متغربين

عشان نقدر نعيش فيكِ
متغربين
وقلوبنا شوق لمعاليكِ
متغربين وحلمنا
يوم رجوعنا نلاقيكِ
فرده جناحك لينا
بالخير اللى فيكِ
لكن يا ميت خُسارة
الحلم مكملشي
نرجع ثوانى ليكِ
نقوم تانى نمشي
أحلامنا فوق حيطانك
نرسمها فتجهلينا
ونحلم بس بأمانك
تستخسريه فينا
رغم إن كنا
فى الغربة نعطش تروينا
ولو يوم غلطنا
اسمك كان بسهوله يحمينا
اسمك كان رصيد وسلاح
طول عمره فى ايدينا
نداوى بيه الجراح
نزخرف بتاريخه أسامينا
اسمك كان رداء أبيض
يطهر كل معاصينا
كان الستر فى المحنة
وفى البرد كان يدفينا
وافقنا بالغربة عنك
وقولنا دين علينا
وقولنا إحنا منك
ومسيرك تعوضينا
والعمر كله عدا
وماتت أمانينا
والعالم كله عدا
وإنتِ بتخزلينا
القلب فيكِ مات
وبأتى تيجى علينا
وعشانك الورد مات
ولساكى عايشه فينا
الحب جوانا ليكِ
قدر مِتحكم فينا
وقدرنا نهون عليكِ
وعنك تغربينا
أبوس كل حاجة فيكِ
حنى يا قسيه علينا
أصل اللسان الغريب
بقول ضحكتى علينا
لو صح.. مياه النيل
ها تكون دموع عنينا
وها يفضل المستحيل
إنك تهونى علينا
وها نكمل بقيت العمر
زى ما إحنا متغربين
وندعى العمر يمر
وإحنا جوانا الحنين
ويوم خروج السر
ها نوقع بالجاثمين
ع القبر بكلمة سر
اسمها مُشتاقين
يمكن تُشطبى فى أرضك
الغربة م القوانين
وما تقولش تانى الأم
ولادى متغربين