الحزمة

أعلن الدكتور أحمد جلال، وزير المالية، أن أهم أولوياته هو عمل (حزمة) إصلاحات مختلفة لإنعاش الاقتصاد، وذلك يشمل إيجاد توازن بين 3 أهداف مهمة هى (معالجة الموازنة وحفز النمو وتحقيق العدالة الاجتماعية).. وعلى إثر هذا التصريح سمعت الحوار التالى بين صديقين:
أ- أنت سمعت اللى قاله وزير المالية؟
ب- عن إيه ما هو دايما بيقول!
أ- بيقول هو ناوى يعمل حزمة.. أنا كل اللى اعرفه حزمة فجل.. حزمة جرجير وبس.. هو فيه حزم تانية؟
ب- طبعا فيه حزم تانية كتير زى الحزمة الإحصائية والحزمة الضوئية والحزمة الاقتصادية وحزمة بروتوكولات الإنترنت والحزمة التشريعية وحزم كتير تانية.
أ- ياعم كلمنى كلام افهمه.. بلاش تتوهنى زى ماتوهنى وزير المالية.
ب- أنا هقولك يعنى إيه حزمة؟.. يعنى شوية إجراءات علشان الاقتصاد تدب فيه الروح من تانى.
أ- إيه هى الإجراءت دى؟
ب- يعنى تشغيل المصانع اللى توقفت.. ونرجع عجلة التصدير تدور من تانى.. وننشئ مشروعات جديدة.. وترشيد الاستيراد اللى بقى عامل زى السوس اللى بينخر فى عظم الاقتصاد يوميا.
أ- ياريت تفهمنى أكتر يا أبو العريف.
ب- يعنى الحكومة هتستثمر أموال علشان خاطر عيونك وعيون الشعب كله.. يعنى علشان تعيش مرتاح.
أ- يا عم قوللى إيه هى المشروعات اللى الحكومة بجلالة قدرها ناوية تستثمر الفلوس فيها؟.
ب- يعنى انت عاجبك الانهيار فى كل مجالات مياه الشرب ؟.. وكمان الصرف الصحى؟.. والكهرباء؟.. والمواصلات؟.. والتعليم وخيبة الدروس الخصوصية؟
أ- طبعا مش عاجبنى ياريت الحكومة تبقى صادقة ونشوف تحسن فى الحاجات دى.
ب- أنا كنت فاهم انك هتكمل كلامى وتقول (المشاريع دى هتشغل شباب كتير).. يعنى على الأقل ولادك اللى قاعدين من غير شغل.. هيشتغل منهم واحد أو اتنين.
أ- الكلام حلو قوى.. بس الحكومة هتجيب فلوس منين يا حلال المشاكل؟
ب- الحكومة هتعلن عن الاستثمار فى المشاريع دى.. المصريين الوطنيين أصحاب الفلوس يهمهم استثمار أموالهم فى بلدهم.. مش كدا وبس.. كمان أشقاءنا العرب وكمان الأجانب هيستثمروا فى المشاريع دى.
أ- يعنى اللى معاه قرشين وعايز يخليهم أربعة يدخل المشاريع دى؟.
ب- طبعا يدخل وهو مطمن إن الأمن هو الشمسية اللى تحتها كلنا بنعيش.. كمان فيه حزمة تشريعية هتنظم العلاقة بين الدولة والمستثمرين.
أ- تانى هتقوللى حزمة تشريعية؟
ب- طبعا أقول لك حزمة تشريعية يعنى مجموعة قوانين يتبعها إجراءات من خلالها يتم تشجيع المستثمر إنه يكون متطمن وحاطط فى بطنه بطيخة صيفى.
أ- ياحلاوة ياولاد.. والنبى صدق اللى قال إن العلم (نور).. بعد إذنك أروح أجيب حزمة.. والله نسيت حزمة إيه؟.. آه افتكرت حزمة جرجير.