والفلوس وخاتم وساعة وسلمونى عند القصر للشرطة.

■ وما الذى دعا هؤلاء الأشخاص إلى ضبطك آنذاك؟

- أنا ماعرفش هما عملوا كده معايا ليه.

■ وهل صدرت من هؤلاء الأشخاص ثمة عبارات أوحت لك بالجهة التابعين لها؟

- هما كانوا بيقولوا لى إنت جاى تموت إخواتنا فى الإسلام.

كما تبين بالتقرير الطبى سحجات بالوجه وجروح سطحية بالأنف والشفة السفلى وكدمة بالعين اليسرى وجرح قطعى بالرأس سطحى وتوجد كدمات متعددة بالبطن والصدر.

ثم شرعت النيابة فى سؤال المتهم كمجنى عليه.

■ ما تفصيلات حدوث إصابتك؟

- اللى حصل أنا كنت رايح عند المظاهرات علشان أتفرج على اللى بيحصل لقيت ناس كتير بدقون اتلموا علىّ وقعدوا يضربوا فيا بشوم وخراطيم أنبوبة بوتاجاز وقلعونى هدومى ملط وسحلونى واخدوا منى التليفون والمحفظة والفلوس وراحوا رمينى عند قصر الاتحادية وخدونى على القسم وجابونى على هنا.

■ وما القصد من المعتدين عليك؟

- هما فكرونى معارض للرئيس مرسى.

■ كيف استبان لك ذلك القصد؟

- علشان هما سألونى مين اللى محرضنى وإن كنت تبع حمدين.

المتهم العاشر:

قالوا لى إنت بلطجى وحمدين والبرادعى هما اللى مسلطينك

اسمى محمد حنفى على حسنين، 21 عامًا، طالب، يقطن بحلوان.

■ ما تفصيلات ما حدث؟ وما ظروف ضبطك وإحضارك؟

- اللى حصل إن أنا كنت رايح أشاهد أحداث المظاهرات من بعيد وبعدين لقيت واحد بدقن قاللى تعالى وراح واخدنى وقاللى بطاقتك فين وشاف بطاقتى وعرف إنى فى الأزهر وبعد كده قاللى إنت إيه اللى جابك هنا وبعد كده قالهم إنى بلطجى، وقال لى إن حمدين والبرادعى هما اللى مسلطينك وراح قال لى التانى اللى معاه إن هما يلبسونى أى حاجة من اللى معاهم وبعد كده ربطنى من خلف وخلانى أقف أمام الاتحادية وبعد كدة فضلت قاعد لغاية ما الحكومة جت الصبح وأخدونى على القسم.

■ متى وأين حدث ذلك؟

- الكلام ده حصل 6/ 12 / 2012 بشارع الميرغنى.

■ ما سبب وجودك بالزمان والمكان سالفى الذكر؟

- أنا كنت رايح هناك علشان اتفرج على اللى بيحصل.

■ هل لك نشاط سياسى أو انتماء حزبى؟

- أنا كنت منضم لحركة 6 أبريل أيام الثورة، ورحت يوم واحد بس واتقطعت صلتى بهم.

■ ومن هم الأشخاص الذين قاموا بضبطك آنذاك؟

- أنا اللى مسكنى من الحرية والعدالة.

■ وكيف وقفت على أن هذا الشخص ينتمى إلى حزب الحرية والعدالة؟

- علشان فى واحد قاللى إن واحد من اللى اتمسكوا معانا والدته كانت منضمة لحزب الحرية والعدالة.

■ وهل كان جميع الأشخاص الموجودين بذلك المكان منتمين إلى حزب الحرية والعدالة وجماعة الإخوان؟

- أيوه.

■ وما أوصاف هؤلاء الأشخاص والملابس التى كانوا يرتدونها والعلامات التى جعلتك تتأكد من أن هؤلاء الأشخاص من حزب الحرية والعدالة وجماعة الإخوان؟

- علشان هم كلهم كانوا بدقون ومنهم لابسين جلاليب وبدل.

■ وما العبارات التى سمعتها من هؤلاء الأشخاص ودعتك إلى الاعتقاد بانتمائهم لجماعة الإخوان المسلمين؟

- علشان كانوا بيهتفوا حرية وعدالة المرسى وراه رجالة وكانوا بيقولوا «يا بديع يا بديع أأمر إنت وإحنا نطيع».

وتبين من تقرير الكشف الطبى إصابة المتهم بسحجات بالوجه وجروح سطحية بالأنف والشفة السفلى ويوجد كدمة بالعين اليسرى وجرح قطعى بالرأس سطحى وكدمات متعددة بالبطن والصدر.

المتهم الحادى عشر:

قالولنا أنتم كفرة وجه شيخ يسحبنى من وسطيهم وفضلوا يضربوا فيّا لغاية لما لقيت نفسى عند الاتحادية

اسمى محمود أحمد عبد العزيز القاضى، 19 سنة طالب بالفرقة الثانية كلية الهندسة الجامعة الكندية، مقيم بالحى السويسرى بشارع شاكر حسين الحى العاشر مدينة نصر.

■ ما الذى حدث إذن وما ظروف ضبطك وإحضارك؟

- اللى حصل إمبارح 5 / 12/2012 حوالى الساعة 8.30 مساء أنا كنت راجع فى الباص بتاع الجامعة، وكان طالع بينا على الدرس فى الخليفة المأمون بمنطقة الأحداث، وهو لما شاف التجمع قال أنا مش هعدى على روكسى، وأنا معرفش هو لف منين ومشى بعيد عن قصر الاتحادية والأوتوبيس نزلنا فى منطقة معرفش اسمها، وكان فى شوية تجمهر فى منطقة قريبة من روكسى وبعدين كان فى مجموعتين مؤيدين ومعارضين، وأنا معرفش أنهى مجموعة منهم اللى طلعت الصواريخ بس عرفت بعد كده أن المعارضين ضربوا الشماريخ على المؤيدين وعرفت الكلام ده من الهتاف فإحنا خفنا عشان المؤيدين كانوا بيحدفوا طوب ورحت ركبت تاكسى ففوجئت بثلاثة بيجروا ورايا وكان معايا واحد من زمايلى ومسكونا إحنا الاتنين فإحنا قلنا لهم إحنا ماشيين قالولنا ماشيين منين انتوا بلطجية وقالوا لنا إنتم كفرة وبعد كدة مشفتش صاحبى وسحبونى وأنا كان معايا شنطة فيها الكتب، وجه شيخ حاول يسحبنى من وسطيهم وفضلوا يضربوا فى لغاية لما جات شبه أفراد أمن مركزى وحاول يشدنى لغاية لما لقيت نفسى عند قصر الاتحادية، وهناك كان فى ناس بتسألنى انت شغال إيه لغاية ما جات عربية ترحيلات أخدتنا كلنا وودتنا معسكر الجبل الأحمر زى ما الناس قالت كده ولما نزلنا من العربية كان فى ظباط واقفين أخدونا لناس تانيين وتمموا علينا تانى وخدونا جوه وقعدوا يسألوا كل واحد كان رايح يعمل إيه، وبعد ما بنتسأل بيدخلونا تانى الحجز وقالولنا إنتو هتروحوا النيابة النهاردة وبعد كدة جابونا على هنا دلوقتى.

■ متى وأين حدث ذلك؟

- يوم 5/12/2012 حوالى الساعة 8.30 بشارع أمام قصر الاتحادية بمصر الجديدة.

■ ما قولك فى ما سطره العقيد سيف الدين سعد زغلول من وجود تجمهر؟

- هو فعلا كان فيه تجمهر عند قصر الاتحادية وتعدوا عليا بالشتيمة والضرب.

■ هل توجد بينك وبين العقيد سيف الدين سعد زغلول ثمة خلافات؟

- ما عرفوش ومفيش أى خلافات بيننا.

■ هل لديك سوابق؟

- لا.

المتهم الثانى عشر:

سألونى أنت مؤيد ولّا معارض؟ قلت لهم القرارات دى غلط ومكملتش الكلام ونزلوا فيا ضرب

اسمى يحيى أحمد محمود محمود، 36 سنة، حلاق، وأقيم بحلوان.

■ ما الذى حدث وما ظروف ضبطك وإحضارك؟

- الكلام ده حصل حوالى الساعة 8.30م إمبارح 5/12/2012 كنت راجع من الحى السابع ومروح بيتى، وكنت عايز أعدى من عند القصر علشان أتفرج على المظاهرات، وأول ما رحت وعديت من عند قضبان المترو، وقبل ما أروح عند الزحمة لقيت اتنين بيسألونى رايح فين قلت لهم أنا رايح أتفرج، وسألونى أنت مؤيد ولا معارض قلت لهم القرارات دى غلط، ومكملتش الكلام ونزلوا فيا ضرب وبعد ما قعدوا يضربوا فيا ودونى الشرطة، وأنا من كتر الضرب معرفتش ودونى فين واتحبست من إمبارح والنهاردة جابونى على النيابة وده كل اللى حصل.

■ ومتى وأين حدث ذلك؟

- الكلام ده حصل إمبارح بتاريخ 5 / 12 /2012 حوالى الساعة 8.30 أمام قصر الاتحادية.

■ من كان يرافقك آنذاك؟

- أنا كنت لوحدى.

■ ومن تحديدا الذى قام بضبطك وإحضارك؟

- هم اتنين سألونى أنت مؤيد ولا معارض لقرارات مرسى وقلت لهم أنا معارض فضربونى.

■ ما قولك فى ما سطره العقيد سيف الدين سعد زغلول فى المحضر بتاريخ 6 / 12 /2012؟.. وتلوناه عليه

- فعلا كان فى ناس كتير وأنا كنت رايح أتفرج ومعرفش حد هناك.

■ هل لك من ثمة قضايا أخرى؟

- لا.

ثم واجهه المحقق من جديد بالاتهامات المنسوبة إليه فرد «محصلش».

ثم بدأت النيابة فى سؤال المتهم كمجنى عليه

■ كم عدد من قام بالتعدى عليك؟

- اتنين بدقون.

■ وما وصف سالفى الذكر؟

- هم الإتنين كانوا مليانين بدقون وأنا مش فاكر حاجة تانى.

■ وما سبب قيام سالفى الذكر بالتعدى عليك؟

- علشان قلت لهم أنا معارض وهم تبع الإخوان فضربونى.

■ وما كيفية قيام سالفى الذكر بالتعدى عليك بالضرب؟

- هم فى الأول ضربونى إتنين وبعد كده انضموا لهم ناس ضربونى فى كل حتة فى جسمى.

■ ومن هم الذين قاموا بضربك والتعدى عليك وإحداث إصابتك؟

- أنا ماشفتش اللى ضربنى، وأنا كان كل همى إنى أحوش عن نفسى.

■ وكم ضربة كالها لك سالفو الذكر؟

- أنا مش فاكر وماشفتش حاجة والضرب كان فى كل جسمى.

■ وهل كان برفقتهم أدوات فى أثناء التعدى عليك؟

- أيوه.

■ وهل شاهدت تلك الأدوات التى كانت برفقة سالفى الذكر؟

- هم الإثنين اللى ضربونى فى الأول مكنش معاهم حاجة لكن اللى جم بعد كده كان معاهم وبعد كده ضربونى فى كل جسمى.

■ وما العبارات التى كان يرددها سالفو الذكر فى أثناء تعديهم عليك؟

- هم كانوا بيقولولى مين اللى بعتك وأعطالك كام وأنا قلت لهم أنا مافيش حد بعتنى أنا جاى أتفرج بس.

■ ما الإصابات التى تلقيتها؟

- أنا عندى شروخ فى ضهرى وكدمات متعددة فى جسمى.

■ ومن تحديدا تتهم محدثى تلك الإصابات؟

- أنا بتهم الإخوان المسلمين.

■ على أى أساس تتهم سالفى الذكر؟

- على أساس أنهم ضربونى لما قلتلهم أنا معارض لقرارات مرسى.

■ وهل ترغب فى تحويلك لإجراء الكشف الطبى عليك؟

- أيوه.

■ هل لديك أقوال أخرى؟

- لا...

تمت أقواله وتوقع منه يحيى أحمد محمود محمود.